Mt 24 - Testamente Ledrimpswha ni Mapsalma

Yesu akhanela hi kumbundrumuxiwa ka Tempele

¹ Kuti loko Yesu ahuma a Tempeleni, atifambela, a vadondrisiwa vakwe vamutrhindrekelela vamukomba mayakiwela ya Tempele.

² Kutani avayangula aku ku vone: An'wiswivoni hinkwaswu leswi? Nihlayelamfuri nili ku n'wine: kungaka kungasali ribye a henhla ka ribye ledri dringatiki mbundrumuxiwa.

A masungulu ya mahlomulo

³ Kuti loko atrhami nhaveni ya Minhlwari, a vadondrisiwa vakwe vatrhindrekela ku Yene na vali swavu vaku: Hibyele a nkama lowu switakahumelela ha swone, utivisa ni xikombiso xa kubuya kwaku, ni xa kuhela ka misava?

⁴ Yesu avayangula aku: Tivonelani, n'wingatitxhuka n'wikanganyisiwa hi mhunu.

⁵ Hikusa lava vanyingi vatata hi vito dranga vaku: Hi mine Kriste, vatakanganyisa a vakutala.

⁶ N'witayingela tiyimpi ni pongwe dra tiyimpi; tivonani, n'wingatxhukeni; hikuva swifanekeli kuhumelela; kambe abyisiva vugamu.

⁷ Hikusa a tiko drin'we dritapfukela drin'wana, ni mfumu mun'we wutapfukela mun'wana. Kutava ni tindlala amimbangwini minyingi.

⁸ Hinkwaswu leswi atava kusungula ka mahlomulo.

⁹ Kutani vatan'winyiketa akuxanisekeni, vatan'widlaya; n'witavengiwa hi matiko hinkwayu hinkonta ya vito dranga.

¹⁰ Hi nkama lowo lava vanyingi vatakhunguvanyisiwa, vatawongana, ni kuvengana.

¹¹ Kutahumelela vaprofeta vanyingi va madrimi, vakanganyisa lava vanyingi.

¹² Hinkonta ya kuyandra ka vubihi, a lirandru dra lava vanyingi dritatitimeta.

¹³ Kambe lweyi atiyiselaka kuyatlhasa vugan'wini, atahuluxiwa.

¹⁴ Kutani a Ivangeli ya Mfumu yitareriwa akuva byiva vumboni amisaveni hinkwayu; ntrhaku hi kone kutakata vugamu.

A mahlomulo lawa makulu

¹⁵ Hileswo-ke kutaku loko n'wivona a manyala ya kuhlasela, lawa amahlayiki muprofeta Daniel, na me mbangwini wa kuhlawuleka (lweyi adondraka leswi, aswiyingelisise),

¹⁶ lava vanga Yudeya avatrutrumele atinhaveni;

¹⁷ lweyi anga henhla ka yindlu yake anga txhuke axika aya titekela swa yindlu yake;

¹⁸ ni lweyi anga masin'wini, anga txhuke atlhelela ntrhaku kuya teka swiyambalu swake.

¹⁹ Yowee lava vatakava ni tinyimba ankameni lowo, ni lava vatakava vayan'wisa!

²⁰ Khongotani leswaku a kutrutruma kwenu kungavi hi vuxika na kone kungavi hi Savata;

²¹ hikusa kutavani nhlomulo wukulu, lowu swanga ha wone, wungasamikiki wuva kone kusukela loko misava mitumbuluxiwa, mfuri wungahatikiva kone.

²² Loko a masiku lawo amangagomisiwanga, afa kungahulukanga mhunu ni mun'we; Kambe hinkonta ya vahlawuliwa, amasiku lawo matagomisiwa.

²³ Loko mhunu an'wibyela aku: Lavisani, Kriste hi lweyi la kumbe, lahaya, n'wingapfumeleni.

²⁴ Hikusa kutahumelela lava vatakatihlaya va Kriste hi madrimi, ni vaprofeta va madrimi, vatakahumexa swikombiso leswi swikulu ni mahlolana, akuva loko swikoteka, kukanganyisiwa na vone a vahlawuliwa.

²⁵ Vonani, nin'wibyeli swingasina humelela.

²⁶ Hileswo-ke, loko vaku ku n'wine: Lavisani, hi lwiya ahuleni, n'wingahumeni; kumbe vaku: Lavisani, hi lwiya atindlwini; n'wingapfumeleni.

²⁷ Hikusa swanga hi lihati drivoniwaka na drivaninga kusukela avuxeni kuyatlhasa vupeladambu, switava tanu ni kubuya ka N'wana wa Mhunu.

²⁸ Lomu a ntrumbu wutakava kone, hi lomu makhoti matakahlengeletana kone!

A kubuya ka N'wana wa Mhunu

²⁹ Ntrhaku ka masiku lawo ya nhlomulo, a dambu dritandruluka driva dra ntima, ni hweti yingativaninga, a tinyeleti titawa hi le tilweni, a mintamu ya matilo mitatrekatrekisiwa.

³⁰ Hi laha kutakavoniwa atilweni a xikombiso xa N'wana wa Mhunu, a matiko hinkwawu ya misava matadrila, mfuri matavona a N'wana wa Mhunu loko abuya hi matlavi ya tilo na ani ntamu lowu wukulu ni kuphatima.

³¹ Ataruma a tintrumi takwe hi mpfumawulu wa mhalamhala, akuva swihlengeleta vahlawuliwa vakwe vapfa ku mune wa matlhelo ya misava, kusukela ku tlhelo drin'we kuyatlhasa ku tlhelo drin'wana dra tilo.

A dondro ya nkuwa

³² Dondrani hi xifaniso xa nkuwa. Loko tinkambu ta wone tisungula kunabyala, kuhluka ni makamba, n'waswitiva leswaku a minyuku mikusuhi.

³³ Hi swoswo, na n'wine, loko n'wivona hinkwaswu leswo, switivani leswaku Yene ale kusuhi, anyangweni.

³⁴ Nihlayelamfuri nili ku n'wine: A vhanu va nkama lowu vangaka vangakhaluti, na leswo hinkwaswu swingasinahumelela.

³⁵ A tilo ni misava switahundra, kambe a maritu yanga mangaka mangahundri.

³⁶ Kambe a siku ni nkama, akuna mhunu lweyi aswitivaka, nambi tili tintrumi ta Tilo, nambi ali N'wana, loko angali Tatana ntsena.

³⁷ Kambe, swanga hi masiku ya Nowa, a kubuya ka N'wana wa Mhunu kutava tanu.

³⁸ Hikuva swanga hi leswi afaka vada, vanwa, vatekana, vatekisa, amasikwini lawa mangarangela a ntita, kuyatlhasa siku ledri Nowa anganhingena angalaweni,

³⁹ na swone afaka vangativi ntxhumu, kukondra kutlhasa a ndhambi yivaheta hinkwavu; hi swoswo, na kone kubuya ka N'wana wa Mhunu kutava tanu.

⁴⁰ Ankameni lowu a vavanuna vabiri vatava masin'wini, mun'we atatekiwa mun'wana atatrikiwa.

⁴¹ A vavasati vabiri vatava na vasila aribyeni dra kusila: mun'we atatekiwa mun'wana atatrikiwa.

⁴² Hitekani-ke, hikusa an'witivi a siku ledri a HOSI yenu yitakata ha drone.

⁴³ Kambe tivani leswi: Loko fanga n'winyi wa yindlu ativi nkama lowu a muyivi atakata ha wone, afa atalavelela angamupfumeleli a kutlhanya a yindlu yake.

⁴⁴ Hi swoswo na n'wine tilulamiselani hikusa a N'wana wa Mhunu atata hi nkama lowu n'wingawuyanakanyikiki.

Xifanisu xa vatiri vabiri

⁴⁵ Hi mani-ke a mutiri lweyi wa kudumbeka ni kutlhariha, lweyi a hosi yake yimubekiki a henhla ka ndangu wa yone, akuva awuyavela a swakuda hi nkama lowu wufanekelaka, xana?

⁴⁶ Kukateki a mutiri lweyi kutakaku loko a hosi yake yibuya, yimukuma na atirisa xiswoswo.

⁴⁷ Nihlayelamfuri nili ku n'wine: yitamubeka a henhla ka vukosi bya yone hinkwabyu.

⁴⁸ Kambe kungaku loko a mutiri lweyi mfani, ahlaya mbilwini yake aku, a hosi yanga yahlwela,

⁴⁹ asungulaka a kuba a vatirikulobye, ada, anwa kun'we ni timpopswi;

⁵⁰ a hosi ya mutiri lweyo yitata hi siku ledri angayilaviselikiki ha drone ni nkama lowu yene angawutivikiki,

⁵¹ kitani atamutravukanyisa, amunyika vutrhamu byake kun'we ni vamandrendre. Lahu kutava ni xidrilo ni kuketrela ka menyo.