Mt 17 - Testamente Ledrimpswha ni Mapsalma

Kundrulutiwa ka Yesu

¹ Antrhaku ka ntlhanu wa masiku na drin'we, Yesu ateki Petrosi na Yakobe na Yohana makwa Yakobe, kutani vantlhantukela anhaveni ya kuleha ha vuswavu.

² Kutani andrulutiwa mahlweni kwavu. A liso drakwe driphatima swanga hi dambu, ni swiyambalu swake swindruluka swiva swa ntlhohe swanga hi livaningo.

³ Kolahu vavona Moxe na Eliya vakhanela na Yene.

⁴ Petrosi aku: HOSI, i swa hombe loko hiva kola! Loko uswirandra, nitayaka mintronga miraru: mun'we wutava waku, mun'wana wutava wa Moxe ni mun'wana wutava wa Eliya.

⁵ Kaku loko Petrosi ahakhanela, a tlavi dra kuphatima drihumelela drivafukumeta, atlavini kutwala ritu, ledri driliki: Lweyi hi N'wananga lweyi a randrekaka, lweyi nitrhavaka ha yene, muyingisetani.

⁶ Loko vayingeli leswi, a vadondrisiwa vawa hansi hi liso, vatali hi kutxhava.

⁷ Kambe Yesu atrhindrekela ku vone avakhumba aku: Sekelekani! N'wingatxhaveni!

⁸ Loko valavisa avahavonanga mhunu mumbeni, loko ange Yesu ntsena.

⁹ Loko vafulameli hi le nhaveni, Yesu avaleleta aku ku vone: N'wingadrunguleli mhunu ni mun'we leswi n'wiswivoniki, loko N'wana wa Mhunu angasinapfuka akufeni.

¹⁰ Kutani a vadondrisiwa vakwe vamuvutisa vaku: Hayini a vatrali vahlaya leswaku Eliya afanela kuranga ata?

¹¹ Yene avayangula aku: Kunene, Eliya awata, atatapfuxetela hinkwaswu.

¹² Kambe nan'wibyela leswaku: Eliya ati khale, kambe avamutivanga, kutani vamuyentxi hinkwaswu leswi vangaswirandra. Hi swoswo na yene N'wana wa Mhunu ataxanisiwa ha vone.

¹³ A vadondrisiwa vahangayingelisisa leswaku afa avabyela hita Yohana Mubabatisi.

Yesu ahanyisa wandrisanyana wa kuvabya hi xitruli xa hweti

¹⁴ Loko vatlhasi lomu afaka kuni xitrhungu, mun'we wanuna atrhindrekela ku Yene, amukhisamela aku:

¹⁵ HOSI, yentxela vurombe a n'wananga; hikusa ani xitruli xa hweti axaniseka ngopfu, minkama minyingi awela andrilweni, ni le matini.

¹⁶ Nimuyisi ku vadondrisiwa vaku, kambe vahluleki kumuhanyisa.

¹⁷ Yesu ayangula aku: Yowee lixaka ledri dringapfumelikiki ni dra kusomboloka. Xana nitava na n'wine kukondra kuva drini? Nitan'wilehisela mbilu kuyagama kwini? Mubuyisani kola ku mine.

¹⁸ Yesu atshinya a demoni, drihuma, kutani andrisanyana ahanyisiwa hi nkama wolowo.

¹⁹ Ntrhaku a vadondrisiwa vatrhindrekela ku Yesu vakhanela hi le tlhelweni vamuvutisa vaku: Xana hayini hine hihluleki kudrihumexa?

²⁰ Yene aku ku vone: Hi leswaku n'wine n'wini kupfumela kutrongo. Nihlayelamfuri nili ku n'wine loko afa n'wini kupfumela loku kudringanaka ni nhleke ya sinapi, afa n'wingabyela nhava leyi n'wiku: Suka la uya kutlhelo drin'wana, afa yitasuka. Akuna ntxhumu lowu afaka wutan'wihlula. [

²¹ Kambe a lixaka ledri dra mademoni, drihuma ntsena hi kukhongota ni kutitrona.]

Yesu ativisa ka vubiri a kufa ni kupfuka kwake

²² Loko vahlengeletani kun'we a Galileya, Yesu ati ku vone: A N'wana wa Mhunu atanyiketiwa amavokweni ya vhanu.

²³ Vatamudlaya, kambe hi siku dra vuraru atapfuxiwa akufeni. A vadondrisiwa vatala hi kuvaviseka.

Yesu ahakela tinemba

²⁴ Loko vatlhasi Kapernawume, a vahlengisi va madrakma mabiri vata ku Petrosi, vamuvutisa vaku: Xana a mudondrisi wenu angahakeli a madrakma mabiri?

²⁵ Petrosi aku: Im'na. Kambe aku anhingena ndlwini, Yesu ahatla aku ku yene: A mavonela yaku hi wani Simoni? Xana a vafumi va misava leyi vayamukela ku vamani a tinemba kumbe minhlengo; ku va vana va tiko kumbe ku van'wana?

²⁶ Petrosi ayangula aku: Ku van'wana. Kutani Yesu aku: Hileswo-ke a vana va tiko vatrhunxekile.

²⁷ Kambe, akuva hingavakhunguvanyisi, yana alwandle uyatxukumetela a ndrovo, utaphasa nhlampfi leyi yitakaranga kuhuma; loko utava upfuli nomu wa yone, utakuma kone statera; xiteke, uvanyika, uhumexela mine na wene.