Mt 14 - Testamente Ledrimpswha ni Mapsalma

Kufa ka Yohana Mubabatisi

¹ Ankameni lowo Heroda, mutetrarka, (mufumi), ayingeli kutwala ka Yesu,

² kutani aku ku malandra yake: Lweyo hi Yohana Mubabatisi apfukiki kufeni. Hileswo-ke a mahlolana lawa mayentxiwa hi yene.

³ Hikusa Heroda afa akhomi Yohana amunhingenisa abohelweni, hinkonta ya Herodiyasi, a nkata Filipi makwavu;

⁴ hikusa Yohana afa abyeli Heroda aku: Awuna mfanelo ya kumuteka.

⁵ Heroda afa adjula a kudlaya Yohana, kambe afa atxhava xitrhungu, hikusa hinkwavu afa vapfumela leswaku Yohana i muprofeta.

⁶ Kambe hi siku dra nkhuvu wa malembe ya kubelekiwa ka Heroda, a n'wana wa xisati wa Herodiyasi akina amahlweni ka varambiwa, kutani atrhavisa ngopfu Heroda

⁷ lakakuva yene amudumbisa hi kufunga leswaku atamunyika hinkwaswu leswi atakaswikombela.

⁸ Kolahu yene hi kuhlohloteliwa hi mamana wakwe, aku ku Heroda: Ninyike kola angelweni a nhloko ya Yohana Mubabatisi.

⁹ Kutani a mufumi Heroda avaviseka; kambe hinkonta ya kuva afungile ni hinkonta ya varambiwa, apfumeli leswi a n'wana Herodiyasi akombeliki swone,

¹⁰ aleleta leswaku kutremiwa a nhloko ya Yohana abohelweni;

¹¹ vayibuyisa hi ngelo vayinyikela ku lweyi wa nhwanyana, yene ayinyika mamana wakwe.

¹² A vadondrisiwa va Yohana vatlhasa, vateka ntrumbu vayawulahla; ntrhaku vayativisa Yesu.

Mahlolana ya kusungula ya kuyandrisa makati

¹³ Loko Yesu aswiyingelile (swakudlayiwa ka Yohana), asuki hi byatrhu aya ahuleni vuswake. Loko switrhungu swiswiyingelile, swimulandra hi minenge, swipfa mitini.

¹⁴ Aku awahuma abyatrhwini, avona xitrhungu lexi xikulu; kutani axitwela a vurombe, ahanyisa timbabyi hinkwatu leti afaka vatitisa ku Yene.

¹⁵ Akupeleni ka dambu, a vadondrisiwa vayi ku Yene vaku: Dripelile, na wone mbangu lowu i hula. Tlhelisa a switrhungu, akuva switiyela mitini swiyatixavela swakuda.

¹⁶ Kambe Yesu aku ku vone: Aswifanekelanga leswaku vafamba, vanyikani n'wine vada!

¹⁷ Vone vayangula vaku: Ahina ntxhumu halenu loko enge ntlhanu wa makati na tinhlampfi tibiri.

¹⁸ Yene aku ku vone: Swibuyisani halenu.

¹⁹ Kuti loko aleleti switrhungu leswaku switrhamisa abyanyini, ateka a ntlhanu wa makati ni tinhlampfi tibiri, alavisa Tilweni, atlangela; kutani akhemelela a makati, anyika vadondrisiwa, vone vayavela switrhungu.

²⁰ Hinkwavu vada vaxura. Varolela swibuvu leswi swisaliki, vatata khume dra swihundru na swibiri.

²¹ Lava vangada afa vadjula kutlhasa ku ntlhanu wa makume ya madzana (5000), ya vavanuna, handle ka vavasati ni vatrongwana.

Yesu afamba ahenhla ka mati

²² Ntrhaku ka leswo, Yesu asindrisi vadondrisiwa vakwe leswaku vanhingena abyatrhwini, vamurangela vaya halahaya nkingeni mun'wana, na ahali kari alelela a switrhungu.

²³ Loko a switrhungu swifambile, Yesu antlhantukela anhaveni vuswake akuya khongota. Amadambyeni, afa ahali kone, vuswake.

²⁴ A byatrhu, drone, afa drili kule swinene ni sava, na drikarateka hikola ka mavimbi, hikusa afa kuni mheho yidriyalela.

²⁵ Ampundrwini, Yesu ata ku vadondrisiwa, na afamba henhla ka mati.

²⁶ Loko vamuvona na afamba a henhla ka lwandle, vatxhuka. Vabandlukana hi kutxhava vaku: I xipoko!

²⁷ Kambe Yesu avabyela aku ku: Rulani! Hi mine. N'wingatxhaveni!

²⁸ Kolahu Petrosi amuyangula aku: HOSI, loko ali wene nileleti akuva nita ku wene hi le henhla ka mati.

²⁹ Kutani Yene ayangula aku: Tana! Hi loko-ke Petrosi ahuma abyatrhwini, asungula akufamba ahenhla ka mati akongoma ku Yesu.

³⁰ Kambe loko avona a ntamu wa mheho, atxhava; asungula kutika, kutani abandlukana aku: Nihuluxe, HOSI!

³¹ Yesu ahatla analavuta voko amukhoma aku ku yene: Xipfumelinyana! Xana uganaganekisiwi ha yini?

³² Kutani loko vanhingeni abyatrhwini, a mheho yirula.

³³ Lava afaka vali byatrhwini vakhisama amahlweni ka Yesu vaku: Kunene, wene u N'wana wa Xikwembu Nkulukumba!

Yesu ahanyisa timbabyi a Genezarete

³⁴ Loko vaweleli nkingeni wun'wana, vatlhasi atikweni dra Genezarete.

³⁵ Loko vhanu va mbangu lowuya vamutivile, a mhaka yihangalaki ku hinkwadru tikwana. Vamutisela hinkwavu lava vavabyaka.

³⁶ Vamukombela leswaku avatrika vakhumba a makhaxa ya swiyambalo swake; hinkwavu lava afaka vamukhumba afa vahanyisiwa.