Mt 12 - Testamente Ledrimpswha ni Mapsalma

Yesu, HOSI ya Savata

¹ Ankameni lowo, Yesu afa atremakanyi amakari ka masimu ya tirigo hi siku dra Savata. Kambe a vadondrisiwa vakwe afa vatwa ndlala, kutani vasungula kutrhova swibewu vada.

² A vafarisi loko vaswivona vaku ku Yene: Lavisa, a vadondrisiwa vaku vayentxa leswi swingapfumeliwikiki kuswiyentxa hi Savata.

³ Kambe Yene avabyela aku: An'wingihlaya a Matralwini leswi Davida angaswiyentxa, loko yene ni lava afaka vali na yene vatwi ndlala xana?

⁴ Leswi anhingeniki a Tempeleni, ni leswi vadiki a makati ya xikombiso, lawa afaka swingapfumeleliwi kuva ada, nambi hi lava afaka vali na yene, kambe ntsena hi vaprista.

⁵ Xana an'wihlayanga a Nawini leswaku, amasikwini ya Savata, a vaprista vatlula milawu ya Savata a Tempeleni, vava vangavina nandru xana?

⁶ Ke nan'wibyela leswaku: lweyi anga lani i nkulu kutlula a Tempele.

⁷ Loko n'wine an'witivisisa a ntlhamuxelo wa Matralwa lawa maliki: Nidjula a timpswalu, angali switlhavelu, afa n'wingatiyavanyisa lava vangalikina nandru.

⁸ Hikuva a N'wana wa Mhunu i HOSI ya Savata.

Yesu ahanyisa a wa kuwonyana voko

⁹ Kuti loko asuki kone, ayanhingena asinagogeni dravu.

¹⁰ Afa kuni wanuna lweyi afaka ani voko drin'we dra kuwonyana; hi kudjula kukuma a mhaka ya kumurambela ha yone, a vafarisi vamuvutisa vaku: Xana swapfumeleliwa kuhanyisa mbabyi hi Savata?

¹¹ Yene avabyela aku: Hi mani ku n'wine, lweyi loko ali ni hamba leyi yiweliki kheleni hi Savata, anaka angayihumexi handle?

¹² Hi swoswo-ke, a mhunu ani lisima kutlula a hamba! Hi swoswo-ke swapfumeleliwa a kuyentxa leswi swinene hi Savata.

¹³ Ahangabyela mhunu lweyo aku: Nalavuta a voko. Yene adrinalavuta dritlhela driwololoka, drifana ni drin'wana.

¹⁴ Kolahu loko a vafarisi vahumile, vayahamba a makungu ya leswaku vatamudlayisa kuyini.

Muhlawuliwa wa Xikwembu Nkulukumba

¹⁵ Loko Yesu aswitivile, asuka kolahu, kutani a vhanu vanyingi vamulandra; Yene ahanyisa hinkwavu

¹⁶ kutani avaleleta leswaku vangamupaluxi.

¹⁷ Akuva kuhetiseka ritu ledri dringahlayiwa hi muprofeta Ezaya, lweyi angaku:

¹⁸ Hi lweyi a nandra wanga, lweyi nimuhlawuliki, a murandriwa wanga, lweyi a hika dranga dringatrhavela yene. Nitabeka a Moya wanga a henhla kwake, yene atativisa a va-Matiko a kuyavanyisa.

¹⁹ Angaka angapfuxi timholova, ni kubandlukana, akuna lweyi atakayingela a ritu drakwe atindleleni.

²⁰ Angaka angatrhovi a lihlanga ledri drifahlekiki, angaka angatimi a ngoti ya motre leyi yifufunhaka, akondra ayentxa leswaku a kuyavanyisa kuhlula.

²¹ Na swone a va-Matiko vatadumba vito drakwe.

Yesu na Beelzebule

²² Kutani vatisi ku Yene a mun'we wa kufa-mahlu ni kuva ali mbheveve, lweyi afaka ani mademoni; kutani Yene amuhanyisa lakakuva avona, ava avulavula.

²³ A switrhungu hinkwaswu afa swihlamala swiku: Xana yelweyi ahi N'wana Davida?

²⁴ Kambe a vafarisi loko vaswiyingelile, vaku: Lweyi a susa a mademoni hi ntamu wa Beelzebule, hosi ya mademoni.

²⁵ Yesu hi kutiva leswi afaka vapimisa swone, aku ku vone: A mfumu wun'wana ni wun'wana lowu wutihambanisaka wutandruluka hula, ni muti wun'wana ni wun'wana, kumbe yindlu leyi yitihambanisaka yingaka yingatiyi.

²⁶ Hileswo-ke, loko Sathana ahlongola Sathana, atihambanisa ha vuswake; xana-ke a mfumu wakwe wutatiyisa kuyini?

²⁷ Ni loko na mine nihlongola a mademoni ha Beelzebule, a vana venu vamahlongola ha mani? Hileswo-ke hi vone vatakava vayavanyisi venu.

²⁸ Ke loko mine nihlongola a mademoni hi Moya wa Xikwembu Nkulukumba, leswo swihlaya leswaku a Mfumu wa Xikwembu Nkulukumba wutlhasile ku n'wine.

²⁹ Xana a mhunu angaswikotisa kuyini akunhingena andlwini ya nuna wa ntamu ayiva a vukosi byake, loko angasungulanga hi kumutrimba? Hi kone-ke angakotaka a kuphanga a yindlu yake.

³⁰ Lweyi angeke na mine, alwa na mine, lweyi angahlengeletikiki na mine, awahangalasa.

³¹ Hileswo-ke nan'wibyela nili: A swidoho ni swisandru hinkwaswu switadrivaleliwa ku vhanu, kambe a xisandru xa kusandra a Moya, xingaka xingadrivaleliwi.

³² Ni loko kumbe mhunu ahumexela ritu dra kubiha ku N'wana wa Mhunu, atadrivaleliwa kambe kungaku loko ahlayi, asandra a Moya wa Kuxwenga, angaka angadrivaleliwi, nambi kuva ankameni lowu, nambi ali nkameni lowu wutakata.

A nsinya ni mihandru ya wone

³³ Kumbe n'wingahlaya leswaku a nsinya i wunene, wuhumexa a mihandru minene; kumbe n'wingahlaya leswaku wubihile, wuhumexa a mihandru ya kubiha; hikusa a nsinya wutibyiwa hi mihandru ya wone.

³⁴ Lixaka dra swipswhahla! N'wingaswikotisa kuyini akuhlaya mintxhumu leminene, kasi n'wine ha vuswenu n'wi vabihi? Hikusa mun'wana-ni-mun'wana, akhanela leswi anganaswu ambilwini.

³⁵ A mhunu munene ahumexa leswi swinene avukosini byake lebyi byinene; kasi a mhunu lweyi mfani ahumexa leswi swibihiki avukosini byake lebyi bya kubiha.

³⁶ Kambe nan'wibyela nili: A ritu hinkwadru dra kuka-ndlela ledri a vhanu vatakahlaya drone, vatatiyangulela hikola ka drone hi siku dra kuyavanyisa.

³⁷ Hikusa utahlayiwa lweyi wa kululama hi maritu yaku, na swone, utayavanyisiwa hi maritu yaku.

Xikombiso xa Yona

³⁸ Ntrhaku ka leswo, van'we vatrali ni vafarisi vaku ku Yene: Mufundrisa, hidjula kukuvona uyentxa a xikombiso xin'we.

³⁹ Kambe Yene avayangula aku ku: A lixaka ledri drimfani, dra vumbuye, dridjula mahlolana! Kambe n'wingaka n'winganyikiwi xikombiso xin'wana, loko kunge xa muprofeta Yona.

⁴⁰ Swanga hi leswi Yona angava khurini dra nhlampfi masiku mararu ni vusiku byiraru, hi swoswo a N'wana wa Mhunu atatrhama masiku mararu ni vusiku byiraru andreni ka misava.

⁴¹ A vhanu va Niniva vatayima, hi siku dra kuyavanyisa, kun'we ni lixaka ledri, vatadriyavanyisa hikusa vone vandrulukile, hi kudondrisa ka Yona; kasi akone kola lweyi atlulaka Yona.

⁴² Na swone a mufumi wa xisati wa Nyingitimu atasekeleka, hi siku dra kuyavanyisa, kun'we ni lixaka ledri, atadriyavanyisa, hikusa yene apfi hi le vugan'wini bya misava akuva atatayingela avutlhari bya Salomoni. Kasi akone kola lweyi atlulaka Salomoni!

Kutlhela ka moya lowu mfani

⁴³ Loko a moya lowu mfani wuhuma ku mhunu, wufamba hi le mimbangwini leyi ya kuwoma akuva wuyatikumela a kuwisa, kambe loko wungakukumi,

⁴⁴ wahangahlaya wuku: Nitatlhelela andlwini yanga lomu nihumiki kone. Loko wutlhela, wutatakuma a yindlu leyo na yingena mhunu, yikukuliwile yiva yibekisiwa.

⁴⁵ Kolahu wufamba wuyateka min'wana ya ntlhanu na mibiri ya kubiha kutlula wone, mifamba hinkwayu miyatrhama ku mhunu lweyo, hikolahu a matrhamela ya mhunu lweyo matabiha kutlula a ya kusungula. Hi swoleswi switakahumelela a vhanu lava vamfani.

A vandangu wa Yesu

⁴⁶ Kati loko Yene ahakhanela ni switrhungu, kakutlhasa mamana wakwe ni vamakwavu vayima ahandle vadjula kukhanela na Yene.

⁴⁷ Kutani mun'we amutivisa aku: A mamana waku ni vamakwenu vakola handle, vadjula kukhanela na wene.

⁴⁸ Yene ayangula lweyi ayiki mutivisa aku: Hi mani a mamana wanga ni vamakweru xana?

⁴⁹ Kutani analavutela a voko a henhla ka vadondrisiwa vakwe aku: A mamana wanga ni vamakweru hi volava!

⁵⁰ Hikusa lweyi ayentxaka akurandra ka Tatana wanga lweyi anga Matilweni, lweyo i makweru waxinuna, ni makweru wa xisati ni mamana wanga.