Mt 1 - Testamente Ledrimpswha ni Mapsalma

Vakokwana va Yesu Kriste

¹ Lowu i longoloko wa vakokwana va Yesu Kriste N'wana Davida, N'wana Abrahamu.

² Abrahamu avi tatana wa Yisaki, Yisaki avi tatana wa Yakobe; Yakobe avi tatana wa Yuda ni vamakwavu.

³ Yuda avi tatana wa Faresi na Zara, a mamana wavu avi Tamari; Faresi avi tatana wa Hezeromu, lweyi avi tatana wa Aramu;

⁴ Aramu avi tatana wa Aminadabi, lweyi avi tatana wa Naasoni; Naasoni avi tatana wa Salmoni,

⁵ Salmoni avi tatana wa Bowazi, a mamana wakwe avi Rakabe. Bowazi avi tatana wa Obede, a mamana wakwe avi Ruti. Obede avi tatana wa Yese,

⁶ Yese avi tatana wa mufumi Davida. A mufumi Davida avi tatana wa Salomoni, a mamana wakwe avi lweyi afaka ali nsati wa Uriya.

⁷ Salomoni avi tatana wa Robowamo, lweyi avi tatana wa Abiya; Abiya avi tatana wa Asa.

⁸ Asa avi tatana wa Yosafati; lweyi avi tatana wa Yoramo; Yoramo avi tatana wa Uzia;

⁹ lweyi avi tatana wa Yotamo; Yotamo avi tatana wa Akazi, Akazi avi tatana wa Ezekiya;

¹⁰ Ezekiya avi tatana wa Manase, lweyi avi tatana wa Amosi; Amosi avi tatana wa Yosiya,

¹¹ Yosiya avi tatana wa Yekoniyasi ni vamakwavu, hi nkama lowu a va-Israyele vayisiwiki avukaraweni a Babilona.

¹² Antrhaku ka vukarawa, Yekoniyasi avi tatana wa Salatiyele, Salatiyele avi tatana wa Zorobabele;

¹³ lweyi avi tatana wa Abiyudi, Abiyudi avi tatana wa Eliyakimi; Eliyakimi avi tatana wa Azori,

¹⁴ lweyi avi tatana wa Sadoki; Sadoki avi tatana wa Akimi, lweyi avi tatana wa Eliyudi;

¹⁵ Eliyudi avi tatana wa Eliyazari, lweyi avi tatana wa Matani; Matani avi tatana wa Yakobe,

¹⁶ lweyi avi tatana wa Yosefa a nuna wa Maria, lweyi avi mamana wa Yesu, lweyi atxhuliwaka Kriste.

¹⁷ Xiswoswo kuni khume na mune wa tinxaka kusukela ku Abrahamu kuyatlhasa ku Davida, tin'wana ta khume ni mune kusukela ku Davida kuyatlhasa avukaraweni bya va-Israyele a Babilona, tin'wana kambe ta khume ni mune kusukela loko vayisiwi avukaraweni kuyatlhasa ku Kriste.

Kubelekiwa ka Yesu

¹⁸ A mabelekiwela ya Yesu mavi lawa: Maria, mamana wakwe, atiki abutiwa ha Yosefa, kambe loko na vangasinatekana, akumiwa na ani nyimba hi Moya wa Kuxwenga.

¹⁹ Yosefa, nuna wakwe, lweyi afaka ali mhunu wa kululama, angadjulanga kupaluxa Maria alivaleni, hikolahu atremi kutravukana na yene axihundleni.

²⁰ Atiki apimisa a kuyentxa leswo, a ntrumi ya HOSI yihumelela ku yene anorweni yimubyela yiku: Yosefa n'wana Davida, ungatxhavi a kutitekela Maria a nkataku, hikusa a nyimba leyi angana yone yipfa ku Moya wa Kuxwenga.

²¹ Maria atava ni n'wana wa wandrisanyana, wene utamutxhula a vito dra Yesu, hikusa hi yene atakahuluxa tiko drakwe aswihonweni swa drone.

²² Hinkwaswu leswi swihumeleli akuva kuhetiseka leswi a HOSI yingaswihlaya hi muprofeta lweyi angaku:

²³ A wanhwanyana atava ni nyimba, atapswala n'wana wa wandrisanyana, atatxhuliwa Emanuwele, swihlaya leswaku: Xikwembu Nkulukumba ana hine

²⁴ Loko Yosefa apfuki vurongweni, ayentxi hi laha a ntrumi ya HOSI yimuleletiki ha kone, atitekela Maria ava nkatakwe.

²⁵ Nakone, angativananga na yene, akondra apswala n'wana wa wandrisanyana; kutani Yosefa amutxhula vito dra Yesu.