Mpfuletelo 8 - Testamente Ledrimpswha ni Mapsalma

Xifungo xa vuntlhanu na swibiri

¹ Kutani loko a Hambana yipfuli a xifungu xa vuntlhanu na swibiri, kuve ni kumiyela tilweni hi nkama lowu ingiki i wa hafu ya hora.

² Kolahu nivoni tintrumi ta ntlhanu na tibiri leti tiyimiki amahlweni ka Xikwembu Nkulukumba, na tinyikiwi tinanga ta ntlhanu na tibiri.

³ A ntrumi yin'wana yita, yitatayima kusuhi ni xiluvelo, na yini xibya xa gole, xa kuhisela a muri wa kunun'hwela, yinyikiwi a muri wunyingi wa kunun'hwela, akuva yiwunyikela kun'we ni swikhongoto swa vahlawuleki hinkwavu, axiluvelweni xa gole lexi xinga amahlweni ka xitrhamu-xa-vufumi.

⁴ A musi wa makha ya kunun'hwela wuntlhantukela mahlweni ka Xikwembu Nkulukumba, kun'we ni swikhongoto swa vahlawuleki, na wusukela avokweni dra ntrumi.

⁵ Kutani a ntrumi yiteka a xibya xa kuhisela a muri wa kunun'hwela, yixitata hi ndrilo wa xiluvelo, yixitxukumetela amisaveni, kutani kuva ni kudruma ka tilo, ni maritu, ni kuhatima, ni ximbeta.

Tinanga ta xikhatiso

⁶ A tintrumi leti ta ntlhanu na tibiri, leti tingani tinanga ta ntlhanu na tibiri, titibekiseli akuva titatxhaya.

⁷ Kutani a ntrumi ya kusungula yiyimba a nanga; kuva ni mpfula ya maribyana ni ndrilo swipatrani ni ngati, switxukumeteliwa amisaveni. Kutani a xiyenge xa vuraru xa misava xipswha, ni xiyenge xa vuraru xa minsinya xipswha, ni byanyi hinkwabyu bya lihlaza byipswha.

⁸ A ntrumi ya vubiri yiyimba a nanga; kutani lexi xa kufana ni nhava yikulu yipfuraka ndrilo xitxukumeteliwa alikhulwini, kutani a xiyenge xa vuraru xa likhulu xindruluka ngati,

⁹ kufa xiyenge xa vuraru xa swivumbiwa swa le likhulwini leswi swihanyaka, kuhohlotiwa ni xiyenge xa vuraru xa tingalawa ni mabyatrhu.

¹⁰ A ntrumi ya vuraru yiyimba a nanga; kutani kuwa a nyeleti yikulu hi le tilweni, na yipfura swanga hi motre, yiwela henhla ka xiyenge xa vuraru xa milambu ni le henhla ka tinhlovo ta mati;

¹¹ a vito dra nyeleti leyo vaku i Manono; kutani a xiyenge xa vuraru xa mati mandruluka mafana ni manono, ni vhanu vanyingi vafa hinkonta ya mati lawo hikusa mandruluki mabava.

¹² A ntrumi ya vumune yiyimba a nanga; kuvavisiwa a xiyenge xa vuraru xa dambu, ni xa vuraru xa n'weti, ni xiyenge xa vuraru xa tinyeleti, akuva xiyenge xa vuraru xa swone ximphuma, ni xiyenge xa vuraru xa nhlikanhi xingahavaningi, ni vusiku na byone swiva tanu.

¹³ Nakone nivoni niva niyingela a gama ledri afaka drihaha amakari ka tilo, na drihlaya hi ritu ledrikulu driku: Yowee! Yowee! Yowee ku lava vayakiki amisaveni, hikola ka mpfumawulu lowu wahasaliki wa tinanga, ta tintrumi tiraru leti titakayimba a nanga!