Mpfuletelo 6 - Testamente Ledrimpswha ni Mapsalma

A Hambana loko yipfula a swifungu

¹ Kutani nivoni a Hambana loko yipfula xin'we ku swifungu leswi swa ntlhanu na swibiri, niyingela ni xin'we ku swivumbiwa swakuhanya leswi swa mune, na xiku, hi ritu dra kufana ni kudruma ka tilo: Tana!

² Kolahu, nivona a hanxi dra ntlhohe, na henhla ka drone kutrhami lweyi afaka ali ni vugubu; kutani anyikiwa a ngiyana; Yene asuka na ahlula, akuva aya kuhluleni.

³ Kutani loko a Hambana yipfuli a xifungu xa vubiri, niyingeli a xivumbiwa xa kuhanya, xa vubiri na xiku: Tana!

⁴ Kolahu kuhumelela a hanxi dra libungu; lweyi afaka atrhami a henhla ka drone anyikiwi ntamu wa kususa kurula misaveni, akuva vhanu vatadlayana, mfuri anyikiwa a lipanga drikulu.

⁵ Kutani loko a Hambana yipfuli a xifungu xa vuraru, niyingeli a xivumbiwa xa kuhanya, xa vuraru, na xiku: Tana! Kutani nivona a hanxi dra ntima, na lweyi atrhamiki a henhla ka drone afa ali ni xikalu xa kupima a kubindra axiyandleni xakwe.

⁶ Kolahu, niyingela swanga i ritu amakari ka swivumbiwa swakuhanya leswi swa mune, driku: A mpimu mun'we wa tirigo i denari drin'we, a mimpimu miraru ya maphila i denari drin'we; a mafura ni vhinyu ungaswihoni.

⁷ Loko a Hambana yipfuli a xifungu xa vumune, niyingeli a xivumbiwa xa kuhanya, xa vumune na xiku: Tana!

⁸ Kutani nilavisa, nivona a hanxi dra halandi, ni lweyi afaka atrhami henhla ka drone, afaka ani vito dra ku Lifu, na alandriwa hi Hades (tiko dra vafi), kutani vanyikiwa a ntamu henhla ka xiyenge xa vumune xa misava hinkwayu, akuva vasuvisa hi lipanga, ni hi ndlala, ni hi lifu, ni hi swihari swa kulebya swa misava.

⁹ Loko a Hambana yipfuli a xifungu xa vuntlhanu, nivona, a hansi ka xiluvelo, a mahika ya lava vangadlayiwa hi mhaka ya ritu dra Xikwembu Nkulukumba, ni hi mhaka ya vumboni lebyi afaka vali nabyu.

¹⁰ Na vabandlukana hi ritu ledri kulu vaku: Kutakota kuva ha drini, we Hosi ya kuxwenga ni ya xihlayelamfuri, ungayavanyisiki ni kudrihisa a ngati yeru, ku lava vayakiki misaveni?

¹¹ Kutani vanyikiwa, mun'wana-ni-mun'wana a xiyambalu xa ntlhohe, vava vabyeliwa leswaku vawisa hi nkamanyana wutrongo, kukondra kutlhanganisiwa a nhlayo ya malandra-kulobye ni vamakwavu lava na vone afaka vatadlayiwa swanga ha vone.

¹² Loko a Hambana yipfula a xifungu xa vuntlhanu na xin'we, nivoni kuhumelela a kutrekatreka kukulu ka misava; a dambu drindruluka drimphuma swanga saka dra voya bya swihari, ni n'weti hinkwawu wuva swanga hi ngati,

¹³ a tinyeleti ta tilo tiwa misaveni, swanga hi nkuwa lowu wisaka makuwa lawa ya mambisi, loko wuhlakahliwa hi xidzedze.

¹⁴ A tilo drisusiwa swanga phepha drikulu ngopfu drisongiwaka, ni tinhava hinkwatu ni swihlale swisusiwa amimbangwini ya swone.

¹⁵ Avafumi va misava, ni vakulu, ni tindruna ta xisotxha, ni swipfundri, ni lavantamu, ni swikarawa, ni lava vantrhunxekiki, vatifihla timhakweni ni le hansi ka maribye ya tinhava,

¹⁶ na vaku ku tinhava ni maribye: Welani a henhla kweru, n'wihifihla mahlweni ya lweyi atrhamiki axitrhan'wini, xa vufumi, ni le ku mahlundru ya Hambana,

¹⁷ hikusa kutlhasi a siku drikulu dra kuhlundruka kwavu, hi mani-ke lweyi angakotaka kuyima atiya?