Mpfuletelo 21 - Testamente Ledrimpswha ni Mapsalma

A matilo mampswha ni misava mimpswha

¹ Kutani ni voni a tilo ledrimpswha ni misava leyi mimpswha. Hikusa a tilo dra kusungula ni misava ya kusungula swihundrile, ni likhulu dringehe kone.

² Kutani ni voni ni muti wa Kuxwenga, Yerusalema lwe mumpswha, lwe afaka axika hi le Tilweni ku Xikwembu Nkulukumba. Apfa na axongi swanga hi mulovoliwa lweyi atilungiseliki kutlhangaveta muteki wakwe.

³ Kutani ni yingeli ritu ledrikulu dripfa xiluvelweni driku: Lowu i ntronga wa Xikwembu Nkulukumba kun'we ni wa vhanu. Xikwembu Nkulukumba atatrhama navu, Kutani vone vatava tiko dra Xikwembu Nkulukumba. Yene Xikwembu Nkulukumba atava na vone.

⁴ Atavasula hinkwayu minyembeti amatihlweni yavu, kutani lifu dringahativa kone swimbeni, nambi nkosi, nambi kubongosa, nambi kuvavisa. Hinkwaswu leswi swinyamalalile.

⁵ Kutani lweyi afaka atrhami xiluvelweni aku: Vonani ni yentxa hinkwaswu swiva swimpswha. Kutani aku: Trala, hikusa maritu lawa i ya kudumbeka ni xihlayelamfuri.

⁶ Atlhela nangweso aku ku mine: Swiyentxekile. Ni Alfa na Omega, masungulo ni vugamu. Ku lweyi angani tora, nita muhanana hi timpswalu kunwa hi timpswalu, a mati ya nhlovo ya vutomi.

⁷ Lweyi ataka hlula atava mudi wapfindla wa mintxhumu leyi, mine nitava Xikwembu Nkulukumba wakwe, na yene atava n'wananga.

⁸ Kambe a matoya hinkwawu ni lavanga dumbekangakiki, ni lava vayentxaka swakunyenyentsa, ni vadlayi, ni va vumbuye, ni vangoma, ni lava khongotaka swifaniso ni vahembi hinkwavu, a yavelo dravu i tiva ledri pfuraka dra xivavula, i nga kufa ka vubiri.

Yerusalema lweyi mumpswha

⁹ Kutani kuta yin'we ku tintrumi leti ta ntlhanu na tibiri, leti afaka tili ni mintrheko ya ntlhanu na yibiri avokweni, na yitali hi ntlhanu wa makhombo na mabiri ya vugamu, yiku ku mine: Tana halenu! Nitakukomba mutekiwa, a nsati wa Hambana.

¹⁰ Kutani a ntrumi yiniyisela anhaveni leyi yikulu ya kuleha hi moya na yini komba a muti wa kuxwenga, Yerusalema, lweyi axikaka hi le Tilweni apfa ku Xikwembu Nkulukumba.

¹¹ Lowu wunga ni kuphatima ka Xikwembu Nkulukumba. A livaningo dra wone adrifana ni ribye dra lisima ngopfu, swanga ribye dra yaspa, kuketemuka swanga xivonivoni.

¹² Afa kuli ni pangu ledri drikulu dra kuleha, drili na khume dra swipfalu na swibiri; na aswipfalwini afa kuni khume dra tintrumi na tibiri, henhla ka swipfalu leswo afa kutraliwi vito drin'we dra tinxaka ta khume na tibiri ta tiko dra Israyele.

¹³ Afa kuli ni swipfalu swiraru hi tlhelo dra Vuxa, ni hi tlhelo dra Nyingitimu afa ali swiraru, ni hi tlhelo dra N'walungu afa ali swiraru, ni hi tlhelo dra Vupeladambu afa ali swiraru.

¹⁴ A pangu dra muti afa drili ni khume dra masungulo na mabiri, a henhla ka wone afa kutraliwi ku wone khume dra mavito na mabiri ya vapostolo lava khume na vabiri va Hambana.

¹⁵ Kutani lweyi afaka avulavula na mine afa ali ni mpimu wa lihlanga dra gole, akuva apima muti, ni swipfalu swa wone, ni pangu.

¹⁶ A mpimu wa muti wu na mune wa matlhelo ya kudringana. Akuleha ka wone kudringana ni kuyanama. A pima muti hi lihlanga; kutani a muti afa wuna dzana dra madzana na makume mabiri ya madzana ya madzana (12.000) ya makilometro, akuleha, ni kuyanama, ni kutlakuka kudringana.

¹⁷ A pima ni pangu dra wone wu va dzana dra minkono na mune wa makume na mune, (144) hi mapimela ya mhunu, inga leswaku, ya ntrumi.

¹⁸ A pangu dra muti dri yakiwi hi yaspa, a muti wone wa kuva gole dra lisima, swanga hi xivonivoni lexi basiki.

¹⁹ A masungulo ya pangu dra muti maxongisiwi hi maribye hinkwawu lawa ya lisima. A masungulo ya kuranga afa dri yaspa; a ya vubiri afa drili safiri; a ya vuraru i kalisedoniya; a ya vumune drili esmeralda,

²⁰ a ya vutlhanu afa drili sardoniyo, a ya vuntlhanu na drin'we afa drili sardiyo, a ya vuntlhanu na mabiri afa drili krisolito, aya vuntlhanu na mararu afa drili berilo, a ya vuntlhanu na mune afa drili topaziyo, a ya vukhume afa drili krisopraso, a ya vukhume na drin'we afa drili yasinto, a ya vukhume na mabiri afa drili ametista.

²¹ A swipfalu le'swakhume na swibiri afa ali khume dra maperola na mabiri, na a xipfalu xin'wana ni xin'wana xihambiwi ha perola drin'we. A huvo ya muti afa drili gole ledra lisima, swanga hi xivonivoni lexa kuxwenga.

²² Ku wone anivonanga Tempele, hikusa a Tempele dra wone hi Hosi, Xikwembu Nkulukumba wa ntamu hinkwawu ni Hambana.

²³ Nawone muti awungadjuli dambu, kumbe hweti akuva swiva vaningela, hikusa akutwala ka Xikwembu Nkulukumba afa kuwuvaninga, na kone a Hambana i motre wa wone.

²⁴ Amatiko mata famba hi kuvaninga ka wone, a vafumi va misava vatawubuyisela lidrumu dra wone.

²⁵ A swipfalu swa wone swingaha tipfaliwa ni kan'we a nhlikanhini, hikusa kunga tiva na vusiku ku wone.

²⁶ Kutani vatawubuyisela kuphatima ka matiko.

²⁷ Ku wone kungaka kungahanhingeni ntxhumu lowu wa xambya, nambi kunhingena kone vagandreli va swikwembu swakuka ndlela ni vahembi, kutanhingena ntsena lava traliwiki bukwini dra vutomi dra Hambana.