Mpfuletelo 2 - Testamente Ledrimpswha ni Mapsalma

Papela ku kereke dra le Efesa

¹ Ku ntrumi ya kereke dra le Efesa trala uku: A hlaya leswi, lweyi atamelaka ntlhanu na tibiri wa tinyeleti avokweni drakwe dra xinene, lweyi afambaka a makari ka ntlhanu na mibiri wa mimotre ya gole:

² Nitiva a mintiro yaku, a kukhinyela kwaku ni kutiyisela kwaku ni leswaku awuswirandri akuva kun'we ni lava vamfani; ni leswaku udringi lava vatihlayaka vapostola na kasi ahi vapostola, ukuma leswaku i va madrimi;

³ na kone uni kutiyisela, ubyatrhi kuvaviseka hinkonta ya vito dranga, kambe awukaralanga.

⁴ Kambe nini lexi nixisolaka ku wene: hileswaku a lirandru draku dra kusungula udritrikile.

⁵ Drimuka-ke lomu uwiki kone! Tisole, utlhelela ku mintiro yaku ya kusungula; loko swingali tanu, nakutela, nitasusa a motre waku ambangwini wa wone, loko ungatisoli.

⁶ Kambe kuni leswi swikuseketelaka: hileswaku uvenga a mintiro ya va-Nekolayiti, leyi na mine nimivengaka.

⁷ Lweyi angani tindleve ayingiseti leswi a Moya wuswibyelaka a makereke: Ku muhluli, nimunyika a kuda a mihandru ya nsinya wa vutomi, lowu wunga Paradiseni dra Xikwembu Nkulukumba.

Papela ku kereke ledri dringa Smirna

⁸ Ku ntrumi ya kereke ledri dringa Smirna trala uku: Lweyi wa kusungula ni wa vugamu, lweyi afaka afile kambe swoswi atlheliki ahanya, ahlaya leswi:

⁹ Nitiva a nhlomulu waku ni vusiwana byaku, kambe uxipfundri, mfuri a kusandra ka lava vatihlayaka va-Yuda, na kasi ahi va-Yuda, kambe vone i sinagoga dra Sathana.

¹⁰ Ungatxhave ntxhumu ku leswi utakaxanisiwa ha swone. Vona, Diyavulosi atatxukumetela van'we ku n'wine abohelweni, akuva n'widringiwa, mfuri n'witavani nhlomulo wa khume dra masiku. Vana lweyi adumbekaka kukota uyatlhasa akufeni, nitakunyika a ngiyana ya vutomi.

¹¹ Lweyi angani tindleve ayingiseti leswi a Moya wuswibyelaka a makereke. A muhluli angatxuki akuma a kuvavisiwa hi lifu dra vubiri.

Papela ku kereke ledri dringa Pergamo

¹² Ku ntrumi ya kereke ledri dringa Pergamo trala uku: Lweyi angani lipanga dra kutrema hi matlhelo mabiri, drilotiwiki, ahlaya leswi:

¹³ Nitiva lomu utrhamaka kone, lomu kungani xitrhamu-xa-vufumi xa Sathana, ni leswi wahabekisaka a vito dranga, na ungalandrulanga a kupfumela ku mine, nambi amasikwini ya Antipasi, a mboni yanga ni mudumbeki wanga, lweyi adlayiwiki amakari kwenu, lomu Sathana atrhamaka kone.

¹⁴ Kambe nini mintxhumu mitrongo leyi nikusolaka ha yone: Hileswaku kolanu uni lava vampfekelaka a dondro ya Balahamu, lweyi afaka adondrisa Balake a kutxukumetela a swikhunguvanyiso ku vana va Israyele, nikuva vada leswi switlhaveliwiki a swikwembu swakuka-ndlela, ni kuyentxa vumbuye.

¹⁵ Xileswo, na wene uni lava na vone vatiyisaka a dondro ya va-Nikolayiti.

¹⁶ Kolahu-ke tisole! Loko swingali tanu, nakutela swoswi, nitatalwa na vone hi lipanga dra nomu wanga.

¹⁷ Lweyi angani tindleve ayingiseti leswi Moya wuswibyelaka a makereke: A muhluli nitamunyika manna lawa mafihliwiki, na kone nitamunyika ni xiribyana xa ntlhohe, mfuri ku xiribyana lexo kutraliwi a vito drimpswha, ledri dringativiwiki ha mhunu, kambe ntsena lweyi adriyamukelaka.

Papela ku kereke ledri dringa Tiyatira

¹⁸ Ku ntrumi ya kereke ledri dringa Tiyatira trala uku: A N'wana wa Xikwembu Nkulukumba, lweyi angani mahlu lawa mafanaka ni langavi dra ndrilo, ni minkondro yake mifanaka ni nsuku lowu wukhuxiwiki, ahlaya leswi:

¹⁹ Nitiva a mintiro yaku, ni lirandru draku, ni vupfumeli byaku, ni kutirela kwaku, ni kutiyisela kwaku ni mintiro yaku ya vugamu, mitlulaka a ya kusungula.

²⁰ Kambe nini xisolo ku wene hi leswi utrikaka Jezabele, a wansati lweyi atihlayaka leswaku i muprofeta, adondrisa ava akanganyisa a malandra yanga akuva mayentxa vumbuye, ni kuda leswi switlhaveliwiki swikwembu swakuka-ndlela.

²¹ Nimunyiki nkama akuva atisola, kambe angadjuli kutisola atrika a vumbuye byake.

²² Vona, nitamuwisela alikukwini hi mavabyi, mfuri lava vayentxaka vumbuye na yene vatawela anhlomulweni wukulu, loko vangatisoli amintirweni yake.

²³ Nitadlaya a vana vakwe hi lifu. Kutani a makereke hinkwawu mataswitiva leswaku hi mine lweyi akambisisaka miyanakanyu ni timbilu ta vhanu, mfuri nitan'winyika, mun'wana-ni-mun'wana hi kulandra a mintiro yenu.

²⁴ Kambe swoswi nili ku n'wine, ni ku van'wana a Tiyatira, hinkwavu lava vangaliki ni dondro leyo, lava vangativiki a mintxhumu ya vuyentelelo ya Sathana, kufana ni leswi valiki: Anin'wirwexi ntrhwalu wumbeni,

²⁵ kambe bekisani leswi n'winganaswu kukota nitlhasa!

²⁶ A muhluli ni lweyi abekisaka a mintiro yanga kutlhasa avugan'wini, nitamunyika ntamu ahenhla ka matiko,

²⁷ mfuri atavabyisa hi nhonga ya nsimbi, vone vatabutrhutiwa swanga hi swibya swa vumba,

²⁸ na kone swanga hi leswi na mine niyamukeliki ku Tatana wanga, nitamunyika a nyeleti ya mixo.

²⁹ Lweyi angani tindleve ayingiseti leswi Moya wuswibyelaka a makereke.