Mpfuletelo 19 - Testamente Ledrimpswha ni Mapsalma

Lidrumu ledrikulu Tilweni

¹ Ntrhaku ka leswo, ni yingeli ritu tilweni swanga dra xitrhungu lexikulu, ledri afaka driku: Aleluya! A huluxo ni lidrumu, ni ntamu i swa Xikwembu Nkulukumba weru!

² Hikusa a mitremo yake i minene, milulamile. Hikusa ayavanyisi muyentxi lwenkulu wa vumbuye, lweyi afaka a bolisa misava hi vumbuye byake. Xikwembu Nkulukumba adrihisile ni ngati ya malandra yake.

³ Kutani vayengeta ka vubiri vaku: Aleluya! Kutani musi wa kupswha kwake wu ntlantukela hi masiku ni masiku.

⁴ Kutani a vakulu lava makume mabiri ni mune (24) ni mune wa swivumbiwa, vakhisama, kutani vagandrela Xikwembu Nkulukumba lweyi atrhamiki xiluvelweni na afa vaku: Amen! Aleluya!

Nkhuvu wa vukati bya Hambana

⁵ Kutani kuhumi a ritu xiluvelweni ledri afaka driku: Drumisani Xikwembu Nkulukumba weru, hinkwenu lava vamutirelaka, hinkwavu lava vamutxhavaka, ku lavatrongo ni lavakulu!

⁶ Ntrhaku ni yingeli ritu swanga hi ritu dra xitrhungu lexikulu, ni swanga hi ritu dra mati la manyingi, swanga mpfumawulu lowa ntamu ledri afaka driku: Aleluya! Ku fuma i Hosi, Xikwembu Nkulukumba weru wa Ntamu hinkwawu!

⁷ Ahi trhaveni, hi trhavisisa niku munyika kutwala; hikusa kutlhasi nkama wa nkhuvu wa vukati bya Hambana, a mutekiwa wa yone a tibekisile.

⁸ Ahananiwa kuyambala swiyambalu swa line dra kuxonga, dra kubasa ni kuphatima. Hikusa a line dra kuxonga drikombisa a mintiro ya kululama ya tinsasi.

⁹ Kutani a ntrumi yahangaku ku mine: Trala leswi: Kukatekile lava vavitaneliwiki a xilalelo xa nkhuvu wa vukati bya Hambana! Nangweso yiya mahlweni yiku: Lawa i maritu ya xihlayelamfuri ya Xikwembu Nkulukumba.

¹⁰ Kolahu ni wela minengeni ya yone akuva ni yigandrela, kambe yone yiku ku mine: Im'hi! Ungayentxi leswo! Mine ni nandra-kuloni ni wa vamakwenu lava vanga ni vumboni bya Yesu. Gandrela Xikwembu Nkulukumba. Hikuva a vumboni bya Yesu i Moya wa kurera kweru.

Lweyi a khandriyiki hanxi dra vuhluli

¹¹ Kutani ni vona tilo na dripfulekile; kuvoneka a hanxi ledra ntlhohe. Lweyi a drikhandriyiki ahlayiwa Mudumbeki ni waxihlayelamfuri. Atrema, alwa hi kululama.

¹² A mahlu yake ma swanga hi langavi dra ndrilo; anhlokweni yake, kunitingiyana tinyingi. Kutraliwile vito ledri kungeke na mhunu lweyi adritivaka loko ange Yene ntsena.

¹³ Afa ayambali xiyambalu lexi xipetiwiki ngatini; a vito drakwe atxhuliwa: Ritu dra Xikwembu Nkulukumba.

¹⁴ Ni mabutrhu ya le tilweni afa mamulandra na makhandriyi mahanxi lawa ya ntlhohe, mayambali a line ledra kuxonga dra ntlhohe, dra lisima.

¹⁵ Anon'wini wakwe kuhuma tlhari ledra kukariha, akuva ha drone a ba matiko. Ata mafuma hi nhonga ya nhumbu; ata kandretela hi minenge yake, axikhuvutelo xa mihandru ya vinyo ya kulebya ka mahlundru ya Xikwembu Nkulukumba wa ntamu hinkwawu.

¹⁶ A swiyambalwini swake, mbangwini lowu funeketaka nyonga, afa kutraliwi vito ledri: Hosi ya tihosi, ni Mufumi wa vafumi.

¹⁷ Ntrhaku ni voni ntrumi afaka yili Dambyini; yibandlukana hi ritu ledrikulu yiku kutinyanyana hinkwatu leti tihahaka mpfhukeni wa tilo: Tanani halenu! Hlengeletanani ankhubyini wukulu wa Xikwembu Nkulukumba.

¹⁸ Tanani n'wida tinyama ta vafumi, ni tinyama ta maphini, ni tinyama ta lava vantamu; ni tinyama ta mahanxi, ni ta lava vakhandriyiki, ni tinyama ta vhanu hinkwavu vangawa lava ntrhunxekiki, kumbe swikarawa, ta lavatrongo kumbe lavakulu.

¹⁹ Ntrhaku ni voni xihari xa kulebya ni vafumi va misava ni mabutrhu yavu, mahlengeletanile kuyalwa ni lweyi akhandriyiki a hanxi ni mabutrhu yake.

²⁰ Kambe kukhomiwi xihari xa kulebya kun'we ni muprofeta wa madrimi, lweyi hi kuyentxa mahlolana ni swikombiso amahlweni ka yone, akanganyisiki lava vangayamukela xikombiso xa xihari xa kulebya, afaka vakhisamela xifaniso xa xone. A xihari ni muprofeta wa madrimi vatxukumetiwa na vaha hanya ativeni dra ndrilo lowu wupfuraka, wa xivavula.

²¹ Kutani lava vasaliki vadlawi hi lipanga ledri afaka drihuma non'wini wa lweyi akhandriyiki hanxini, kutani tinyanyana hinkwatu ti da tinyama tavu lakakuva tingahatidjuli.