Mpfuletelo 18 - Testamente Ledrimpswha ni Mapsalma

A kuka muti lowukulu

¹ Antrhaku ka swone, ni vona yin'wana ntrumi yi xika hi le tilweni, na yili ni ntamu lowukulu. A misava mivaningiwa hi kuphatima ka yone.

² Yibandlukana hi ritu ledrikulu yiku: Awile, Babilona lwenkulu a weli misaveni! Andruluki vuyaku bya mimoya leminfani, ni vutxhavelo bya mademoni, ni ya tinxaka hinkwatu ta mimoya ya kubiha, ni vutumbelo bya tinyanyana hinkwatu ta kubiha ni kunyenyentsa.

³ Hikusa hinkwawu matiko manwile vinyo dra kulebya ka vumbuye byake. A vafumi va misava va yentxi vumbuye na yene, ni vaxavisi va misava vandruluki vafuyi hi vumbuye byake bya kukala mpimu.

⁴ Nangweso ni yingeli ritu drin'wana dripfa hi le tilweni, driku: Humani amutini lowu vhanu vanga, Hinkwenu humani ku wone akuva n'wingativa ni vuhlengeli aswihonweni swake, nambi kuyamukela swikhatiso swake.

⁵ Hikusa swihono swake switalelanile, Xikwembu Nkulukumba adrimuki vunsulavoya byake.

⁶ Munyikani hikutlheliselisa xileswi an'witlheliselisiki xiswone, Muhakelani hi kuhindra mayelana ni mintiro yake, kuntrheko lowu yene apatrinyetiki swakunwa, patrinyetani hikuhindra n'winyika yene.

⁷ Swanga hi leswi yene ha vuswake ati twalisiki ni kuhanya ku leswi swimunyoxisaka nyameni, muyentxani hi mpimu wa kufana, akuxaniseka ni nkosi, hikusa yene atikutxa aku: ni trhami xiluvelweni swanga mufumi wa xisati, ali ni nsati wa mufelwa, nambi nkosi ningati wu vona!

⁸ Hileswi-ke, hi siku drin'we atayamukela aswikhatiso swake: Kufa, nkosi ni ndlala, kutani ata hisiwa hi ndrilo, hikusa ani ntamu, Hosi Xikwembu Nkulukumba lweyi amuyavanyisiki.

Aswidrilo swa vafumi

⁹ A vafumi va misava lava vangayentxa vumbuye na yene, lava vangahanya ku swakutinyoxisa na yene, vatamudrilela, vatiba swifuva, loko vavona musi wa kupswha kwake.

¹⁰ Na vayimi kule, hi kutxhava kuxaniseka kwake, vataku: Yowee! Yowee! Wene muti lowu wukulu! Wene muti lowu wa ntamu! Hi nkamanyana kutlhasile kuyavanyisiwa kwaku!

¹¹ Na vo vaxavisi va misava vamudrila na vahlunamile, hinkonta yake. Vangaha timu xavela ni kan'we minxaviso yake:

¹² A vaxavisi va gole, ni silivela, ni maribye ya lisima, ni maperola, ni line ledra kuxonga, ni swivunguvungu, ni seda dra libungunyana, ni miri hinkwayu leyi ya kunun'hwela, ni swibya hinkwaswu swa matinyo ya tindlopfu, ni swibya hinkwaswu swa miri leya lisima ledrikulu, ni swa nsuku, ni swa nhumbu, ni swa marimore.

¹³ Kinamomo, kardomomo, ni mafura ya kunu'hwela ni insensa, ni miri ya kunun'hwela leyi mihisiwaka; ni vuvinya ni mafura, ni mapa ya lisima, ni mavele; ni tihomu ni tihamba, ni mahanxi, ni makalitxhi, ni swikarawa, mfuri ni mahika ya vhanu.

¹⁴ A mihandru ya kunavela ka mbilu yaku, yinyamalalile, ni mintxhumu hinkwayu ya kuxonga, mingahati txhuka mikumiwa swimbeni.

¹⁵ A vaxavisi va mintxhumu leyi, lava afaka vatifuyisa ha yone, vatatrhindreka kule, hi kutxhava kuxaniseka. Vata drila na vaba nkosi,

¹⁶ vaku: Yowee! Yowee muti lowukulu, Lowu afaka wu yambala line ledra kuxonga, ni swivunguvungu, ni le swa libungunyana. Afaka wulongi hi gole, ni hi maribye ya lisima, ni maperola.

¹⁷ Kutani ha nkamanyana mun'we ntsena, kuhelisiwi nhlengwe leyi ya kunhati! Na vone vafambisi vatingalawa, ni vayendri vavu, ni vaweti ni lava kumaka aswa vutomi byavu alikhulwini, vatrhindrekeli kule.

¹⁸ Kutani loko va vona musi wakupswha vabandlukana vaku: Hi kwini lomu afaka kuni muti wa ntamu ngopfu wa nga hi lowu?

¹⁹ Afa vatxhela ntrhuri nhlokweni yavu, afa vabandlukana na afa vadrila na vaba nkosi vaku: Yowee! Yowee Ku muti lowukulu, lowu vatifuyisaka hi vukulu bya wone hinkwavu lava afaka vali ni tingalawa likhulwini. Kutani hi kudringani nkama mun'we ntsena, wu nyamalala!

²⁰ Nyoxani, n'wine matilo, na n'wine tinsasi vapostolo ni vaprofeta, hikusa Xikwembu Nkulukumba a wu yavanyiseli tremo drenu.

²¹ Hikolahu a yin'we ntrumi ya ntamu ngopfu yitlakuxi ribye swanga hi ribye dra kusila, yitxukumetela likhulwini, yiku: Switava xileswi hi kulebya ka kufana, loko Babilona a muti lowu kulu, wungahatitlhela wukumiwa!

²² Kunga ha yingeliwi swimbeni a vunanga ndreni kwaku a mpfumawulu wa timbila, ta vayimbi, ni tinanga, ni timhalamhala! Ni mun'we ahataka vona andreni kwaku vatiri va lixaka dra kukari! Ku nga ha yingeliwi ndreni kwaku, kudruma ka kusila ka xigayu swingahati yingeliwa ku wene!

²³ Kunga ha vaningiwi swimbeni ndreni kwaku livaningo dra motre! Nambi kuyingeliwa a ritu dra muteki ni mutekiwa, swingahati yingeliwa ku wene! Hileswaku a vaxavisi vaku afa vali vakulu va misava, hikusa a matiko hinkwawu makanganyisiwile hi vungoma byaku.

²⁴ Ku yene kukumiwa ngati ya vaprofeta, ni tinsasi ni ya hinkwavu lava dlawiki misaveni.