Mpfuletelo 17 - Testamente Ledrimpswha ni Mapsalma

A wansati wa vumbuye ni xihari

¹ Kuta ntrumi yin'we ya le ta ntlhanu na tibiri, leti afaka tini ntlhanu wa mintrheko na yibiri yi vulavula na mine, yiku: Tana ni ta kukomba ayavanyiso dra lweyi wa vumbuye lwenkulu, lweyi atrhamiki kusuhi ni milambu minyingi.

² Lweyi a vafumi va misava vayentxiki vumbuye na yene, lweyi a vayaki va le misaveni vanga popswa hi vhinyo dra vumbuye byake.

³ Kolahu a ntrumi yini yisa huleni hi moya, kutani ni vona lweyi wansati na trhami henhla ka xihari xa kulebya, xa libungu, afa kutraliwi mavito ya swisandro, afa xi na ntlhanu wa tinhloko na tibiri ni khume dra timhondro.

⁴ Lweyi wansati afa yambali nkhantxu wa xivungu-vungu, wa libungu, afa alongi hi gole, ni maribye laya yalisima ni maperola; afa tameli ntrheko wa gole lowu wutaliki hi leswakuyila ni swa nxambya swa vumbuye byake.

⁵ Amombyeni wakwe, afa kutraliwi vito dra xihundla ledraku: BABILONA LWENKULU, A MAMANA WA VA VUMBUYE, NI VHANU HINKWAVU VA VUMBUYE VA MISAVA.

⁶ Kutani nivona lweyi wansati na apopswi hi ngati ya tinsasi ni ngati ya timboni ta Yesu; kutani loko nimuvona, nihlamala ngopfu hi kuhlamala lokukulu.

⁷ A ntrumi yi ni vutisa yiku: Uhlamalela yini xana? Nitakubyela xihundla xa wansati ni xa xihari xa kulebya lexi xingani ntlhanu wa tinhloko na tibiri na khume dra timhondro.

⁸ A xihari xa kulebya lexi uxivoniki afa xihanya, afa xili xone, kambe a hi xone, kutani xitahuma akheleni ledra kuyeta, xiya kusuveni. Lava vayakiki misaveni, lava a mavito yavu manga traliwangakiki abukwini dra vutomi kusukela akutumbulukeni ka misava, loko va xivona vatahlamala, leswi afaka xili xone kutani axehe xone, hanya, kambe xitatlhela xi humelela.

⁹ Laha kuni kuyingelisisa ni vutivi: A tinhloko leti ta ntlhanu na tibiri i ntlhanu wa tinhava na tibiri, leti lweyi wansati atrhamiki henhla ka tone. Nakone, i vafumi lava vantlhanu na vabiri.

¹⁰ A ntlhanu vawile; a mun'we ha fuma, amun'wana angasinatlhasa, ni loko atava atlhasile afanela kutrhama nkamanyana ntsena.

¹¹ A xihari xa kulebya lexi afaka xili xone xingeheke xone, hi yene, mufumi wa vuntlhanu na vuraru, i xiyenge xa lava vantlhanu na vabiri, lweyi ayaka kusuvisiweni.

¹² A timhondro leti ta khume leti utivoniki, i khume dra vafumi lava vangasikina yamukela amfumo, kambe vayamukeli ntamu wa kufuma, kun'we ni xihari xa kulebya, hi nkamanyana wun'we.

¹³ Vone vani miyanakanyu min'we ya kunyika ntamu ni vufumi byavu a xihari xa kulebya.

¹⁴ Vone vata lwa ni Hambana, kambe a Hambana yitavahlula, hikusa i Hosi ya tihosi, ni Mufumi wa vafumi, vatahlula na vone lava vanga na Yene, lava vavitaniwiki, vahlawuliwiki ni lava vadumbekiki.

¹⁵ Kutani a ntrumi yitlhela yiku ku mine: A mati lawa ungamavona, lomu atrhamiki kone wansati wa vumbuye, i vhanu ni matiko, ni switrhungu, ni tindrimi.

¹⁶ A timhondro leta khume leti ungativona, ni xihari, leswo switavenga wansati wa vumbuye, swita muyentxa atekeliwa hinkwaswu, asala nange na ntxhumu mirini; swida nyama yake, swimuhisa hi ndrilo.

¹⁷ Ave Xikwembu Nkulukumba lweyi avanhingenisiki leswi timbilwini tavu, akuva vayentxa a kungu drakwe. Hileswo-ke vata yentxa kun'we hi kutwanana ni kunyika mfumu wavu hinkwawu ku xihari xa kulebya, kukota kuhetiseka maritu ya Xikwembu Nkulukumba.

¹⁸ A wansati lweyi umuvoniki i muti lowu kulu, lowu wufumaka henhla ka vafumi hinkwavu va misava.