Mpfuletelo 16 - Testamente Ledrimpswha ni Mapsalma

A xikhatiso xa mahlundru ya Xikwembu Nkulukumba

¹ Kutani ni yingela ritu ledrikulu dripfa Tempeleni afa driku ku tintrumi ta ntlhanu na tibiri: Fambani n'wiyahalata mintrheko leyi ya ntlhanu na yibiri ya mahlundru ya Xikwembu Nkulukumba misaveni!

² Ka kusuka ntrumi ya kusungula yiya halatela ntrheko wa yone misaveni. Ka kuhumelela swilondra leswi swakubiha, leswimfani, ku vhanu lava vangani xikombiso xa xihari xa kulebya, afaka vakhisamela xifaniso xa xone.

³ A ntrumi ya vubiri ya kuhalatela ntrheko wa yone likhulwini. A mati ya likhulu ma ndruluka swanga hi ngati ya wa kufa; kufa hinkwaswu swihanyaka, afaka swili likhulwini.

⁴ A ntrumi ya vuraru ya kuhalatela ntrheko wa yone minfuleni ni le tinhlobyeni ta mati, ma kundruluka ngati.

⁵ Nakuyingela ntrumi ya mati yiku: Wene ululamile, Wene unga Wene, afaka uli Wene, unga mululami, hikusa utremi mintxhumu leyi hi kululama,

⁶ hikusa vahalati ngati ya valulami ni ya vaprofeta, na wene uvanyiki kunwa ngati, hi leswi swivalulameliki.

⁷ Niyingela ritu dripfa xiluvelweni driku: Kunene, Hosi Xikwembu Nkulukumba wa Ntamu hinkwawu! A tremo draku i dra xihlayelamfuri ni dra kululama.

⁸ A ntrumi ya vumune ya kuhalatela a ntrheko wa yone a Dambyini. Kutani dri nyikiwa ntamu wa kuhisa vhanu hi ndrilo.

⁹ Kutani vhanu va hisiwa hi kuhisa loku kulu, vasandra a vito dra Xikwembu Nkulukumba, lweyi angani ntamu a henhla ka makhombo lawo; kambe avandrulukanga aswihonweni swavu akuva vamunyika lidrumu.

A khombo dra vuntlanu

¹⁰ A ntrumi ya vuntlhanu yi halatela ntrheko wa yone axitrhan'wini xa vufumi bya xihari xa kulebya, kutani mfumu wa xone wu tiyentxa munyama, ni vhanu afa vatiluma tindrimi hi kuvaviseka,

¹¹ Vasandra Xikwembu Nkulukumba wa tilo hinkonta ya kuvaviseka kwavu, ni ka swilondra swavu. Kambe avandrulukanga amintirweni yavu.

A khombo dra vuntlanu na drin'we

¹² A ntrumi ya vuntlhanu na yin'we ya kuhalatela ntrheko wa yone anfuleni lowu wukulu wa Eufrate. Wupswha a mati ya wone ma woma akuva kulungisiwa a ndlela ya vafumi va le Vuxeni.

¹³ Nivona mimoya miraru leminfani, swanga makhele, mihuma non'wini wa dragoni ni le non'wini wa xihari xa kulebya, ni le non'wini wa muprofeta wa madrimi,

¹⁴ hikusa i mimoya ya mademoni, lemiyentxaka swihlamaliso, yone mikongoma ku vafumi va misava hinkwayu, akuva miya vatlhanganisela kulwa hi Siku drikulu dra Xikwembu Nkulukumba wa Ntamu hinkwawu.

¹⁵ Lavisani! Nita swanga hi leswi atisaka xiswone muyivi! Ku katekile lweyi a lavelelaka ni lweyi a bekisaka swiyambalo swake, akuva angafambi na angayambalanga ntxhumu, kutani akhomeka tingana amakari ka van'wana!

¹⁶ Ntrhaku mihlengeletela vafumi a mbangwini lowu hi xiheberu wuhlayiwaka Armagedoni.

A khombo dra vuntlanu na mabiri

¹⁷ A ntrumi ya vuntlhanu na tibiri yi halatela ntrheko wa yone amoyeni, kolahu kuhuma ritu ledrikulu dripfa Temepeleni, a xiluvelweni, driku: Swiyentxekile!

¹⁸ Ka kuva ni kuhatima, ni maritu, ni kudruma ka tilo, ni kutrekatreka loku kulu ka misava, kutrekatreka lokukulu ka kunhati, kakuka kungasina humelela, kusukela loko kutumbuluki mhunu misaveni.

¹⁹ A muti lowukulu wuyavana hi swiyenge swiraru, ni miti yamatiko mi wa. Xikwembu Nkulukumba a drimuka Babilona lwenkulu, akuva avanyika ntrheko wa vinyo dra mahlundru ya kulebya kwake.

²⁰ A swihlale hinkwaswu swinyamalala, ni tinhava ati kumiwanga.

²¹ A maralana lamakulu maxika ahenhla ka vhanu mapfa tilweni, ni maribye ya kone a mpimu wa wone afa matlula mune wa makume ya makilu. A vhanu vasandra Xikwembu Nkulukumba hinkonta ya khombo dra mpfula ya maralala hikuva afaka ali yikulu ngopfu.