Mpfuletelo 15 - Testamente Ledrimpswha ni Mapsalma

A swikhatiso swa vugamu

¹ A ntrhaku ka leswo ni vona xin'wana xikombiso lexikulu xa kuhlamalisa tilweni: ntlhanu wa tintrumi na tibiri leti afaka tilini ntlhanu wa makhombo na mabiri ya vugamu, hikusa ku wone kuhetiseka a mahlundru ya Xikwembu Nkulukumba.

² Nivona ni xanga hi likhulu dra xivonivoni xipatraniki ni ndrilo, na kone lava vahumiki na vahlulile xihari xa kulebya ni xifaniso xa xone, ni xikombiso xa xone, ni nhlayu ya vito dra xone, lava afaka vali kusuhi ni likhulu dra xivonivoni na vatameli switrendre swa Xikwembu Nkulukumba.

³ Afa vayimbelela lisimu dra Moxe, nandra wa Xikwembu Nkulukumba, ni lisimu dra Hambana vaku: I mikulu, mahlamalisa, a mintiro yaku! Hosi Xikwembu Nkulukumba xa ntamu hinkwawu, tilulamile i tinene, a tindlela taku! Wene Mufumi wa matiko!

⁴ Hi mani lweyi angatiki kutxhava we Hosi? Lweyi angatiki hlaya a vukulu bya vito draku? Hikusa wene ntsena lweyi wa kuxwenga; Hiswoswo amatiko hinkwawu matata, makhisama amahlweni kwaku, hikusa a kuyavanyisa kwaku kavonekisiwa.

⁵ Ntrhaku ka swone, ni lavisa ni vona a Tempele dra ntronga wa vumboni wupfuleka le tilweni.

⁶ Kutani a ntlhanu wa tintrumi na tibiri leti afaka tili ni tlhanu wa makhombo na mabiri, tihuma a Tempeleni. Afa tiyambali line ledra kubasa, dra kuphatima, ti titikhami swifuveni hi mabandi ya gole.

⁷ A xin'we ku swivumbiwa leswa mune swakuhanya, xinyika tintrumi ta ntlhanu na tibiri, a swinwelo swa ntlhanu na swibiri swa gole, leswi taliki hi mahlundru ya Xikwembu Nkulukumba, lweyi a hanyaka hi masiku ni masiku.

⁸ A Tempele dritala hi musi wa kuphatima ka Xikwembu Nkulukumba ni le ntan'wini wakwe; kambe afa kunge na wa kuswikota kunhingena a Tempeleni dra Xikwembu Nkulukumba, nakunga sina hetiseka mahlomulo lawa ya ntlhanu na mabiri lawa ma buyisiwaka hi ntlhanu wa tintrumi na tibiri.