Mpfuletelo 14 - Testamente Ledrimpswha ni Mapsalma

A Hambana ni vahlampswiwa va yone a nhaveni ya Sion

¹ Ntrhaku ni lavisa, kutani kuvoneka Hambana yi yimi Nhaveni ya Siyoni, Kun'we na yone afa ku ni khume dra madzana ya madzana na mune wa madzana ya madzana na mune wa makume ya madzana ya vhanu (144.000), lava a mimombyeni yavu afaka kutraliwi vito dra Hambana ni dra Tatana wa yone.

² Niyingela ni ritu ledri humaka tilweni swanga ritu dra mati manyingi, swanga ritu dra mpfumawulu wa kudruma ka tilo; kambe niyingela ni ritu dra vayimbi va switrendre, lava afaka vatxhaya switrendre swavu.

³ Afa vayimbelela lisimu ledrimpswha, amahlweni ka xiluvelo, amahlweni ka mune wa swivumbiwa swakuhanya ni le ku vakulu, akunge na mhunu lweyi angakotaka kudondra lisimu ledrimpswha loko ange lava vakhume dra madzana na mune wa madzana ya madzana na mune wa makume ya madzana (144.000), vaxaviwiki misaveni.

⁴ Volavo hi lava vangatihonangakiki hi vavasati, vangasiki yetlela ni vavasati. Lava hi vone valandraka Hambana hinkwaku lomu yi yaka kone. Hi lava vaxaviwiki a makari ka vhanu akuva swiva swirangana swihumexeliwaka Xikwembu Nkulukumba ni ku Hambana.

⁵ Akukumiwanga madrimi a milon'wini yavu. Hikusa avatihonanga.

A ritu dra tintrumi tiraru

⁶ Ntrhaku ni voni yin'wana ntrumi yi hahaka makari ka tilo, afa yili ni Ivangeli leyi yingahelikiki, akuva yi drungulela lava yakiki misaveni, ku hinkwawu matiko, ni tinxaka ta vhanu, ni tindrimi.

⁷ Yiku hi ritu drikulu: Txhavani Xikwembu Nkulukumba, n'wimutwalisa, hikusa kutlhasi nkama wakwe wa kuyavanyisa! Khinsamelani lweyi ayentxiki tilo ni misava, ni likhulu, ni tinhlovo ta mati.

A ritu dravubiri

⁸ Kulandrela yin'wana ntrumi, ya vubiri leyi afaka yiku: A wile, a wile, Babilona lwenkulu! Lweyi anwisiki matiko hinkwawu hi vhinyo dra kulebya ka vumbuye byake!

A ritu dravuraru

⁹ A ntrumi ya vuraru yilandrela hi ritu ledrikulu yiku: Lweyi akhinsamelaka xihari ni xifaniso xa xone, ayamukela ni xikombiso a mombyeni wakwe kumbe vokweni drakwe,

¹⁰ na yene atanwa swavhinyo dra mahlundru ya Xikwembu Nkulukumba, ledritxhululiwiki na dringa patrinyetiwanga antrhekweni wa mahlundru yake, yelweyo ata xanisiwa andrilweni, ni hi xivavula, amahlweni ka tintrumi ta kuxwenga, ni le mahlweni ka Hambana.

¹¹ A musi wa kuxanisa kwake wuta mpukuka hi laha kungahelikiki; kutani avana kuwisa, nambi ali nhlikanhi kumbe ni vusiku, lava khisamelaka a xihari xa kulebya ni xifaniso xa xone, nambi ni lava vayamukelaka xikombiso xa vito dra xone.

¹² Hi loku kukone kutiyisela ka tinsasi, vanga lava vabekisaka swileleto swa Xikwembu Nkulukumba ni kupfumela ku Yesu.

¹³ Kutani ni yingela ritu dripfa tilweni na driku: Trala leswi: Kukateke vafi lava kusukela swoswi vafelaka Hosini! Ahina, kuhlaya Moya, akuva vata wisa mintirweni ya yavu, hikuva mintiro yavu mitavalandra.

Akutrhoveliwa ka misava

¹⁴ Kolahu ni lavisa, kuvoneka tlavi ledra ntlhohe, ni lweyi afaka trhami henhla katlavi, afana ni n'wana wa mhunu, afaka ali ni ngiyana ya gole anhlokweni yake, ni sikela ledra kukariha avokweni drakwe.

¹⁵ A yin'wana ntrumi yihuma Tempeleni, yibandlukana hi ritu ledrikulu kulweyo atrhamiki henhla ka tlavi, yiku: Teka sikela draku utrhovela, hikusa nkama wu tlhasile, wa kutrhovela, hikusa a ntrhovelo wa misava wu wupfule.

¹⁶ Ntrhaku lweyi faka a trhami henhla ka tlavi, atxukumetela sikela drakwe a misaveni, a misava mitrhoveliwa.

¹⁷ Kutani kuhumi ntrumi yin'wana hi Tempeleni ledringa tilweni, afaka na yone yili ni sikela ledra kulotiwa.

¹⁸ Kutani yin'wana ntrumi yisuka a xiluvelweni, leyi afaka yili ni ntamu henhla ka ndrilo, yihuwelela hi ritu ledrikulu ku leyi afaka yi ni sikela ledra kukariha yiku: Tirisa sikela draku, utrema swipha swa nsinya wa nvhinya amisaveni, hikusa mihandru ya wone mi wupfile!

¹⁹ A ntrumi yitxukumetela sikela dra yone a misaveni, yikhaya mihandru ya nsinya wa nvhinya a misaveni, yi mitxukumetela xikhuvutelweni lexikulu xa mahlundru ya Xikwembu Nkulukumba.

²⁰ Axikhuvutelo xipshandlasiwa hi minenge a handle ka muti. Kuhuma ngati a xikhuvutelo hi mpfhuka wa nomu wa hanxi wa madzana mararu ya makilometro hi kuyeta.