Mpfuletelo 13 - Testamente Ledrimpswha ni Mapsalma

A swihari swibiri

¹ Ntrhaku ni vona xihari xa kulebya, lexi afaka xihuma likhulwini. Xi na khume dra timhondro, na ntlhanu wa tinhloko na tibiri. A timhondrweni ta xone kuna khume dra tingiyana; ni le tinhlokweni ta xone ku traliwi mavito ya kusandra.

² A xihari lexi xakulebya, ninga xivona afa xifana ni yingwe, a minenge ya xone ya nga ya bere(urso), ni nomu wa xone wa nga nomu wa ndrawu. A dragoni drixinyika ntamu wadrone, ni xiluvelo xadrone, ni vuhosi lebyikulu.

³ Kutani, ni vona yin'we kutinhloko ta xone swanga hi loko yitlaviwela kufa, kambe a mbanga ya lifu dra xone afa yi holisiwile. Kutani misava hinkwayu afa milandra xihari lexi na mixihlamala.

⁴ Kutani vagandrela dragoni hileswi anyikiki xihari xakulebya a vuhosi; afa vakhisamela xihari xa kulebya, vaku: Hi mani lweyi angani ntamu lowu fanaka ni wa xihari xa kulebya. Hi mani lweyi atakaswikotaka kulwa na xone xana?

⁵ Kutani vaxinyika nomu waku khanela mintxhumu ya swisandru, vaxinyiki ntamu wa kuva xitira ha mune wa makume ya tihweti na tibiri.

⁶ Xipfula nomu kusandra Xikwembu Nkulukumba, vito drakwe ni Tende drakwe ni lava yakiki tilweni.

⁷ Nakone xinyikiwa ntamu wa kulwa ni valulami, ni kuvahlula. Xinyikiwi mfuri ni kufuma henhla ka tinxaka hinkwatu ta vhanu, ni tindrimi, ni matiko.

⁸ Vata xigandrela hinkwavu lavayakiki misaveni, lava mavito yavu mangatraliwangakiki abukwini dra vutomi, ledringa dra Hambana leyinga dlawa kehe kusunguleni ka misava.

⁹ Lweyi angani tindleve ayingiseti

¹⁰ Lweyi ayisaka van'wana bohelweni, ataya bohelweni. Lweyi atakadlaya hi lipanga, swadjuleka adlayiwa hi lipanga. Hiwolowu nkama wa kutiyisela ni wa kupfumela ka tinsasi.

¹¹ Ntrhaku nivoni xin'wana xihari xakulebya xitlhantuka misaveni, afa xi ni timhondro tibiri swanga timhondro ta mhongo ya hamba, afa xivulavula swanga hi dragoni.

¹² Xone xitira hi ntamu hinkwawu wa xihari xakulebya xa kusungula amahlweni ka xone, xisindrisa leswaku misava ni lava vayakiki ku yone vakhisamela xihari xa kulebya xa kusungula, lexi afaka a mbanga ya xone ya kuyisa kufeni yinga holisiwa.

¹³ Na xone xiyentxa swikombiso swikulu, na swone xiyentxa ni leswaku nambi ndrilo wa le tilweni wuxikela amisaveni, amahlweni ka vhanu.

¹⁴ Xikanganyisa lava yakiki misaveni hinkonta ya swikombiso leswi xinyikiwiki kuswitira mahlweni ka xihari xa kulebya, xibyela vayaki va misava yentxa xifaniso xa xihari xa kulebya lexi xinga tlhabyiwa hi tlhari, kutani xihanyiki.

¹⁵ Xinyikiwi ntamu wa kunyika kuhefemula ku xifaniso xa xihari xa kulebya, akuva na xone xifaniso xa xihari xakulebya xikota kuvulavula, ni kuva xiyentxa leswaku kudlayiwa hinkwavu lava vanga gandrelangakiki a xifaniso xa xihari xa kulebya.

¹⁶ Xiyentxa leswaku hinkwavu vhanu lavakulu ni lavatrongo, vafuyi ni swisiwana, vantrhunxeki ni switiri, vabekiwa xikombiso a vokweni dra xinene, kumbe mimombyeni yavu.

¹⁷ Akuva kungavi na mhunu lweyi akotaka kuxava ni kuxavisa, loko ange lweyi angani xikombiso, kumbe vito dra xihari xa kulebya, kumbe a nhlayo ya vito dra xone.

¹⁸ Lani kuni vutivi. Lweyi atlharihiki apimise nhlayu ya xihari xa kulebya, hikusa i nhlayu ya mhunu; Kutani a nhlayu ya xone i ntlhanu wa madzana na drin'we na ntlhanu wa makume na drin'we na ntlhanu na yin'we (666).