Mpfuletelo 10 - Testamente Ledrimpswha ni Mapsalma

A xibukwana

¹ Nivoni ntrumi yin'wana ya ntamu na yixika hi le tilweni, yiyambali tlavi; ahenhla ka nhloko ya yone afa kuni nkwangulatilo, a vuso bya yone byifana ni dambu, ni minenge ya yone swanga timhandre ta ndrilo;

² avokweni afa yini xibukwana lexi xipfuliwiki. Kutani yibeka a nenge wa yone wa xinene alikhulwini, ni lowu wa ximantrhi amisaveni,

³ yibandlukana hi ritu drikulu swanga hi kubonga ka ndrawu. Loko yibandlukanile, a kudruma ka tilo ka ntlhanu na kubiri kukhanela a maritu ya kone.

⁴ Kutani loko a kudruma ka tilo loko ka ntlhanu na kubiri kuvulavulile, afa nidjula a kutrala, kambe niyingela a ritu dripfaka hi le tilweni, driku: Funga axihundleni leswi swihlayiwiki hi kudruma ka tilo loku ka ntlhanu na kubiri, mfuri ungaswitrali!

⁵ Kutani a ntrumi leyi afaka niyivoni na yiyimi henhla ka likhulu ni ka misava, yitlakuxela tilweni a voko dra yone dra xinene,

⁶ yifunga hi lweyi ahanyaka hi madzana ni madzana ya malembe, lweyi angatumbuluxa a tilo ni leswi swinga ku drone; misava ni leswi swinga ku yone, ni likhulu ni leswi swinga ku drone, yiku: Akahana nkama;

⁷ kambe amasikwini ya ntrumi ya vuntlhanu na tibiri, loko yitayimba a nanga, kutahetiseka a xihundla xa Xikwembu Nkulukumba, swanga hi leswi yene ativisiki ku malandra yake, a vaprofeta.

⁸ Kutani a ritu ledri ningadriyingela dripfa tilweni, dritlhela drivulavula na mine, driku: Famba uyateka a buku ledri dripfuliwiki, dringa vokweni dra ntrumi leyi yiyimiki ahenhla ka likhulu ni le henhla ka misava.

⁹ Niyiki ku ntrumi, niyayibyela leswaku yininyika a xibukwana. Kutani a ntrumi yiku ku mine: Teka, uximita. Xitabavisa a xidelo xaku, kambe anon'wini xitatrokotrela swanga vulombe bya tinyoxi.

¹⁰ Kutani niteki a xibukwana avokweni dra ntrumi, niximita; afa xitrokotrela anon'wini wanga swanga vulombe bya tinyoxi, kambe loko niximitile, a xidelo xanga xindruluki xibava.

¹¹ Kolahu nibyeliwa leswi: Kudjuleka leswaku utlhela uprofeta mayelano ni vhanu va-Matiko, ni tindrimi, ni vafumi vanyingi.