Mintiro Ya Vapostola 9 - Testamente Ledrimpswha ni Mapsalma

Kuhundruka ka Saulo

¹ Na Saulo aha hisekela kuxanisa ni kudlaya vadondrisiwa va Hosi, aya ku muprista lwe nkulu,

² amukombela mapapela ya kuya Damaseka, amasinagogeni ya kone akuva loko akuma van'wana lava valandraka ndlela ya Hosi a vavanuna ni vavasati, avayisa Yerusalema na vabohiwile.

³ Aku na afamba, atrhindrekela Damaseka, kutxhuka kuvaninga loku kupfaka tilweni kumutrandrela makari;

⁴ awa hansi kutani ayingela ritu ledri driliki: Saulo, Saulo, xana unixanisela yini?

⁵ Kutani yene avutisa aku: U mani Hosi? A Hosi yimuyangula yiku: Hi mine Yesu, lweyi wene umuxanisaka!

⁶ Pfuka, unhingena mutini; lomu utakabyeliwa leswi ufanelaka kuswiyentxa.

⁷ Lava afaka vayendra na yene vayima hi tlhelo na vatremeki minhlana, hikusa afa vayingeli ritu na vangavoni mhunu.

⁸ Kutani Saulo apfuka ahansi; loku apfula mahlu, angahavoni ntxhumu. Vahangamukhoma hi voko, vamunhingenisa Damaseka.

⁹ Ava kone hi masiku mararu na angavoni, angadi, ni kunwa ntxhumu.

¹⁰ Afa kulini mudondrisiwa le Damaseka, a vito drakwe ali Ananiya, a Hosi yimubyela hi noro yiku: Ananiya! Yene ayangula aku: Hi mine lweyi, Hosi.

¹¹ Kutani a Hosi yimuleleta yiku: Pfuka uya Ruweni dra Kululama, uyadjula, a kaya ka Yuda, a wanuna wa le Tarso lweyi valiki i Saulo, Iweyi akhongotaka;

¹² mfuri avoniki xivonisweni, a wanuna lweyi valiki i Ananiya, anhingeniki amuntlhanteka mavoko, akuva atlhela avona.

¹³ Ananiya ayangula aku: Hosi, niyingeli hi vhanu vanyingi a mhaka ya wanuna lweyo, ni hinkwabyu wubihi lebyi abyiyentxiki ku vahlawuleki vaku a Yerusalema.

¹⁴ Ni kola ani ntamu, lowu anyikiwiki hi vaprista lava vakulu, wa kutata boha hinkwavu lava vakhongotaka a vito draku.

¹⁵ Kambe Hosi yiku ku Ananiya: Famba, hikusa yelweyo, ku mine i xibya xa kuhlawuliwa, xitakatwalisa a vito dranga amahlweni ka va-Matiko, ni ka vafumi, ni ka vana va Israyele.

¹⁶ Hikusa nitamukomba mahlomulu hinkwawu atakafanela kumayingela hinkonta ya vito dranga.

¹⁷ Ananiya afamba, aya kaya ka Yuda, ayantlhanteka mavoko ku Saulo, aku ku yene: Saulo makweru, Hosi Yesu, lweyi atikombisiki ku wene andleleni, anirumi ku wene akuva utlhela uvona, ni kuva utala hi Moya wa Kuxwenga.

¹⁸ Hi nomu-lo kuwi mahlweni ya Saulo leswi swifanaka ni mayaya, atlhela avona. Kutani asekeleki aya babatisiwa.

¹⁹ Ntrhaku ka kuda, akumi ntamu. Atrhamisa ni vadondrisiwa, masiku ya kuhlawa le Damaseka.

²⁰ Kolahu asunguli kudondrisa amasinagogeni, ahlaya leswaku Yesu i N'wana wa Xikwembu Nkulukumba.

²¹ Hinkwavu lava vayingeliki Saulo afa vahlamala na vavutisana vaku: Xana yelweyi ahi yene lweyi afaka axanisa a Yerusalema lava afaka vakhongota a vito dra Yesu xana? Na swone afa atile halenu akuva avakhoma, ni kuvayisa ku vaprista lava vakulu

²² Kambe Saulo afa akhinyela na ayengeteleka ntamu, akaneta va-Yuda lava afaka vatrhama Damaseka, na avakholwisa leswaku Yesu i Kriste.

²³ Ntrhaku ka masiku ya kuhlawa a va-Yuda vahlengeletana, vakhanela rengu dra kudlaya Saulo.

²⁴ Kambe a rengu dravu dritibyiwa hi Saulo. A va-Yuda vone afa valavisela tinyangwa ta muti, a vusiku ni nhlikanhi, akuva vamudlaya.

²⁵ Kambe a vadondrisiwa vakwe vamuteka vusikwini, vamunhingenisa a xihundrwini, vamuxikisa hi ntrhaku ka khumbi dra muti.

Saulo a Yerusalema

²⁶ Loko Saulo, atlhasi a Yerusalema, adjuli kutitlhanganisa ni vadondrisiwa, kambe hinkwavu afa vamutxhava hikusa afa vangakholwi leswaku na yene angava mudondrisiwa.

²⁷ Kambe Barnabasi amutekiki amuyisa ku vapostola, avatlhavukanyisa hi laha Saulo avoniki Hosi andleleni ni leswi a Hosi yimubyeliki swone, ni laha adondrisiki hi kutiya le Damaseka hi vito dra Yesu.

²⁸ Ntrhaku ka leswi, Saulo atrhamisa navu, anhingena ni kuhuma a Yerusalema, adondrisa hi kutiya hi vito dra Yesu.

²⁹ Na swone afa akhanela ni kukanetana ni va-Helenista; kambe volava vadringisa kumudlaya.

³⁰ Loko a vadondrisiwa vaswiyingela, vafulameta Saulo a Khezareya, vamurumela a Tarso.

³¹ A Kereke afa drini kurula atikweni hinkwadru dra Yudeya, Galileya ni Samariya, driyakisiwa ni kufamba kutxhaveni ka Hosi; na swone afa driyandra hi kupfuniwa hi Moya wa Kuxwenga.

Kuhanyisiwa ka Eneya

³² Petrosi afa afamba-famba matlhelo hinkwawu, na kone afulamela ni le kuvahlawuliwa lava vayakiki a Lida.

³³ Akumi kone wanuna atxhuliwaka Eneya, lweyi afaka ayetleli vunanwini malembe ya ntlhanu na mararu, awonyani swiro.

³⁴ Petrosi aku ku yene: Eneya, Yesu Kriste awakuholisa. Sekeleka utikhondlela vunanu byaku. Kolahu, yene asekeleka.

³⁵ Hinkwavu vayaki va Lida ni va Saroni vamuvona kutani vandruluka, vapfumela ku Hosi.

Akupfuxiwa kufeni ka Dorkasi

³⁶ A mutini wa Yopa, afa kuni mudondrisiwa wa wansati, a vito drakwe hi Tavita, hi Xigirika swihlayaka Dorkasi, Mhunti. Yene afa atali hi mintiro leminene ni kupfuna swisiwana.

³⁷ Amasikwini lawo Dorkasi asungula hi mavabye ya xinyonga, afa. Ntrhaku ka kumunhlampswa, vamubeka andlwini ya le henhla.

³⁸ A muti wa Lida afa wuli kusuhi na Yopa; a vadondrisiwa vatwiki leswaku Petrosi akone kole Lida, vahangaruma vavanuna vabiri ku yene, vamukhongota vaku: Ungahlweli kuta ku hine.

³⁹ Petrosi afamba navu. Loko atlhasile, vamuntlhantukelisa andlwini ya le henhla. A vavasati va mafelwa hinkwavu vatrandrela Petrosi, na vadrila, vamukomba minkhantxu ni swiyambalu swin'wana leswi swihambiwiki ha Dorkasi.

⁴⁰ Kambe Petrosi, loko avahumexile hinkwavu, akhisama, akhongota. Kutani arendreleka alavisa ntrumbu aku: Tavita, pfuka! Yene apfula mahlu, avona Petrosi, atrhamisa.

⁴¹ Petrosi amukhoma hi voko, amusekelekisa; ntrhaku avitana vahlawuliwa ni vavasati lava va mafelwa, kutani avakombisa yene na ahanya.

⁴² Leswi switibyiwa hi muti hinkwawu wa Yopa, kutani vanyingi vapfumela ku Hosi.

⁴³ Petrosi, atrhami masiku ya kutalanyana a Yopa a kaya ka Simoni, mufuki wa swikhumba.