Mintiro Ya Vapostola 8 - Testamente Ledrimpswha ni Mapsalma

Kuxanisiwa ka kusungula ka Kereke

¹ Saulo yene afa apfumela kudlawa ka Stefano. Asikwini ledro kahumeleli kuxaniseka kukulu ka Kereke a Yerusalema; hinkwavu, handle ka vapostola, vahangalasiwa hi matiko ya Yudeya na Samariya.

² A vavanuna lava vatxhavaka Xikwembu Nkulukumba, valahla Stefano, vamudrilela nkosi wukulu.

³ Kambe Saulo afa ahlasela Kereke, hi kunhingena ndlwini yin'wana ni yin'wana, aya kokovisa vavanuna ni vavasati, ava nyiketa ku bohiweni.

Filipi ahaxa a Ivangeli le Samariya

⁴ Hileswo-ke, lava vahangalasiwiki afa vafamba hi matiko, vahlaya a Ivangeli.

⁵ Filipi, yene, afulamela mutini wa Samariya, arera kone hita Kriste.

⁶ Ni switrhungu swikhinyela hi mbilu yin'we kuyingela leswi swihlayiwaka ha Filipi, ni kuvona a mahlolana lawa yene afaka amayentxa.

⁷ Hikusa a mimoya ya xambya leyi afaka mikhomi vanyingi, afa mihuma hi kuhuwelela hi ritu ledri drikulu; ni lava vanyingi va kuwonyana swiro ni va kukhuta afa vahanyisiwa.

⁸ Kavi ni kutrhava kukulu amutini wolowo.

⁹ Kambe afa kuni wanuna lweyi valiki i Simoni, lweyi afaka ali mungoma, ni kuhlamalisa a tiko dra Samariya, ali kari atihlaya mhunu nkulu.

¹⁰ Hinkwavu afa vanamarela ku yene, kusungula hi lweyi ntrongo kutlhasa ku lwenkulu, vaku: Yelweyi, i ntamu wa Xikwembu Nkulukumba, wuhlayiwaka Ntamu lowu wukulu!

¹¹ Afa vanamarela ku yene hi leswi afaka avahlamalisile hi nkama wa kuleha hi mahlolana yake.

¹² Kambe ku ti loko vapfumeli ku Filipi, lweyi afaka ativisa Ivangeli ya Mfumu wa Xikwembu Nkulukumba ni vito dra Yesu Kriste, vababatisiwa, vavanuna ni vavasati.

¹³ Mfuri na yene Simoni apfumela; ni loko ababatisiwile, anamarela Filipi; na ahlamala ngopfu hi kuvona swikombiso ni mintamu leyi mikulu, leswi afaka swiyentxiwa.

¹⁴ Loko a vapostola lava afaka vali Yerusalema vayingela leswaku a tiko dra Samariya driyamukeli ritu dra Xikwembu Nkulukumba, varumela kone Petrosi na Yohana,

¹⁵ lava loko vatlhasile, vavakhongoteliki akuva vanyikiwa a Moya wa Kuxwenga,

¹⁶ hikuva afaka wungasinaxikela ni mun'we ku vone; afa vababatisiwa ntsena, avitweni dra Hosi Yesu.

¹⁷ Kolanu-ke vavantlhanteka mavoko, kutani vayamukela Moya wa Kuxwenga.

¹⁸ Kambe Simoni atiki avona leswaku a Moya wa Kuxwenga wu nyikiwa hi kuntlhantekiwa ka mavoko ya vapostola, avanyika mali,

¹⁹ aku: Ninyikani na mine a ntamu wolowu, akuva lweyi nitakamuntlhanteka mavoko, anyikiwa Moya wa Kuxwenga.

²⁰ Petrosi aku ku yene: A mali yaku ayisuve kun'we na wene, leswi upimisiki kuxava a nyiko ya Xikwembu Nkulukumba hi mali.

²¹ Wene awuna mfanelo ya kuwuyamukela, hikusa amahlweni ka Xikwembu Nkulukumba a mbilu yaku ayilulamanga.

²² Ndruluka, avubihini byaku, ukhongota ku Hosi, kumbe xana utadrivaleliwa, akuyanakanyeni loku ka mbilu yaku.

²³ Hikusa ni kuvona uli nyongweni ya kubava ni le mapindreni ya vudohi.

²⁴ Simoni ayangula aku: Nikhongotelani n'wine ku Hosi, kungatita henhla kwanga ni xin'we xa leswi n'wihlayiki swone.

²⁵ Vone-ke vatiki vahamba vumboni ni kuhlaya ritu dra Hosi, vatlhelela Yerusalema, na varera Ivangeli a mitanini minyingi ya Samariya.

Filipi ni ndruna ya Etiopiya

²⁶ Siku drin'wana a ntrumi ya Hosi yibyeli Filipi yiku: Pfuka ufamba uya nyingitimu, hi ndlela leyi yifulamelaka, yipfaka Yerusalema yiya Gaza.

²⁷ Ahangapfuka afamba. Kutani avona wanuna wa Etiopiya, angamutrheniwa ni ndruna ya Kandake, a nkosikazi ya va-Etiopiya, lweyi afaka abekiwi a henhla ka nhlengwe yake hinkwayu: afa ateli kutatagandrela a Yerusalema.

²⁸ Afa amuka, atrhamisi kalitxhini drakwe, ahlaya buku dra muprofeta Ezaya.

²⁹ Kolahu a Moya wubyela Filipi: Trhindrekela kusuhi ni kalitxhi ledriya.

³⁰ Filipi atrutruma, amuyingela na ahlaya a buku dra muprofeta Ezaya, kutani amuvutisa aku: Xana waswiyingelisisa leswi uswihlayaka xana?

³¹ Amuyangula aku: Xana nitaswiyingelisisa ku yini na kungena lweyi anitlhamuxelaka? Kutani akombela Filipi leswaku akhandriya, atatrhamisa na yene.

³² A xiyenge xa Matralwa lexi afaka ahlaya xone hi lexi: Ayisiwi kutlhabyiweni swanga hi hamba; mfuri swanga hi xihambana lexi miyelaka amahlweni ka mutremeti wa xone; na yene angapfulanga nomu.

³³ Akutitrongahateni kwake ayaleliwi kuyavanyisiwa. Himani lweyi atakahlaya a lixaka drakwe? Hikuva a vutomi byake byisusiwile amisaveni.

³⁴ A ndruna ya Etiopiya yiyangula Filipi yiku: Nakukombela, nibyeli: xana a muprofeta ahlaya leswo ha mani? Atihlaya yene, kumbe ahlaya mun'wana xana?

³⁵ Kolahu-ke Filipi amutlhamuxela; mfuri kusukela ku xiyenge lexo xa Matralwa, amudondrisa hi ta Yesu.

³⁶ Vaku na vafamba hi ndlela, vatlhasa lomu kungani mati, a ndruna yiku: Hi lawa mati! Xana kuni xa ntxhumu xingasivelaka leswaku nibabatisiwa? [

³⁷ Filipi aku: Loko upfumela hi mbilu yaku hinkwayu, akuna lexi xingasivelaka. Yene aku: Napfumela leswaku Yesu Kriste i N'wana wa Xikwembu Nkulukumba.]

³⁸ Kutani aleleta akuva a kalitxhi driyima, vaxikela matini hi vubiri byavu, kutani Filipi amubabatisa.

³⁹ Kuti loko vantlhantuka vahuma matini, a Moya wa Hosi wuwutla Filipi; kutani ndruna ayahamuvonanga, kambe yiya mahlweni andleleni ya yone, na yitali hi kutrhava.

⁴⁰ Kambe Filipi atikuma na ali mutini wa Azoto; kutani atremakanya tiko, adondrisa Ivangeli miti hinkwayu, akondra atlhasa le Khezareya.