Mintiro Ya Vapostola 5 - Testamente Ledrimpswha ni Mapsalma

Ananiya na Safira

¹ Kambe mun'we wanuna, a vito drakwe afaka ali Ananiya, ni nkatakwe Safira, axavisi nsimu,

² kambe ayingelana ni nsati wakwe, atipambulela xiyenge xa swa nxavu axihundleni, abuyisa a ntrengo lowu wusaliki, atatawubeka aminengeni ya vapostola.

³ Kolahu-ke Petrosi aku: Ananiya, xana Sathana atatisi kuyini a mbilu yaku akuva uhembela Moya wa Kuxwenga, ni kutipambulela a ntrengo wa nsimu, xana?

⁴ Loko afa utibekiseli a nsimu, ayingativa yaku, xana? Ni loko yixavisiwile, xana a mali afa yinge yaku xana? Xana ubekisi kuyini amhaka leyi ambilwini yaku? Awuhembelanga vhanu, kambe uhembeli Xikwembu Nkulukumba!

⁵ Loko Ananiya, ayingela maritu lawo, awa, anhlala, afa. Kahangavani kutxhava kukulu ku vayingeli hinkwavu.

⁶ Vasekelekiki kolahu a vayisanyana, vamutrondriyela hi makapulana, vamutlakula, vayamulahla.

⁷ Ka ti loko kuhundri xipimu xa minkama miraru (3h00), a nsati wakwe anhingena na angativanga leswi swihumeleliki.

⁸ Petrosi amuvutisa aku: Nibyele! Hiwolo ntrengo n'wixavisiki nsimu hawone xana? Yene ayangula aku: Im'na, hi wone.

⁹ Petrosi aku ku yene: Xana n'wiyingelanisi kuyini, akuva n'widringa Moya wa Hosi xana? Vona a minenge ya valahli va nuna waku mi le nyangweni, vatakuhumexa na wene.

¹⁰ Hi nomu-lo, awa aminengeni ya Petrosi, anhlala, afa. Vahanganhingena vayisanyana, vamukuma na afile, vamutlakula, vamulahla kusuhi ni nkatakwe.

¹¹ Kutani a ntxhavu wukulu wuva kone ku Kereke hinkwadru ni le ku hinkwavu lava vayingeliki leswo.

Swikombiso ni mahlolana

¹² Afa kuyentxiwa swikombiso ni mahlolana manyingi hi mavoko ya vapostola amakari ka vhanu. A vapfumeli hinkwavu afa vatrhama vali mbilu yin'we, afa vatlhangana a Ligumbeni dra Salomoni;

¹³ afa kungena mun'we wa vambeni lweyi atiyaka kunamarela ku vone, kambe a vhanu hinkwavu afa vavakhensa ngopfu.

¹⁴ Nakone, afa kuyengeseliwa a ntrhungu wa vapfumeli ku Hosi, vavanuna ni vavasati,

¹⁵ lani kakuva vabuyisa timbabyi atindleleni, vatibeka atinkukwini ni le vunanwini, akuva, loko Petrosi akhaluta, a ntrhuti wakwe wutafukumeta van'we ku vone.

¹⁶ Kambe a vunyingi bya vayaki va le mitini leyi mivundramaniki na Yerusalema afa vatrutrumela kone, na vabuyisa timbabyi ni lava vaxanisiwaka hi mimoya ya xambya; hinkwavu afa vaholisiwa.

Kuxanisiwa ka vapostola

¹⁷ Kolahu a muprista lwenkulu, kun'we ni hinkwavu lava afaka vali na yene, va ntlawa wa vasaduki, vapfuka na vatali hi mona,

¹⁸ vakhoma vapostola vavanhingenisa abohelweni dra tiko.

¹⁹ Kambe avusikwini a ntrumi ya Hosi yipfula swipfalu swa bohelo, yivafambisa handle, yiku:

²⁰ Fambani n'wiyayima a Tempeleni, n'widondrisa a tiko a maritu hinkwawu ya vutomi lebyi.

²¹ Vaswiyingeliki, vahangavindruka, vayanhingena a Tempeleni, vadondrisa. Kambe a muprista lwenkulu kun'we ni lava avali na yene, vaku vatlhasa, vahlengeleta huvu ni vakulu hinkwavu va vana va Israyele, varuma vhanu abohelwini kuya buyisa a vapostola.

²² Loko a malandra matlhasi abohelweni, mayakuma vange kone; matlhela, mayavativisa maku:

²³ Hi kumi swipfalu swa bohelo na swipfaliwile swinene, na vone valaveleli vayimi tinyangweni; kambe loko hipfula, ahikumanga mhunu andreni.

²⁴ Loko a ndruna ya Tempele ni vaprista lava vakulu vayingela a maritu lawo, vatxhukisiwa hinkonta yavu, ni leswaku xana leswi switagama kwini.

²⁵ Kolanu kutlhasa mhunu aku ku vone: Lava n'wingavanhingenisa abohelweni, hi lavaya vayimiki a Tempeleni, vadondrisa tiko!

²⁶ A ndruna ni malandra vahangasuka, vayavabuyisa. Kambe vangavaxanisi hikusa afa vatxhava leswaku a vhanu vangavakhandla hi maribye.

²⁷ Loko vatlhasa, vavayisa mahlweni ka huvu leyi yikulu, kutani a muprista lwenkulu aku ku vone:

²⁸ Xana ahin'wileletanga hi ntamu leswaku n'wingadondrisi hi vito ledro? Kambe swoswi n'witati Yerusalema hi dondro yenu, n'widjula ni kubuyisa a henhla kweru a ngati ya mhunu lweyo!

²⁹ Petrosi ayangula kun'we ni vapostola van'wana aku: swafanekela ngopfu kuyingiseta Xikwembu Nkulukumba kutlula vhanu.

³⁰ Xikwembu Nkulukumba wa vatatana weru apfuxi Yesu, lweyi n'wine n'wingamudlaya hi kumuhayeka mhandreni.

³¹ Kambe yelweyo, Xikwembu Nkulukumba amutlakuxelile axineneni xakwe, ava Hosi ni Muhuluxi, atanyika Israyele akuva andruluka ava adrivaleliwa swidoho swake.

³² Hine hi timboni ta hinkwaswu kun'we ni Moya wa Kuxwenga, lowu Xikwembu Nkulukumba awunyikaka ku lava vamuyingisetaka.

³³ Loko vayingeli leswo, vahundrisa kulebya lakakuva vadjula ni kuvadlaya.

³⁴ Kambe mun'we mufarisi, lweyi a vito drakwe afaka vaku i Gamaliyele, lweyi afaka ali mudondrisi wa Nawu, afaka akhensiwa hi tiko hinkwadru, asekeleka ayima a hubyini aleleta leswaku a vapostola vahumexiwa nkamanyana,

³⁵ kutani aku ku vone Vavanuna va Israyele, tivonelani ku vhanu lava, leswi n'witakavayentxa swone;

³⁶ drimukani leswi swingayentxeka akhalenyana; afaka kutumbuluki Tewudasi, lweyi afaka aku yene i mhunu wa lisima; kanamareli ku yene vavanuna vakudjula kuva mune wa madzana (400). Kambe yelweyo vamudlayile, hinkwavu a valandreli vakwe vahangalasiwa, vangahavi ntxhumu.

³⁷ Antrhaku ka lweyo, kutumbuluka Yudasi, mu-Galileya, ankameni wa kutitralisa ka vhanu; atikokeliki xitrungu kuva ximulandra, kambe na yene asuvile, ni hinkwavu lava afaka vamuyingiseta vahangalaka.

³⁸ Hileswo-ke, nili ku n'wine: sukani ku vhanu lava, n'wivatrika; hikusa loko kungu ledri ni ntiro lowu swipfa vhanwini, switahela mfuri;

³⁹ kambe loko swipfa ku Xikwembu Nkulukumba, n'wine n'wingaka n'wingaswikoti kuswihelisa; na swone, n'wingakumiwa na n'wilwa na Xikwembu Nkulukumba! Vone vahangapfumela mavonela ya Gamaliyele.

⁴⁰ Vavitana vapostola, vakhatisiwa; kutani vavanyika nawu akuva vangahayi mahlweni vakhanela hi vito dra Yesu. Ntrhaku vavantrhunxa.

⁴¹ A vapostola vahuma, hubyini na vatrhavi ngopfu, hi kuva vakumi mfanelo ya kuxanisiwa hinkonta ya vito dra Yesu.

⁴² Kutani masiku hinkwawu afa vahuwelela a Tempeleni ni hi yindlu ni yindlu leswaku Yesu i Kriste.