Mintiro Ya Vapostola 25 - Testamente Ledrimpswha ni Mapsalma

Pawulosi akombela kuyavanyisiwa ha Khezari

¹ Festu atiki atlhasa axifundreni-nkulu lexo, loko kuhundri masiku mararu, asuka Khezareya antlhantukela a Yerusalema;

² kolahu a vaprista lava vakulu ni vakulu va va-Yuda, vayarambela Pawulosi ku yene,

³ vamutratriya, vamukombela leswaku avayentxela vumbilu avatisela Pawulosi a Yerusalema. Hikusa afa valinimakungu ya kumudlaya andleleni.

⁴ Kambe Festu avayangula aku: Pawulosi abohiwi a Khezareya, na mine nitahatla nitlhelela kone.

⁵ Ke lava vaswikotaka, amakari kwenu avafulamele na mine vatatamurambela, loko wubihu byili kone ku nuna lweyi.

⁶ Atrhama na vone masiku lawa mangatluliki ntlhanu na mararu kumbe khume, ahangafulamela a Khezareya. Hi siku ledri drilandrelaka ayatrhamisa ahubyini, aleleta leswaku Pawulosi atisiwa.

⁷ Loko vamutisile, a va-Yuda lava vafulameliki vapfa Yerusalema, vamutrandrela, vamurwexa milandru minyingi ya kubindra, leyi afaka vahluleka ni kumitiyisa.

⁸ Kolahu Pawulosi atiyangulela na yene aku: Anidohanga ntxhumu, ni le nawini wa va-Yuda, nambi kuli Tempeleni, nambi ka kuva kuli ku Khezari.

⁹ Kolahu Festu leswi afaka adjula a kutrhavisa va-Yuda, avutisa Pawulosi aku: Xana waswidjula kuya a Yerusalema, utayayavanyisiwa kone ha mine atimhakeni leti amahlweni, xana?

¹⁰ Lahu Pawulosi aku: Niyimi amahlweni ka Huvu ya Khezari, kunga lomu nifanekelaka kuyavanyisiwa kone. Anidohanga ntxhumu ku va-Yuda, swanga hi leswi uswitivaka swinene na wene.

¹¹ Hikusa loko nidohile, loko ni yentxi ntxhumu lowu nifanelaka kudlawa ha wone, aniyali a kufa. Kambe loko kungena ntxhumu ku leswi vanirambelaka ha swone, akuna mhunu lweyi anganinyiketaka ku vone akuva avatrhavisa. Nikombela kuyavanyisiwa ha Khezari.

¹² Kolahu Festu, loko akhaneli ni va Huvu, ayangula aku: Uli utikombelela kuya ku Khezari, utaya ku Khezari!

Pawulosi mahlweni ka Agripa na Berenise

¹³ Loko kuhundri masikunyana, a mufumi Agripa na Berenise vatlhasa Khezareya, vatatalosa Festu.

¹⁴ Leswi vatrhamiki kone masikunyana, Festu adrungulela hosi a timhaka ta Pawulosi. Aku: Kuna mun'we wanuna lweyi angasiyiwa ha Felikisi abohelweni.

¹⁵ Loko nili Yerusalema a varangeli vavaprista ni vakulu va va-Yuda vangamurambela ku mine, vakombela leswaku ayavanyisiwa.

¹⁶ Nivayangula niku ahi mayentxela ya va-Roma a kunyiketa ntsena mhunu lweyi arambeliwaka, na angasivonana hi mimombo ni lava vamurambela, akuma nkama wa kutiyangulela ku leswi vamurambelaka ha swone.

¹⁷ Ke loko vatlhasi halenu, nihatla niyatrhamisa ahubyini, hi siku ledri drilandrelaka, nileleta leswaku a nuna lweyo atisiwa.

¹⁸ Kutani lava afaka vamurambela, vasekeleka, vangahlayi nandru wa leswi mine afaka nipimisa swone.

¹⁹ Kambe afa vani kukanetana na yene hi timhaka ta vukhongeli byavu, ni hinkonta ya wa kukari valiki hi Yesu, afiki, kambe Pawulosi aliki awahanya.

²⁰ Hikuva mine afaka nipfumala leswi ningahlayaka swone, mayelano ni mintxhumu leyo, ni kukanetana loko, nimuvutisa leswaku kumbe xana awaswidjula a kuya a Yerusalema, atayavanyisiwa kone a timhakeni leto.

²¹ Kambe leswi Pawulosi akombeliki leswaku a mhaka yake yiyavanyisiwa ha Khezari, nileleti leswaku abekisiwa kola, nitakondra nimuyisa ku Khezari.

²² Kolahu Agripa aku ku Festu: Afa nitaswirandra a kuyingela a nuna lweyo. Festu aku: Mundruku utamuyingela.

²³ Mundruku ka kone, Agripa na Berenise vata hi kutwala loku kukulu, vanhingena ahubyini ni tindruna leti tikulu, ni vavanuna lava vakulu va muti. Festu aleleta leswaku Pawulosi atisiwa,

²⁴ kutani Festu aku: mufumi Agripa, na n'wine n'winga kola na hine! N'wamuvona a mhunu lweyi! A vunyingi hinkwabyu bya va-Yuda byimurambeliki ku mine, ni le Yerusalema, vakombela hi kubandlukana vaku angafanekeli kuva atama ahahanya.

²⁵ Kambe mine, nikumi leswaku angayentxanga ntxhumu lowu afanekelaka kufa ha wone. Kambe yene leswi akombeliki kuva ayavanyisiwa ha Khezari, nitremi leswaku nitamuyisa ku yene.

²⁶ Kambe mine anina ntxhumu wa kutiya ningatralelaka Khezari hi tlhelo drakwe, hi laha ke nimutisiki amahlweni kwenu, ngopfu-ngopfu amahlweni kwaku, mufumi Agripa, akuva nitativa leswi nitakatrala swone, loko n'witava n'wimukambile.

²⁷ Hikusa nipimisa leswaku ahi swone kufambisa mubohiwa, na kungabekiwanga timhaka leti arambeliwaka ha tone.