Mintiro Ya Vapostola 21 - Testamente Ledrimpswha ni Mapsalma

Pawulosi aya Yerusalema

¹ Loko hitravukani na vone, hiweli hi lulama hiyatlhasa a Kosi. Amixo lowu wulandrelaka, hi tlhasa a Rode, kutani loko hisuka kone hiya a Paatara,

² lomu hi kumiki a ngalawa leyi afaka yiya Fenikiya; hinhingena ku yone hi khoma liyendro.

³ Loko hi hundra hi kusuhi na Kipra, hikusiya aximantrhini, hilulama hiya Siriya, ntrhaku hiya tlhasa a Tiri; hikusa a ngalawa afa yifanela kuhumexa mintrhwalu hinkwayu kone.

⁴ Hikuma a vadondrisiwa, kutani hitrhamisa kone ntlhanu wa masiku na mabiri; vone afa vabyela Pawulosi, hi Moya wa Kuxwenga, leswaku angantlhantukeli a Yerusalema.

⁵ Loko kuhundri masiku lawo, hisuka hifamba. Vahiheketa hinkwavu, ni vavasati ni vatrongwana, hikondra hiyatlhasa ahandle ka muti, hikhisama asaveni dra likhulu, hi khongota.

⁶ Kutani hilelelana, hinhingena angalaweni, vone vatimukela ma kaya.

⁷ Akuheteni ka liyendro dreru a Tiri hiyitlhasa a Pitolemayida; hilosanana ni vamakweru, hitrhamisa navu siku drin'we.

⁸ Hi siku ledri drilandrelaka, hisuka hiya Khezareya, hiyanhingena a kaya ka Filipi lweyi wa muvhangeli, afaka ali mun'we wa lava va ntlhanu na vabiri, hi trhama na yene.

⁹ Yene afa ani mune wa vana va vanhwanyana, lava vangasikitivana ni wanuna, afaka vaprofeta.

¹⁰ Hitrhami kone masikunyana; kufulamela kone mun'we wa muprofeta, apfa Yudeya, a vito drakwe afaka ali Agabu,

¹¹ loko atlhasi ku hine, ateka bandi dra Pawulosi, atitrimba minenge ni mavoko aku: A Moya wa Kuxwenga wuhlaya leswaku anuna lweyi a bandi ledri dringa drakwe, a va-Yuda vata mutrimbisa xiswoswi a Yerusalema, vamunyiketa amavokweni ya va-Matiko.

¹² Loko hiyingela leswo, hine ni va mbangu lowuyana, himutratiya akuva angayi a Yerusalema.

¹³ Kolahu Pawulosi ayangula aku: Xana n'wiyentxa yini, n'widrila, n'witrhova a mbilu yanga? Hikusa mine anitibekiselanga kubohiwa ntsena, kambe ni kufa a Yerusalema hi vito dra Hosi Yesu.

¹⁴ Swanga hi leswi hihlulekiki a kumukholwisa, hemiyela hi ku: Akurandra ka Hosi akuyentxiwe!

¹⁵ Antrhaku ka masiku lawo, hitibekisa, hintlhantukela a Yerusalema.

¹⁶ Van'we va vadondrisiwa va-le-Khezareya vafamba na hine, na vali kun'we na Manasomi, wa le Kipra, mudondrisiwa wa khale, lweyi afaka hifanele kurureliwa ku yene.

Pawulosi ayendrela Yakobe

¹⁷ Loko hitlhasa a Yerusalema, a vamakweru vahiyamukela hi kutrhava.

¹⁸ Hi siku ledri drilandrelaka, Pawulosi anhingena na hine ku Yakobe, laha afaka kuni vakulu va Kereke.

¹⁹ Pawulosi avalosa, ava drungulela hinkwaswu leswi Xikwembu Nkulukumba aswiyentxiki hikola ku ntiro wakwe amakari ka va-Matiko.

²⁰ Loko vamuyingelile, vadrumisa Xikwembu Nkulukumba, vaku: Waswivona, wene makweru, a madzana-dzana ni madzana-dzana lawa manga kone, ya va-Yuda lava vapfumeliki, vahahisekela a Nawu wa Moxe.

²¹ Kambe vabyeliwi mayelano na wene leswaku udondrisa va-Yuda hinkwavu, lava trhamisaka amakari ka va-Matiko a kutravukana ni nawu wa Moxe, uku: Vangahasokisi a vana vavu, vangahafambi hiswihila swavu.

²² Xana hitayentxa yini ke? Ha kunene vataswiyingela leswaku utlhasile.

²³ Ke, yentxa leswi hitakakubyela swone: Hini mune wa vavanuna, lava vafanelaka kuhetisa xidumbiso.

²⁴ Vateki, utibasisa kun'we na vone, uvahakelela vabyevula a tinhloko; vataswitiva hinkwavu leswaku akuna ntxhumu ku leswi vabyeliwiki swone hi tlhelo draku, ni leswaku na wene wahalandra a Nawu (wa Moxe).

²⁵ Loko kuli lava vanga va-Matiko kambe vapfumeliki, hine havatraleli leswaku vatitrona leswi switlhabyeliwiki swifaniso, ni ngati ni leswi swakufa hi xihluku, ni vumbuye.

²⁶ Mundruku ka kone, Pawulosi ateka a vavanuna lavo va mune atibasisa kun'we na vone anhingena Tempeleni, akuva ativisa a kuhela ka masiku ya kutibasisa, ni kuyimela a kuhumexa a mhamba ya mun'wana-ni-mun'wana ku vone.

Kukhomiwa ka Pawulosi a Tempeleni.

²⁷ Loko a masiku ya ntlhanu na mabiri madjula kuhela, a va-Yuda lava vapfiki hi le Aziya, vavona Pawulosi a Tempeleni, vahlengeleta vhanu vavapfilunganyisa, vamukhoma,

²⁸ kutani vabandlukana vaku: Va-israyele, hipfunisani! Lweyi hi ye nuna lweyi afambaka matlhelo hinkwawu adondrisa hinkwavu leswi swiyalanaka ni tiko ledri, ni Nawu, ni mbangu lowu! Mfuri swoswi anhingenisi va-Girika a Tempeleni, ahona a mbangu wa kuxwenga!

²⁹ Hikusa leswi afaka varangi vavona Trofimo, lweyi wa le Efesa, kun'we na yene a mutini, afa vapimisa leswaku Pawulosi amunhingenisi a Tempeleni.

³⁰ A muti hinkwawu wutxhukisiwa. A vhanu vatrutruma vatrombana. Va khomiki Pawulosi, vamukokovisela a handle ka Tempele, kutani a swipfalo swipfaliwa hi kuhangwesa.

³¹ Loko vahatilulamisela kumudlaya, a ndruna ya butrhu yitiva leswaku a Yerusalema hinkwadru drini dzolonga.

³² Kolahu yihlengeleta a masotxha ni tindruna ta madzana, yitrutruma yiya ku vone. Kuti loko vone vavona a ndruna ni masotxha, vatrika kuba Pawulosi.

³³ Kolahu a ndruna yitrhindrekela, yiteka Pawulosi, yileleta leswaku atrimbiwa hi timpentxana tibiri. Ntrhaku yivutisa leswaku i mani, ni leswaku i mpswini leswi aswiyentxiki.

³⁴ Kambe ku xitrhungu van'we afa vabandlukana swin'we, van'wana swimbeni, kolahu-ke a ndruna yingativi leswi anga swone hinkonta ya pongwe. Hi swoswo yi leleta leswaku Pawulosi ayisiwa khokholweni.

³⁵ Loko vatlhasi aswikhandriyeni swa khokholo, Pawulosi arwaliwa hi masotxha hinkonta ya kulebya ka xitrhungu,

³⁶ hikusa hinkwavu afa valandrelela hi le ntrhaku vabandlukana vaku: Mudlaye!

Ku tiyangulela ka Pawulosi

³⁷ Loko Pawulosi adjula ku nhingenisiwa khokholweni, aku ku ndruna ya butrhu: Xana ningapfumeleliwa kukubyela xa ntxhumu? A ndruna yiku: Waxitiva a Xigirika xana?

³⁸ Kasi xana ahi wene lweyi wa mu-Gipta lweyi angapfuxa a dzolonga amasikwini lawaya, ava ayisa mune wa makume ya madzana (4000) ya vavanuna ahuleni, na vali tinsulavoya xana?

³⁹ Pawulosi ayangula aku: Ni mu-Yuda, wa kubelekiwa a Tarso aximutanini xa Kilikiya; nakukhongota, nipfumelele ni vulavula ku xitrhungu.

⁴⁰ Yimupfumeleliki, Pawulosi ayima henhla ka xikhandriyo, akwehleta vhanu akuva vamiyela. A hanga kuvulavula navu hi lidrimi dra Xiheberu aku: