Mintiro Ya Vapostola 2 - Testamente Ledrimpswha ni Mapsalma

Kuxika ka Moya wa Kuxwenga

¹ Loko kutlhasi a siku dra Pentekosta, afa vahlengeletani hinkwavu ku mbangu mun'we.

² Kan'we kuyingeliwi a pongwe drikulu ledri dripfaka Tilweni, swanga xidzedze xa ntamu ngopfu, dritata a yindlu hinkwayu leyi afaka vatrhamisi ku yone.

³ Kolahu kuhumeleli tindrimi ta swanga i ndrilo, leti afaka tihangalaka na tixikela henhla ka mun'wana-ni-mun'wana wavu.

⁴ Vahangatala hinkwavu hi Moya wa Kuxwenga, vasungula kukhanela hi tindrimi tin'wana, swanga hi leswi a Moya afaka wuvanyika kuhlaya swone.

⁵ Afa kuni va-Yuda lava afaka vatrhama Yerusalema vanga vavanuna lava vangani vukhongoti, lava vapfiki matlhelweni hinkwawu ya misava.

⁶ A pongwe ledro, driku drahumelela, a vunyingi byihlengeletana, vahloleliwa ngopfu hi leswi mun'wana-ni-mun'wana afaka avayingela vakhanela hi lidrimi dra kwavu.

⁷ Vahangatxhukisiwa, vahlamala hinkwavu vaku: Xana volavo hinkwavu vakhanelaka, ahi va-Galileya kasi?

⁸ Swiyentxekisa kuyini, hi vayingelaka vakhanela hi tindrimi ta kweru?

⁹ Vaparta ni va-Medo, va-Elamita ni va Mezopotamiya, va Yudeya ni va-le-Kapadokiya, va-le-Aziya ni va-le-Ponto,

¹⁰ va-le-Frijiya ni va-le-Pamfiliya, va-Egipta ni va le matikweni ya Libiya, kusuhi na Kirene, ni lava valuveliki Roma,

¹¹ va-Yuda ni lava vandrulukeliki xiyudeni, vavitaniwaka hileswaku i va-Proselita, ni va-Kreta ni va-Arabiya, hinkweru hivayingela vakhanela hi tindrimi teru a amahlolana lawa makulu ya Xikwembu Nkulukumba.

¹² Hinkwavu afa vakhomiwa hi kuhlamala ni kuganaganeka ngopfu, vavutisana vaku: Leswi swidjula kuhlaya yini xana?

¹³ Kambe van'wana vasandra vaku: A vhanu lava vapopswile.

A maritu ya Petrosi

¹⁴ Petrosi ayimi kun'we ni lava va khume na mun'we, atlakuxa ritu aku ku vone: va-Yuda, na n'wine hinkwenu vayaki va Yerusalema, tivani leswi n'wiva n'wyingelisisa a maritu yanga.

¹⁵ Hikusa volavo avapopswanga, swanga hi leswi n'wipimisaka swone, hikusa wehe nkama wa vuraru (9h00) wa siku.

¹⁶ Kambe leswi swihumelelaka laha hi leswi switivisiwiki hi muprofeta Yowele loko aku:

¹⁷ Amasikwini ya vugamu, kuhlaya Xikwembu Nkulukumba, nitatxhela a Moya wanga a henhla ka nyama hinkwavu. A vanenu vataprofeta; na vone vanhwanyana venu; a vayisanyana venu vatavona swivoniso, ni swiduwhati swenu switalora miloro.

¹⁸ Amasikwini wolawo nitatxhela a Moya wanga a henhla ka malandra yanga ya xinuna ni ya xisati, vone vataprofeta.

¹⁹ Nitahumexa ni mahlolana henhla tilweni, ni swikombiso a hansi, amisaveni, a ngati ni ndrilo ni hunguva ya musi.

²⁰ A dambu dritandrulutiwa munyama, na yone hweti yitandrulutiwa ngati, a siku ledri drikulu dra lidrumu, dra Hosi dringasita.

²¹ Na swone kutahumelela leswaku mun'wana-ni-mun'wana lweyi atakavitana vito dra Hosi atahuluxiwa.

²² Petrosi aya mahlweni aku: Vavanuna va Israyele yingisetani a maritu lawa: Yesu wa Nazarete, wanuna lweyi angakombisiwa hi Xikwembu Nkulukumba ku n'wine, hi mintiro ya ntamu, ni mahlolana ni swikombiso, leswi Xikwembu Nkulukumba aswiyentxiki ha Yene amakari kwenu, swanga hi leswi n'wiswitivaka na n'wine;

²³ anyiketiwi, hi kulandra makungu ni kuvona ka nkongometo wa Xikwembu Nkulukumba, kutani n'wine n'wimudlayile hi kumuvamba hi mavoko ya vadohi;

²⁴ Kambe Xikwembu Nkulukumba amupfuxile akufeni, amuntrhunxa ku ntamu wa lifu, hikusa afa swingakoteki leswaku ahluliwa hi lifu.

²⁵ Hikusa Davida ahlayi hitakwe aku: Afa nivona a Hosi yanga nkama hinkwawu amahlweni kwanga; hikuva ale tlhelweni dranga dra xineneni, akuva ningatrekatrekisiwi.

²⁶ Hileswo-ke a mbilu yanga yinyoxile, ni lidrimi dranga dratrhava. Mfuri na yone a miri yanga yitawisa hi kudumba,

²⁷ hikusa ungaka ungatriki hika dranga a Hades, na swone ungaka unganyiketi Muxwengi waku avona kubola.

²⁸ Uniyentxi leswaku nitiva tindlela ta vutomi, utanixurisa hi kutrhava amahlweni kwaku.

²⁹ Vamakweru: nipfumelelani nin'wibyela hi kutiyisa leswaku mupatriarka Davida, afile ava alahliwa. Kutani a xira drakwe ni namuhla drehe kone amakari kweru.

³⁰ Ke, leswi afaka ali muprofeta, ativiki leswaku Xikwembu Nkulukumba amudumbisi hi kufunga leswaku mun'we wa lixaka drakwe atatrhamisa axitrhan'wini xakwe xa vuhosi,

³¹ aswivonile kule, swingasinatumbuluka, ava ahlaya swakupfuka ka Kriste, leswaku angaka angatrikiwi a Hades, ni leswaku a miri yake mingaka n'wingavoni kubola.

³² Yesu yelweyo, Xikwembu Nkulukumba amupfuxile kufeni, kutani hine hinkweru hi timboni ta swone.

³³ Hileswo-ke atiki awatlakuxiwa axineneni xa Xikwembu Nkulukumba, ayamukeliki ni xidumbiso xa Moya wa Kuxwenga ku Tatana, atxheli ahenhla kweru leswi na n'wine n'wiswivonaka ni kuswiyingela.

³⁴ Hikusa ahi yene Davida lweyi antlhantukeliki Tilweni, kambe yene ahlayi aku: A Hosi yiti ku Hosi yanga: Trhamisa axineneni xanga,

³⁵ nikondra nibeka a valala vaku hansi ka minkondro yaku.

³⁶ Ke a tiko hinkwadru dra Israyele adriswitive leswaku Yesu yelweyi n'wine n'wingamuvamba, Xikwembu Nkulukumba amuyentxi Hosi ni Kriste.

³⁷ Loko vayingela leswi, vatlhaviwa timbilu, kutani vavutisa Petrosi ni van'wana vapostola vaku: Vamakweru, Xana hifanela kuyentxa yini?

³⁸ Petrosi avayangula aku: Ndrulukani, mun'wana-ni-mun'wana ababatisiwa avitweni dra Yesu Kriste, akuva n'witadrivaleliwa a swidoho swenu, kutani n'witayamukela nyiko ya Moya wa Kuxwenga.

³⁹ Hikusa a xidumbiso i xenu ni vana venu, ni hinkwavu lava vanga ku le, anga hinkwavu lava Hosi Xikwembu Nkulukumba weru atakavavitana.

⁴⁰ Hi swoswo, ni hi maritu man'wana Petrosi afa avatratriya aku: Tihuluxani ku vhanu lava va kusomboloka.

⁴¹ Vone-ke, vatiki vayamukela a ritu drakwe, vababatisiwa; A sikwini droledro kuyamukeliwa vhanu lava vadjulaka kuva makume mararu ya madzana (3000).

Mahanyela ya vapfumeli va kusungula

⁴² Hinkwavu afa vakhinyela andondrweni ya vapostola, ni le mpatranweni, ni le kukhemeni ka kati, ni le swikhongotweni.

⁴³ Kahangava ni kutxhava ahikeni dra mun'wana-ni-mun'wana. Mfuri afa kuyentxiwa mahlolana ni swikombiso swakutala hi vapostola.

⁴⁴ A vapfumeli afa vali mbangwini mun'we, na kone avabeka kun'we hinkwaswu leswi afaka vali naswu.

⁴⁵ Vaxavisa masimu yavu, na byone vukosi byavu, vayavelana a mihandru ya kone, hinkwavu swanga hi leswi mun'wana-ni-mun'wana afaka apfumalisa xiswone.

⁴⁶ Hinkwawu masiku afa vakhinyela hi mbilu yin'we a Tempeleni, vakhemelana kati hi tiyindlu na vada swakuda hi kunyoxa ni kubasa ka timbilu.

⁴⁷ Afa vadrumisa Xikwembu Nkulukumba, na vatrhaveliwa hi hinkwavu. A Hosi afa yivayengeselela vahuluxiwa siku drin'wana ni drin'wana.