Mintiro Ya Vapostola 13 - Testamente Ledrimpswha ni Mapsalma

Ntiro wumpswha wa Barnabasi na Saulo

¹ Afa kuni vaprofeta ni vadondrisi akerekeni dra Antiyokiya, vanga va Barnabasi, na Simiyoni, lweyi atxhuliwaka Nigere, na Lusiyo wa Kirene, na Manahema lweyi awundliwiki kun'we na Heroda mufumi, na Saulo.

² Siku drin'wana loko vone vagandrela Xikwembu Nkulukumba ni kutitrona, a Moya wa Kuxwenga wuku: Nibekelani Barnabasi na Saulo akuva vaya hetisa a ntiro lowu ni va vitaneliki wone.

³ Kolahu-ke, ntrhaku ka loko vatitroni, ni kukhongota, ni kuvantlhanteka mavoko, kutani vavatrika vafamba.

Le Kipra

⁴ Barnabasi na Saulo, hi kurumiwa hi Moya wa Kuxwenga, vafamba kukondra vayatlhasa mutini wa le Selukiya, vasuka kone vawelela xihlaleni xa Kipra.

⁵ Loko vatlhasi le Salamina vadondrisa a ritu dra Xikwembu Nkulukumba amasinagogeni ya va-Yuda. Afa vali na Yohana Marka mupfuni wavu.

⁶ Vati loko vafamba-fambi xihlale hinkwaxu, kukondra vatlhasa a Pafo. Kone vakumi lweyi wanuna wa mu-Yuda, wa mungoma, muprofeta wa madrimi, a vito drakwe afaka vaku i Baryesu.

⁷ Lweyi afaka ali na mufuminyana Serjiyo Pawulosi, wanuna wa vutlhari. Kutani aruma vavitana Barnabasi na Saulo, hikusa afa adjula kuyingela ritu dra Xikwembu Nkulukumba.

⁸ Kambe, lweyi wa mungoma lweyi a vito drakwe hi Xigirika anga Elima ayalela vapostola, arendreveta kuhambukisa lweyi wa mufuminyana ku likholo dra vukriste.

⁹ Kambe Saulo lweyi mfuri avitaniwaka Pawulosi, atala hi Moya wa kuxwenga, alavisisa Elima

¹⁰ kutani aku ku yene: Wene, wa muhembi, mubihi, n'wana Diyavulosi, nala wa hinkwaswu leswi swilulamiki. Xana hikola kayini ungatriki kusombolokisa a tindlela ta kululama ta Hosi?

¹¹ Ke swoswi, a voko dra Hosi drile henhla kwaku akukhatisa: Utava wa kufa-mahlu, ungavoni dambu hi nkamanyana. Hi nomu-lo, aweliwa hi hunguva ni munyama, kutani asungula kuyingayinga, adjula lweyi angamufambisaka hi voko.

¹² Loko a mufuminyana avoni leswi swihumeleliki, apfumela, hi leswi ahlamalisiwiki hi dondro ya Hosi.

A Antiyokiya wa Pisidiya

¹³ Pawulosi ni lava afaka ali na vone vatiki vawelela Pafo, vaya a Perga wa Pamfiliya. Kambe Yohana Marka a hambana navu, atlhelela Yerusalema.

¹⁴ Vone vayi mahlweni ni liyendro, vasuka Perga, vatlhasa Antiyokiya wa Pisidiya; kone vanhingena asinagogeni hi siku dra Savata, vatrhamisa.

¹⁵ Antrhaku ka kuhlayiwa ka Nawu, ni ka vaprofeta, a varangeli va sinagoga vavaramba vaku: Vavanuna va-le-kweru, loko n'wini ritu dringadondrisaka a xitrhungu, drihlayani.

¹⁶ Kutani Pawulosi asekeleka avahambela xikombiso hi voko akuva vamiyela aku: Vavanuna va Israyele, na n'wine hinkwenu n'witxhavaka Xikwembu Nkulukumba! Yingisetani leswi nitakaswihlaya.

¹⁷ Xikwembu Nkulukumba wa Israyele ahlawuli a vatatana veru, ava akulisa a tiko dravu, loko vahatrhamisa atikweni dra Egipta, lomu avahumexiki kone hi ntamu wa voko drakwe;

¹⁸ na avabyatrhi ahuleni hi mpfhuka wa kusuhi ni mune wa makume ya malembe;

¹⁹ mfuri na ahohloti ntlhanu wa matiko na mabiri atikweni dra Kanana, avanyiki a tiko ledro swanga pfindla

²⁰ hi xipimu xa malembe ya mune wa madzana ni ntlhanu wa makume (450). Ntrhaku ka leswo, avanyika vatremi kuyatlhasa ku muprofeta Samuwele.

²¹ Kolahu a tiko drikombeli hosi, kutani Xikwembu Nkulukumba ava hanana Sawule, n'wana Kixi, wa lixaka dra Benyamini, afuma mune wa makume (40) ya malembe.

²² Ntrhaku ka kususa lweyo, avanyiki hosi Davida, lweyi ha yene ahambiki vumboni aku: Nikumi Davida n'wana Yixayi, wanuna wa kulandra a mbilu yanga, lweyi atakayentxa a kurandra kwanga hinkwaku.

²³ Alixakeni dra lweyo, swanga hi xidumbiso, Xikwembu Nkulukumba abuyiseli Israyele a Muhuluxi, anga Yesu.

²⁴ Kambe na Yene a angasinatlhasa, Yohana afa ahuwelela ku tiko hinkwadru dra Israyele, a babatiso dra kutisola.

²⁵ Kambe loko Yohana aheta a ntiro wakwe, aku ku tiko: N'wiyanakanya leswaku ni mani, n'wine? Ani yene lweyi n'wimuyanakanyaka. Kambe antrhaku kwanga kuta lweyi mine ningafanelikiki kuntrhunxa a tingoti ta tintangu aminkondrweni yake.

²⁶ Vavanuna va-le-kweru, vana va lixaka dra Abrahamu, na n'wine n'witxhavaka Xikwembu Nkulukumba, ku hine hinkweru kurumeliwi a ritu dra huluxu ledri!

²⁷ Hikusa a vayaki va Yerusalema ni varangeli vavu, na vangamutivanga Yesu, nambi maritu ya vaprofeta lawa mahlayiwaka hi masavata, hi kumuyavanyisela lifu, vahetisi a maritu wolawo;

²⁸ nambi leswi vangakumangakiki a mhaka ya kumuyavanyisela lifu, vakombeli ku Pilatu akuva adlayiwa.

²⁹ Kutani ntrhaku ka kuhetisa hinkwaswu leswi switraliwiki mayelano na Yene, vamuhawula amhandreni, vamubeka axireni.

³⁰ Kambe Xikwembu Nkulukumba amupfuxile amakari ka vafi;

³¹ kutani avoniwi hi masiku manyingi hi lava kusukela a Galileya, afaka antlhantukeli na vone a Yerusalema, lava swoswi vanga timboni takwe amahlweni ka tiko dra Israyele.

³² Hine hin'witivisa a Ivangeli ya xidumbiso lexi xidumbisiwiki ku vatatana veru,

³³ lexi Xikwembu Nkulukumba axihetisiki swoswi ku hine hinga vana vavu, hi kupfuxa Yesu kufeni swanga hi leswi switraliwiki abukwini dra Swidrumiso ku ndrima ya vubiri, hileswaku: Wene u n'wananga; Mine nikubeleki namuhla.

³⁴ Nakone, leswaku Xikwembu Nkulukumba amupfuxi amakari ka vafi akuva angahatlheleli kuboleni, hileswaku hi ndlela leyo ahlayi aku: Nitahetisela ku n'wine a swidumbiso swakutiya ni kuxwenga, swidumbisiwiki ku Davida.

³⁵ Hikola ka leswo, ahlayi ku ndrima yin'wana ya Swidrumiso aku: Ungaka ungapfumeli leswaku a nandra waku avona a kubola.

³⁶ Hikusa hi xihlayelamfuri, loko Davida atirile a kungu dra Xikwembu Nkulukumba amakari ka lixaka drakwe, ntrhaku etiyetlelela, atlhanganisiwa kun'we ni vatatana vakwe, kutani avona a kubola.

³⁷ Kambe lweyi Xikwembu Nkulukumba amupfuxiki kufeni, angavonanga a kubola.

³⁸ Hileswo-ke, vavanuna va-le-kweru, aswitibyiwe ku n'wine leswaku a kudrivaleliwa ka swidoho ka tivisiwa ku n'wine hikola ka Yene.

³⁹ Na swone, hikola ka Yene, mani na mani lweyi apfumelaka akuma kuhlayiwa mululami ku hinkwaswu leswi n'wine afaka n'wihluleka kukuma kuhlayiwa valulami hikola ka nawu wa Moxe.

⁴⁰ Tivonelani-ke, leswaku n'wingahumeleliwi hi leswi switraliwiki ku vaprofeta:

⁴¹ Vonani, n'wine vadreli, n'wihlamala na n'winyamalala; hikusa mine nitira a ntiro amasikwini yenu, ntiro lowu n'wine n'wingayalaka ni kuwupfumela nambi loko mhunu an'witlhamuxela.

⁴² Kutani loko Pawulosi na Barnabasi vahuma, vavakombela akuva vatlhela vakhanela a maritu wolawo hi Savata ledri drintlhantamaka.

⁴³ Loko a sinagoga drihangalaka, a va-Yuda lava vanyingi ni lava ndrulukeliki xiyudeni valandra Pawulosi na Barnabasi. Volava ke na vakhanela ku vone, afa vavatlhavukanyisa akuva vanamarela a timpswalu ta Xikwembu Nkulukumba.

⁴⁴ Hi Savata ledri drintlhantamaka, vahlengeletana hi nhlayu ya kudjula kutlhasa ku vhanu hinkwavu va muti, akuva vatatayingela a ritu dra Hosi.

⁴⁵ Loko va-Yuda vavoni vhanu vanyingi, vatala hi matrhoho, vasungula kusandra ni kukaneta na Pawulosi.

⁴⁶ Kutani Pawulosi na Barnabasi, vakhanela hi ntamu vaku ku vone: Afa kusindriseka leswaku a Ritu dra Xikwembu Nkulukumba drihlayiwa ku n'wine va-Yuda, kusungula. Kambe leswi n'widriyalaka, n'witipimisaka lava vangafanekeliki hi vutomi lebyi byingahelikiki, vonani hiya ku lava vangeke va-Yuda.

⁴⁷ Hikuva a Hosi yihileleti xileswi: Nikubeki swanga livaningo ku va-Matiko, akuva wene uva huluxu kuyatlhasa avugan'wini bya misava.

⁴⁸ Loko a va-Matiko vaswiyingela, vatrhava ngopfu vadrumisa a ritu dra Hosi, kutani hinkwavu lava afaka vabekiseliwi vutomi lebyi byingahelikiki vapfumela.

⁴⁹ Xileswi a ritu dra Hosi, afa drihangalaka tikweni hinkwadru.

⁵⁰ Kambe a va-Yuda vahlohloteli vavasati va vukhongoti va kutxhaviseka, ni vakulu va muti, vavakholwisa akuva vapfuxela Pawulosi na Barnabasi a nxaniso, vavahlongola tikweni dravu.

⁵¹ Kolahu a vapostola vaphumuni ntrhuri wa minkondro yavu, xiva xikombiso xa leswaku vahambana na vone, kutani vaya mutini wa Ikoniya.

⁵² Kolahu a vakriste va-le-Antiyokiya vatrhavi ngopfu ni kutala hi Moya wa Kuxwenga.