Mintiro Ya Vapostola 12 - Testamente Ledrimpswha ni Mapsalma

Kuxanisiwa ka Kereke kuya mahlweni

¹ Ankameni wolowo, a hosi Heroda asunguli kuxanisa van'wana va Kereke,

² adlaya Yakobe makwa Yohana hi lipanga.

³ Atiki avona leswaku switrhavisi va-Yuda, ayengeta akhoma na yene Petrosi. Afa mali masiku ya makati lawa mangekena handrelo.

⁴ Amukhomiki, amunhingenisa abohelweni, amunyiketa kulaviseliwa hi mune wa mintlawa ya masotxha; afa apimisa kumukombisa ku tiko antrhaku ka Paska.

⁵ Petrosi, yene, afa alaviseliwa bohelweni, kambe a Kereke afa dritekisa kuya mahlweni hi kumukhongotela ku Xikwembu Nkulukumba.

Kutrhunxiwa ka Petrosi abohelweni

⁶ Loko-ke Heroda ali kusuhi ni kumukombisa, a vusiku byobyo, Petrosi afa ayetleli makari ka masotxha mabiri, atrimbiwi hi timpentxana tibiri, na vone valaviseli afa va yimi nyangweni valangusela a bohelo.

⁷ Kolahu kuhumelela a xirun'wa xa Hosi; ni kuvaninga kuva kone, xihlakahla Petrosi hi livambu, ximupfuxa, xiku: Hangwesa upfuka! Kahangawa timpentxana amavokweni ya Petrosi.

⁸ Kutani a ntrumi yiku ku yene: titrimbi likhalu, uyambala tintangu taku. Kutani ayentxisa xiswoswo. Ximubyela kambe: Titrondriyele hi kapulana draku, unilandra.

⁹ Ahangahuma, axilandra; na angativi leswaku leswi switiriwaka hi ntrumi swiyentxeka ha kakunene; kambe afa ayanakanya leswaku avona xivoniso.

¹⁰ Loko vatlulile ntlawa wa kusungula ni wa vubiri, vatlhasa axipfalwini lexi xikulu xa nsimbi, lexi xiyisaka mutini, xitipfulekela ku vone; vahangahuma, vaya mahlweni aruweni drin'we; Kutani a ntrumi yinyamalala ku yene.

¹¹ Kutani Petrosi axalamuka, aku: Swoswi naswitiva swinene leswaku a Hosi yirumi ntrumi ya Yone yinihuluxa a mavokweni ya Heroda, ni ku hinkwaswu leswi a va-Yuda afaka valavisela swone.

¹² Kuti loko Petrosi atiyanakanyile, aya kaya ka Maria, mamana wa Yohana lweyi atxhuliwiki Marka, lomu lava vanyinginyana afaka vahlengeletanile na vakhongota.

¹³ Petrosi atiki agongondra axipfalwini xa ligumba, kutlhasa wanhwanyana a vito drakwe i Roda, kutatativa leswaku hi mani.

¹⁴ Loko ativi ritu dra Petrosi, angahapfulanga xipfalu hinkonta ya kutrhava kwake, atrutruma ayativisa leswaku Petrosi ale nyangweni.

¹⁵ Vone vaku ku yene: Uhungukile! Kambe yene afa atiyisa aku swi tanu ha kakunene. Vone vaku: I ntrumi yake.

¹⁶ Kambe Petrosi afa ahagongondra. Vamupfuleliki, vamuvona, vahlolelwa.

¹⁷ Kambe yene avakwehleta hi voko leswaku vamiyela, avatrhandrela hi laha Hosi yimuhumexiki bohelweni ha kone. Kutani aku: Tivisani timhaka leti ku Yakobe Kusukela kolanu, avoneka swanga mun'we wa varangeli vakulu va Kereke dra le Yerusalema akweru. Ahangahuma, atifambela ku wun'wana mbangu.

¹⁸ Loko byixile, kavini dzolonga drikulu amakari ka masotxha, hileswaku Petrosi ayentxisi kuyini-ke!

¹⁹ Kambe loko Heroda amudjulile, angamukumi, ayavanyisa valaviseli, aleleta leswaku vadlawa; kutani antrhaku ka leswi, Heroda, asuka Yudeya, ayatrhamisa a Khezareya.

Kufa ka Heroda

²⁰ Heroda afa ahlundrukeli va-Tiri ni va-Sidoni; kambe vone vayingelana, vata ku yene, vakuma ni kuseketeliwa ha Blastu, andruna leyi yikulu ya hosi, vakombela kurula ka tiko, hikusa a tiko dravu afa drikuma vupfunu axifundreni xa hosi Heroda.

²¹ Asikwini ledri vabekeliwiki drone, Heroda ayambala minkhantxu ya vufumi, atrhamisa axitrhan'wini xakwe xa mfumu, akhanela na vone.

²² Kutani a tiko drihuwelela driku: A ritu ledri i dra Xikwembu Nkulukumba, ahi dra mhunu!

²³ Hi nomu-lo, a ntrumi ya Hosi yiba Heroda, hi leswi angadrumisangakiki Xikwembu Nkulukumba, adiwa hi swivungu a fa.

²⁴ Kutani a Ritu dra Xikwembu Nkulukumba afa driyandra, drihangalaka ngopfu.

²⁵ Barnabasi na Saulo, loko vaheti ntiro wavu, vasuka Yerusalema, vamuka, vateka Yohana lweyi atxhuliwaka Marka.