Mintiro Ya Vapostola 10 - Testamente Ledrimpswha ni Mapsalma

Petrosi na Korneliyo

¹ Afa kuni wanuna a Khezareya, a vito drakwe hi Korneliyo, afaka ali ndruna ya ntlawa wa dzana, wa butrhu ledri valiki i dra Italia.

² Afa ali mhunu wa vukhongoti, lweyi atxhavaka Xikwembu Nkulukumba kun'we ni va ndangu wakwe hinkwavu, afaka apfuna ngopfu amakari ka tiko hi swihananu, ni kukhongota Xikwembu Nkulukumba nkama hinkwawu.

³ Siku dra kukari, avini xivoniso hi nkama wa vuntlhanu na mune (15h00): Avona swinene a ntrumi ya Hosi yinhingena lomu afaka ali kone yiku ku yene: Korneliyo!

⁴ Ayilavisiki, asungula kutxhava aku: Impswini, wene Hosi? Kutani a ntrumi yiku ku yene: a swikhongoto ni swihananu swaku switlhantukeli mahlweni ka Xikwembu Nkulukumba, xiva xidrimuko ku Yene.

⁵ Swoswi-ke, rumela vavanuna a Yopa, vayavitana Simoni lweyi vamutxhulaka Petrosi;

⁶ Yene ahambukeli kaya ka Simoni, mufuki wa swikhumba, lweyi a yindlu yake yinga kusuhi ni likhulu.

⁷ Kuti loko a ntrumi leyi yivulavuliki na yene yifambile, Korneliyo avitana vavanuna vabiri ku malandra yake ni drin'we dra masotxha, ledri dra vukhongoti, amakari ka lawa mamutirelaka.

⁸ Loko avatlhamuxelile hinkwaswu, ahangavaruma a Yopa.

⁹ Hi siku ledri dritlhantamaka, vaku na vahali ndleleni, vatrhindrekeliki kusuhi ni muti, Petrosi antlhantukela lwangwini, aya khongota; afa nkama wudjula kuva wa ntlhanu na mun'we (12h00).

¹⁰ Petrosi atwa ndlala, adjula kuyada. Vaku na vahamubekisela, awutleliwa moyeni,

¹¹ ahlalela tilo dripfuliwiki, ni wun'wana ntxhumu wuxikaka, swanga hi kapulana ledri drixixiwaka amisaveni hi mune wa tiponta.

¹² Andreni ka drone afa kuni swihari hinkwaswu swa mune wa minenge, ni leswi swinkwalaka misaveni, ni tinyanyana ta tilo.

¹³ Kuhumelela ni ritu driku ku yene: Petrosi, pfuka! Tlhava uda!

¹⁴ Petrosi aku: Im'hi, we Hosi! Hikuva aningida ntxhumu ni wun'we lowu wa kuyila ni lowu wa kuka wungabasanga.

¹⁵ A ritu dritlhela drimubyela driku: Leswi Xikwembu Nkulukumba aswibasisiki, wene ungahlayi leswaku swayila.

¹⁶ Leswi swihumelela kuraru; kutani, a kapulana drisusiwa dritlhelela Tilweni.

¹⁷ Na Petrosi ahaganaganeka hi kudjula kutiva xivoniso lexi axivoniki leswaku i xa kuyini, kutlhasa anyangweni a vavanuna lava varumiwiki ha Korneliyo, lava afaka vavutisa laha yinga kone yindlu ya Simoni.

¹⁸ Vavitaniki, vavutisa, vaku xana Simoni, lweyi atxhuliwaka Petrosi, atrhamisa kola xana?

¹⁹ Loko Petrosi ahayanakanya swa xivoniso, a Moya wuku ku yene: Lavisa, a vavanuna vararu vakudjula;

²⁰ pfuka-ke, uxika, ufamba navu, ungaganaganeki, hikusa hi mine nivarumiki.

²¹ Petrosi ahangaxikela ku vavanuna, aku ku vone: Hi mine, lweyi n'wimudjulaka; n'witeli yini?

²² Vone vaku: Hipfa hi ku Korneliyo, a ndruna ya dzana, anga wanuna wa kululama, atxhavaka Xikwembu Nkulukumba, lweyi akhensiwaka hi tiko hinkwadru dra va-Yuda, apfuleteliwiki hi ntrumi ya kuxwenga, akuva akuvitanela a kaya kwake, atayingela leswi utakamubyela swone.

²³ Petrosi ahangavayamukela, vatrhama ku yene a siko ledro. Hi siku ledri dritlhantamaka, Petrosi afamba navu; ni van'wana vamakwavu va-le-Yopa vamuheketa.

²⁴ Kutani hi siku ledri drilandraka vatlhasa le Khezareya. Korneliyo yene afa avalavisela, na arambi maxaka ni vanakulobye.

²⁵ Loko Petrosi atlhasi mutini, Korneliyo ayamutlhangaveta, awa minengeni yake, amukhisamela amugandrela

²⁶ Kambe Petrosi amusekelekisa aku: Sekeleka uyima hikusa na mine ni mhunu.

²⁷ Aku na ahakhanela na Korneliyo, Petrosi anhingena ndlwini; akuma vhanu vanyingi na vahlengeletanile.

²⁸ Kutani Petrosi aku ku vone: N'waswitiva, n'wine hinkwenu, leswaku swayila ku wanuna wa mu-Yuda kutlhangana, kumbe kunhingena andlwini ya mhunu wa matiko. Kambe mine, Xikwembu Nkulukumba anikombisi leswaku aswifanelanga kuhlaya leswaku mhunu awayila, kumbe angabasanga.

²⁹ Hi leswo nitiki, ningayalisi, loko nivitaniwile. Swoswi nidjula kutiva leswaku xana n'winivitaneli yini.

³⁰ Korneliyo, ayangula aku: Kuhundri mune wa masiku, ankameni lowu, afa nili kola ndlwini kwanga na nititrona swakuda, nikhongota hi nkama wa vuntlhanu na mune (15h00), kakuhumelela wanuna amahlweni kwanga, ayambali swiyambalu swakuphatima,

³¹ lweyi atiki ku mine: Korneliyo, Xikwembu Nkulukumba ayingeli xikhongoto xaku ni kudrimuka swihananu swaku ku lava vapfumalaka.

³² Hileswo-ke ruma vhanu le Yopa, kuyavitana Simoni, lweyi atxhuliwaka Petrosi. Yene ahambukeli ndlwini ya Simoni, mufuki wa swikhumba, lweyi atrhamaka kusuhi ni nkinga wa likhulu.

³³ Hi swoswo-ke, nirumeli ku wene kuyakuvitana; na wene uyentxi swone loko utile. Swoswi-ke, hine hinkweru hikola amahlweni ka Xikwembu Nkulukumba, akuva hatayingela hinkwaswu leswi ungaleletiwa swone hi Hosi.

Ntlhamuxelo wa Petrosi

³⁴ Petrosi, kolahu asungula a kukhanela, aku: Ha kunene swoswi, naswiyingelisisa leswaku Xikwembu Nkulukumba angalangusi vuso.

³⁵ Kambe a tikweni drin'wana ni drin'wana, lweyi amutxhavaka ni kutira swakululama, awayamukeleka ku Yene.

³⁶ Hi yone mhaka leyi ayirumeliki vana va Israyele, loko avativisa a Ivangeli ya kurula ha Yesu Kriste; lweyi anga Hosi ya hinkwavu.

³⁷ N'wine n'waswitiva leswi swihumeleliki atikweni hinkwadru dra Yudeya, kusungula hi dra Galileya, a ntrhaku ka kubabatisa loko kudondrisiwiki hi Yohana.

³⁸ Yinga mhaka ya Yesu lweyi apfiki hi le Nazarete, leswaku Xikwembu Nkulukumba amutoti hi Moya wa Kuxwenga ni ntamu, atifambela na ayentxa leswi swinene, ahanyisa hinkwavu lava vakandreteliwiki hi Diyavulosi, hikusa Xikwembu Nkulukumba afa ali na Yene;

³⁹ na hine hi timboni ta hinkwaswu leswi aswiyentxiki, atikweni dra va-Yuda ni le Yerusalema; kambe vamudlayile hi kumuhayeka amhandreni.

⁴⁰ Yene, Xikwembu Nkulukumba amupfuxi kufeni hi siku dra vuraru, amunyika akuva avoneka,

⁴¹ kunge mahlweni ka tiko hinkwadru, kambe kuva ku timboni leti tihlawuliwiki khale hi Xikwembu Nkulukumba, anga hine lava hingada ni kunwa na Yene, antrhaku ka kupfuka kwake ku lava va kufa.

⁴² Na swone, ahileletile kutivisa tiko, ni kuhamba vumboni bya leswaku hi Yene lweyi angabekeliwa hi Xikwembu Nkulukumba akuva muyavanyisi wa lava vahanyaka ni wa vafi.

⁴³ Hi Yene lweyi a vaprofeta vamuhambelaka vumboni, leswaku mun'wana-ni-mun'wana lweyi apfumelaka ku Yene atakuma kudrivaleliwa ka swidoho hi vito drakwe.

A Moya wa Kuxwenga wuxikela ku va-Matiko

⁴⁴ Petrosi aku na ahakhanela, a Moya wa Kuxwenga wuxikela henhla ka hinkwavu lava afaka vayingela ritu.

⁴⁵ A vapfumeli hinkwavu va va-Yuda lava vatiki na Petrosi, vahlamala ngopfu hi kuvona leswi a nyiko ya Moya wa Kuxwenga yitxeliwaka ka va-Matiko na vone.

⁴⁶ Hikusa afa vavayingela vakhanela hi tindrimi, vadrumisa Xikwembu Nkulukumba. Petrosi ahangavutisa aku:

⁴⁷ Xana mhunu angasivela kuva vhanu lava vayamukeliki Moya wa Kuxwenga swanga ha hine, vababatisiwa?

⁴⁸ Kutani aleleta leswaku vababatisiwa avitweni dra Yesu Kriste. Ntrhaku vakombela Petrosi leswaku atrhamisa na vone masikunyana.