Marka 9 - Testamente Ledrimpswha ni Mapsalma

¹ Yesu atlhela aku ku vone: Nihlayelamfuri nan'wibyela: Van'we ku lava vayimiki kola vangakhumbiwi hi lifu vangasinavona a Mfumu wa Xikwembu Nkulukumba wuta hi ntamu.

Kundrulutiwa ka Yesu

² Antrhaku ka masiku ya ntlhanu na drin'we, Yesu ateka Petrosi na Yakobe na Yohana, avayisa anhaveni ya kuleha na vali vuswavu, kutani andrulutiwa amahlweni kwavu,

³ a swiyambalu swake swiphatima swiva swa ntlhohe kufana ni xitrhwatrhwa; lakakuva kungena muhlampswi amisaveni lweyi angakotaka ku swibasisisa xiswoswo.

⁴ Kutani a vadondrisiwa vavona Moxe na Eliya vahumelela ku vone, vakhanela na Yesu.

⁵ Petrosi aku ku Yesu: Mudondrisi, i swahombe loko hitrhamisa kola! Ahiyakeni mintronga miraru: Mun'we wuva waku, mun'wana wuva wa Moxe, mun'wana kambe wuva wa Eliya.

⁶ Ke, afa angativi leswi ahlayaka swone, hikusa vone afaka valinikutxhava ngopfu.

⁷ Kutani a tlavi drihumelela, drivafukumeta, ni ritu ledri dripfaka tlavini driku: Lweyi i N'wananga lweyi arandrekaka muyingelani!

⁸ Kutani a vadondrisiwa vahatla valavisa a matlhelo hinkwawu vangahavoni mhunu loko ange Yesu ntsena kun'we na vone.

⁹ Loko vafulamela hansi ka nhava, Yene avalaya leswaku vangabyeli mhunu leswi vaswivoniki, loko N'wana wa Mhunu angasinapfuka-kufeni a makari ka vafi.

¹⁰ Vone vabekisa a ritu ledro atimbilwini tavu, na vavutisana leswaku xana a kupfuka-kufeni, amakari ka vafi he swakuyini?

¹¹ Vamuvutisa vaku: Ha yini a vatrali vaku Eliya afanela a kuranga ata?

¹² Yene aku ku vone: Eliya swifanekeli aranga ata ha kunene, atlhelisela hinkwaswu akululameni. Nakone xana ku Matralwa kutraliwi yini hi N'wana wa Mhunu, swaku atavaviseka ngopfu ni kudreliwa?

¹³ Kambe nan'wibyela leswaku Eliya atile mfuri vamuyentxi hinkwaswu leswi vangaswirandra, swanga heswi kutraliwiki hinkonta yake.

Yesu ahanyisa a wa mimoya leyi mimfani

¹⁴ Loko vatlhasa ku vadondrisiwa van'wana, vavona xitrhungu xikulu lexi xivatrhandreliki, ni vatrali lava vakanetanaka navu.

¹⁵ A xitrhungu hinkwaxu xaku ximuvona xihlamala xitrutruma xiyamulosa.

¹⁶ Kutani Yene avavutisa aku: Xana n'wikanetana yini na vone?

¹⁷ Mun'we axitrhungwini ayangula aku ku Yene: Mundondrisi, nitisi a n'wananga ku wene, angani moya wa mbheveve.

¹⁸ Hinkwaku lomu wu mukhomaka, wamutlatlalata, kutani a mufana asungula a kutlhutlha ni duvi, aketrela menyo, awomelela. Nikombeli a vadondrisiwa vaku leswaku vahlongola a moya lowo kambe vahlulekile.

¹⁹ Kambe Yene avayangula aku: Yoo! Lixaka ledri dringapfumelikiki! Xana nitava na n'wine kuyagama kwini? Xana nitan'wilehisela mbilu kuyagama kwini? Buyisani a mufana lweyo ku mine.

²⁰ Kutani vamutisa ku Yene. A moya lowu afaka wuli ku mufana lweyo, loko wuvona Yesu, wuhatla wumutrekatrekisa hi ntamu, awa hansi, ava apfingalava ahumexa duvi.

²¹ Yesu avutisa a tatana wakwe aku: Xana swamuhumeleli swiyentxa leswi hi nkama wini? Ayangula aku: Swasunguli na ahali ntrongo.

²² Mfuri wumutxukumeti kunyingi andrilweni kumbe amatini akuva wumusuvisa. Loko uswikota, hipfune uhiyentxela vurombe!

²³ Yesu aku ku yene: Loko kuli kuswikota; hinkwaswu swakoteka ku lweyi apfumelaka.

²⁴ A tatana wa ndrisanyana ahatla abandlukana aku: Napfumela, kambe niyengeteleli kupfumela kwanga!

²⁵ Yesu avoniki xitrhungu lexi xitrutrumeliki ku yene, atshinya a moya lowu mfani aku ku wone: We moya wa mbheveve ni kuka ungayingeli, nakuleleta nili: huma ku ndrisanyana, ungahanhingeni ku yene!

²⁶ A moya wubandlukana wumutrekatrekisa hi ntamu wuhuma. A ndrisanyana andruluka swanga hi loko afile, lakakuva lava vanyingi vaku afile.

²⁷ Kambe Yesu amukhoma hi voko, amusekelekisa, yene ayima.

²⁸ Kuti loko Yene atlheleli ndlwini, a vadondrisiwa vakwe vamuvutisa na vali vuswavu vaku: Hine hihluleki ha yini kuwuhumexa?

²⁹ A vayangula aku: A lixaka ledri adrina kuhuma loko kunge hi kukhongota (ni kutitrona).

Yesu avulavula kambe hi lifu drakwe

³⁰ Yesu ni vadondrisiwa vasuka kolahu vatremakanya hi dra Galileya, kambe Yesu afa angarandri kutibyiwa hi mhunu.

³¹ Hikusa afa adondrisa a vadondrisiwa vakwe aku ku vone: A N'wana wa Mhunu atanyiketiwa amavokweni ya vhanu. Vatamudlaya, kambe atapfuka loko kuhundri masiku mararu.

³² Kambe vone afa vangadriyingeli a ritu ledro, na kone afa vatxhava a kumuvutisa.

Lweyi nkulu a Mfun'wini wa Matilo

³³ Kutani vatlhasa a Kapernawume. Loko vali ndlwini, Yene avutisa a vadondrisiwa aku: Xana afa mikhanela yini andleleni?

³⁴ Kambe vone vamiyela, hikusa andleleni afa vakanetani hileswaku lweyi anga nkulu hi mani.

³⁵ Yene, atiki atrhamisa, avitana lava va khume na vabiri aku ku vone: Loko mhunu adjula kuva lweyi wa kuranga, atava lweyi wa vugamu ni nandra wa hinkwavu.

³⁶ Kutani atekiki ntrongwana, amuyimisa amakari kwavu, amuxingara, aku ku vone:

³⁷ Lweyi ayamukelaka mun'we wa vatrongwana vanga hi lava hi vito dranga awaniyamukela, na kone lweyi aniyamukelaka angayamukeli mine, kambe ayamukela lweyi anirumiki.

Lweyi angalwiki na hine, ayima na hine

³⁸ Yohana aku ku Yene: Mundondrisi, hivoni mhunu ahlongolaka mademoni hi vito draku, kambe himutsimbile, hi leswi angahilandrikiki.

³⁹ Kambe Yesu aku: N'wingamutsimbeni hikusa akuna mhunu lweyi atakahamba a mahlolana hi vito dranga, atakakota kuhatla anihleva.

⁴⁰ Hikusa lweyi angalwikiki na hine, ayima na hine.

⁴¹ Hikusa lweyi ataka n'winwisa a ntrheko wa mati hi vito dranga hi leswi n'winga vaka Kriste, nihlayelamfuri nan'wibyela nili, angaka angalahlekeliwi hi hakelo drakwe.

Ungayise van'wana a kudoheni

⁴² Yesu aku: Lweyi atakayisa kudoheni mun'we wa lava vatrongo lava vapfumelaka ku mine, swingava swahombe ku yene loko atrimbeleliwa ribye dra kusila anhan'wini, atxukumetiwa likhulwini.

⁴³ Loko a voko draku drikuyisa akudoheni, dritreme. I swahombe ku wene a kunhingena avutomini, atilweni na uni voko drin'we, kutlula loko uya akheleni, andrilweni lowu wungatimekiki na una mavoko mabiri. [

⁴⁴ Laha swivungu swingafikiki ni laha ndrilo wungatimekiki.]

⁴⁵ Ni loko a nenge waku wukudohisa wutreme. I swahombe ku wene kunhingena Tilweni na uni nenge wun'we kutlula loko utxukumetiwa akheleni na una minenge mibiri. [

⁴⁶ Lomu a swivungu swingafikiki ni ndrilo wungatimekiki]

⁴⁷ Ni loko a tihlu draku drikudohisa drisuse. I swahombe unhingena a Mfun'wini wa Xikwembu Nkulukumba na una tihlu drin'we ntsena, kutlula loko una mahlu mabiri utxukumetiwa kheleni,

⁴⁸ lomu a swivungu swingafikiki, ni ndrilo wungatimekiki.

⁴⁹ Hikusa lweyo ni lweyo atalungiwa hi ndrilo, kufana ni loko a munyu wulunga a swakuda.

⁵⁰ A munyu i ntxhumu lowu wunene, kambe loko wone wupswhama, xana wutanandrikisa ha yini ke? Djulani, mun'wana-ni-mun'wana akulunga a vutomi byake, n'wihanya hi kurula hinkwenu van'we ni van'wana.