Marka 7 - Testamente Ledrimpswha ni Mapsalma

Swihena swa khale swa va-Yuda

¹ A vafarisi ni van'we va vadondrisi va Nawu lava vapfiki Yerusalema, vahlengeletani ku Yene.

² Vavona van'we va vadondrisiwa lava afaka vada makati hi mandla lawa ya nsila, hileswaku hi mandla lawa yakuka manga basanga.

³ A vafarisi ni va-Yuda hinkwavu, avadi loko vangahlambisisanga a mandla swinene, vabekisa xihena xa vakhale

⁴ Nakone loko vapfa kuxaveni avadi na vangahlambisisanga a mandla. Mfuri i swinyingi leswi vangaleletiwa leswaku vaswibekisa: swanga hi kunhlampswa a mintrheko, ni makhuwana, ni swibya swa nsuku.

⁵ Hikola ka leswo a vafarisi ni vadondrisi va Nawu vangamuvutisa vaku: Xana a vadondrisiwa vaku avafambi hi xihila xa vakhale, na kone vadela yini kati hi mandla lawa yakuka mangabasanga?

⁶ Yene avayangula aku: Ezaya ahlayelimfuri loko ahlayi tenu vamandrendre swanga hi leswi switraliwiki: A tiko ledri drinitxhava hi maritu, kambe a timbilu tavu ti le kule na mine.

⁷ Kambe vanigandrela mahala, hi kudondrisa tidondro le tinga swileleto swiyentxiwiki hi vhanu.

⁸ N'wine n'witrika a nawu wa Xikwembu Nkulukumba, mibekisa a tidondro ta vhanu.

⁹ Ayengeta aku ku vone: Xileswo n'widlaya a nawu wa Xikwembu Nkulukumba, akuva n'wibekisa xihena xenu.

¹⁰ Moxe adondrisi leswaku: Txhava a tatana waku ni mamana waku. Nakone: Lweyi arukaka a tatana wakwe ni mamana wakwe atatremeliwela lifu.

¹¹ Kambe n'wine n'widondrisa leswaku loko a mhunu aku ku vapswali lava vapfumalaka: leswi afaka ningan'wipfuna ha swone i swa mhamba ya Xikwembu Nkulukumba,

¹² angahasindrisiwi akupfuna tatana wakwe kumbe mamana wakwe hi ntxhumu.

¹³ Ke, n'witrika a kunyika lisima a nawu wa Xikwembu Nkulukumba, hi tidondro tenu n'wititlutisela ku vana venu. Ni swin'wana swakutala leswi swanga ha swone maswiyentxa.

Leswi swinyamisaka vhanu

¹⁴ Yene ayengeta avitana a xitrhungu aku ku xone: Niyingelani hinkwenu n'wiva n'wiyingelisisa.

¹⁵ Akuna xantxhumu lexi xinganyamisaka mhunu loko xinhingena ku yene, kambe leswi swihumaka ku mhunu hi swone leswi swimunyamisaka. [

¹⁶ Loko a mhunu ali ni tindleve ta kuyingela, ayingiseti.]

¹⁷ Kuti loko Yene anhingeni andlwini na asuka xitrhungwini, a vadondrisiwa vakwe vamuvutisa hita xifaniso lexo.

¹⁸ Ahangaku ku vone: xana-ke na n'wine an'wingayingelisisi? Xana an'wiyingelisisi leswaku hinkwaswu leswi a mhunu aswidaka kumbe kunwa, loko swinhingena andreni aswikoti kumunyamisa,

¹⁹ hikusa aswinhingeni mbilwini yake, kambe akhurini, swiva swihumexiwa nhoveni? Hi leswo Yene akombisa leswaku a swakuda hinkwaswu swibasile.

²⁰ Nakone afa avabyela aku: Leswi swihumaka amhunwini hi swone swimunyamisaka.

²¹ Hikusa andreni kwake kuhuma miyanakanyu leyi mimfani ni vumbuye, ni kuyiva, ni kudlaya,

²² ni kuwoswana, ni kunavela ka vukosi, ni mona, ni kukanganyisa, ni kutitrika, ni matrhoho, ni swisandru, ni kutikukumuxa, ni vusinge.

²³ Hinkwaswu leswo swakubiha swihuma andreni, kutani swinyamisa a mhunu.

Kupfumela ka wansati wa matiko

²⁴ Atiki asuka kone aya mintremanweni ya le Tiri. Loko anhingeni andlwini afa angarandranga leswaku switibyiwa hi mhunu leswaku akone. Kambe angaswikotanga kutifihla.

²⁵ A wansati lweyi a n'wanake wa wanhwanyana afaka ani moya lowu mfani, ayingela leswaku Yene akone, ahatla anhingena, akhisama minengeni yake.

²⁶ A wansati lweyo afa angali mu-Yuda, kambe afa ali mu-Sirofinisiya. Amukombela leswaku ahlongola a demoni ku n'wanakwe.

²⁷ Kambe Yene ayangula aku: Trika a vana vada vaxura, kusungula. Hikusa ahi swa hombe kuteka a kati dra vana vatxukumetela a swimbyanyana.

²⁸ A wansati ayangula aku: Im'na, we Hosi, kambe na swone swimbyanyana swida vuntlhantlha lebyi byiwaka hansi ka tafula dra vana.

²⁹ Kutani Yene amubyela aku: Uhlaya swone! Muka, hikusa a demoni drihumile ku n'wanaku.

³⁰ Lweyi wansati atiki amuka a kaya, ayakuma a n'wanakwe na ayetleli vunan'wini, hikusa a demoni afa drihumile ku yene.

Kuhanyisiwa ka wa kufa-tindleve ni kudukudela

³¹ Kutani Yene atlheli asuka atikweni dra Tiri atremakanya hi dra Sidoni, akongoma tiva dra le Galileya, hi kutremakanya mintremano ya Dekapolisi.

³² Kutani a vhanu vamutisela a mhunu wa kufa-tindleve, wa kudukudela, vakombela Yesu leswaku amuntlhanteka a mavoko.

³³ Kuti loko amutrhineteli tlhelweni akulenyana ni xitrhungu, anhingenisa tintiho atindleveni takwe, ava athukela mari amukhumba lidrimi.

³⁴ Kutani alavisa Tilweni, ahefemula aku ku yene: Efatha! Ritu ledri hi Xiaramu drihlayaka leswaku Pfuleka.

³⁵ Xikan'we kupfuleka a tindleve ta mhunu lweyo, kuntrhunxeka nsiha wa lidrimi drakwe, ava akhanela swinene.

³⁶ Kolahu ahangavaleleta kuka vangabyeli mhunu. Kambe loko atekisa kuvaleleta, hi laha vone vatekisaka kuswihangalasa.

³⁷ Nakone afa vahlamala ngopfu-ngopfu, vaku: Ayentxi hinkwaswu swinene. Ayingelisa va kufa-tindleve ni kuvulavulisa timbheveve.