Marka 6 - Testamente Ledrimpswha ni Mapsalma

Yesu loko anga yamukeliwi a Nazarete

¹ Kuti loko Yesu aya atikweni dra kwavu, a vadondrisiwa vakwe vamulandra.

² Kutani loko Savata dritlhasile asungula a kudondrisa asinagogeni. Lava vanyingi vamuyingeliki vahlamala vaku: Xana lweyi aswikumi kwini leswi? Hi lebyi bya kuyini a vutlhari lebyi anyikiwiki byone? Ni mahlolana lawa yangi hi lawa mayentxiwaka ha yene?

³ Xana lweyi, ahi yene lweyi wa muvatli, n'wana Maria ni makwa Yakobe, na Yosefa, na Yudasi, na Simoni? Xana a vamakwavu va vaxisati ava kola kweru, xana? Kutani vakhunguvanyeka ha Yene.

⁴ Kambe Yesu aku ku vone: A muprofeta angapfumali a xitxhavu, loko kungali atikweni dra kwavu, amaxakeni ni le ndlwini yake.

⁵ Kutani angayentxanga kone, nambi drili hlolana drin'we, loko kunge kuntlhanteka a mavoko ku timbabyi tinge-tingani, atihanyisa.

⁶ Ahlamala hi kukala kupfumela kwavu. Ahangatifambela hi miti adondrisa.

Yesu aruma a vadondrisiwa lava khume na vabiri

⁷ Kutani avitana lava va khume na vabiri asungula a kuvaruma ha vabiri-vabiri,

⁸ avanyika a ntamu wa kuhlongola mimoya leyi mimfani avaleleta leswaku vangateki ntxhumu wa ndlela, loko yinge nhonga ntsena; vangateki kati, ni hwama, ni mali a mabandini,

⁹ kambe vayambala ntsena tintangu, mfuri vangayambali swiyambalu swibiri.

¹⁰ Atlhela aku ku vone: Hinkwaku lomu n'witakanhingena kone, trhamisani, n'wikondra n'wisuka ku tiko ledro.

¹¹ Nakone loko ku mun'we mbangu vayala a kun'wiyamukela ni kun'wiyingiseta, sukani kone n'wiphumuna a ntrhuri lowu wunga minengeni yenu, swanga xitiviso ku vone.

¹² Kutani a vadondrisiwa vafamba, vayakhongotela a vhanu leswaku vandruluka.

¹³ Nakone vahlongola mademoni minyingi, vatota hi mafura a timbabyi tinyingi, vatihanyisa.

Kufa ka Yohana Mubabatisi

¹⁴ A mufumi Heroda ayingeli swa Yesu, hikusa a vito drakwe afa dridrumile matlhelo hinkwawu, na van'we vaku: Yohana Mubabatisi apfukiki kufeni, hi swoswo-ke angani ntamu wa kuyentxa mahlolana.

¹⁵ Kambe a van'wana afa vaku: Hi Eliya. A van'wana kambe, vaku: I muprofeta, swanga hi mun'wana wa vaprofeta.

¹⁶ Kambe Heroda, aku awaswiyingela, aku: Kunene Yohana lweyi ningamutrema a nhloko, apfukile.

¹⁷ Ha kunene Heroda hi ntshima yake, afa arumi vhanu kukhoma Yohana, vamupfalela abohelweni hinkonta ya Herodiyasi a nkata Filipi makwavu, hikusa afa amutekile akuva nsati wakwe.

¹⁸ Yohana afa abyeli Heroda aku: Aswikufanelanga a kuteka a nsati wa makwenu.

¹⁹ Nakone Herodiyasi afa anyenya Yohana Mubabatisi adjula ni kumudlaya, kambe afa angana ntamu wa kuyentxa leswo.

²⁰ Hikuva Heroda afaka atxhava Yohana, hi kumutiva leswaku i nuna wa kululama ni wa kuhlawuleka afa amuxirelela. Mfuri afa loko amuyingela, avaviseka ngopfu, kambe nambi swili tanu, afa anyoxa loko amuyingela.

²¹ Kambe kutlhasa a siku drinene ku Herodiyasi. Loko Heroda ahambela a tindruna takwe, ni varangeli vayimpi, ni vakulu va-le-Galileya, a nkhuvu wa kudrimuka kubelekiwa kwake.

²² Kutani a n'wana wa Herodiyasi wa wanhwanyana anhingena akina. Atrhavisa Heroda ni lava vatrhamiki na yene akudeni, lakakuva a mufumi abyela lweyi wanhwanyana, aku: Kombela leswi uswirandraka, nitakunyika.

²³ Ayengeta amudumbisa, aku: Leswi utakakombela swone, nitakunyika, nambi kuli kukupumbela a mfumu wanga hi le makari.

²⁴ Lweyi wanhwanyana ahumiki ayavutisa a mamana wakwe aku: Xana nitakombela yini? A mamana wakwe aku: Kombela a nhloko ya Yohana Mubabatisi.

²⁵ Lweyi wanhwanyana anhingeniki hi kukahlula, akombela ku mufumi, aku: Nirandra leswaku uninyika swoswi-swoswi, ambakeni, a nhloko ya Yohana Mubabatisi.

²⁶ Kutani a mufumi avaviseka, kambe hinkonta ya kudumbisa kwake, ni hinkonta ya lava vatrhamiki akudeni, angakotanga kumuyalela.

²⁷ Ahatliki aruma mun'we ku masotxha, amuleleta a kubuyisa a nhloko ya Yohana. A musotxha ahangafamba ayatrema a nhloko ya Yohana,

²⁸ ayibuyisa hi mbaka, anyika lweyi wanhwanyana. A nhwanyana ayayinyika a mamana wakwe.

²⁹ Vaswiyingela a vadondrisiwa va Yohana vata, vateka a ntrumbu wakwe, vayawulahla axireni.

Yesu aphamela xitrhungu xa kutlula ntlhanu wa makume ya madzana (5000)

³⁰ Loko a vadondrisiwa vabuyile vahlengeletani ku Yesu, vamudrungulela hinkwaswu leswi vaswitiriki, ni leswi vaswidondrisiki.

³¹ Yene aku ku vone: Tanani, ahifambeni vusweru ambangwini wa hula mitawisa kutrongo. Hikusa a vhanu vanyingi afa vata, na vafamba lakakuva vone vangakumi ni nkama wakuda.

³² Kutani vasuka hi byatrhu, vaya ku mbangu wa hula na vali vuswavu.

³³ Kambe a vhanu vanyingi vavavona loko vafamba vavativa, kutani vatrutrumela kone hi minenge vapfa mitini hinkwayu, vaya varangela.

³⁴ Aku ahuma abyatrhwini, Yesu avona xitrhungu xikulu. Axitwela vurombe hikusa afa xifana ni tihamba leti tingeke na mubyisi; asungula a kuvadondrisa mintxhumu minyingi.

³⁵ Loko dripela, a vadondrisiwa vatrhindrekela ku Yene vaku: Lavisa a mbangu lo i hula, na kone a dambu drapela.

³⁶ Vatlhelise vatiyela amasin'wini ni le mitini leyi mihitrandreliki, vayatixavela a swakuda.

³⁷ Kambe Yene avayangula aku: Vanyikani n'wine vada. Vaku ku yene: Xana hitayaxava makati ya madzana mabiri (200) ya mali ya ntlhohe hitatavanyika vada xana?

³⁸ Yesu aku ku vone: Xana n'wini makati mangani, xana? Fambani n'wiyalavisa. Vone loko vaswitivile vayangula vaku: Ntlhanu wa makati na tinhlampfi tibiri.

³⁹ Kutani avaleleta leswaku vatrhamisisa a vhanu hinkwavu hi mintlawa-ntlawa, abyanyini lebyi bya lihlaza.

⁴⁰ Vahangatrhamisa hi mintlawa-ntlawa ya dzana (100), kumbe ya ntlhanu wa makume (50).

⁴¹ Kutani ateka a makati ya ntlhanu ni tinhlampfi tibiri, alavisa atilweni atlangela Xikwembu Nkulukumba. Hi kulandra akhemelela a makati anyika a vadondrisiwa akuva vayavela a vhanu, na tone tinhlampfi tibiri avayavela hinkwavu.

⁴² A vhanu vahangada hinkwavu vava vaxura,

⁴³ vava varolela a swibubyana swa makati ni minhluvi ya tihlampfi, vatata a swihundru swa khume na swibiri.

⁴⁴ Lava vadiki a makati afa vali vhanu va ntlhanu wa makume ya madzana (5.000).

Yesu afamba henhla ka mati

⁴⁵ A ntrhaku ka leswo, Yene asindrisi a vadondrisiwa vakwe a kunhingena abyatrhwini, vamurangela halahaya Betsaida na yene ahahangalasa a xitrhungu.

⁴⁶ Kuti loko avahangalasile asuka aya anhaveni akuyakhongota.

⁴⁷ Amadambyeni afa a byatrhu drili makari ka tiva, na Yene asali ntlhaveni vuswake.

⁴⁸ Kuti loko avavona a vadondrisiwa na vaxaniseka hi kuweta, hileswi a mheho afaka yivayalela. Ata ku vone ankameni wa mpundru, na afamba hi le henhla ka lwandle, afa adjula a kuvahundra hi tlhelo aya mahlweni.

⁴⁹ A vadondrisiwa loko vamuvona, na afamba hi le henhla ka lwandle, vapimisa leswaku i xipoko, kutani vabandlukana hi kutxhava,

⁵⁰ hikusa hinkwavu afa vamuvonile kutani vatxhukisiwa, kambe Yene ahatla akhanela navu aku: Tiyisani timbilu; hi mine minga txhaveni!

⁵¹ Ahanganhingena abyatrhwini ava kun'we na vone, kutani a mheho yimiyela. A vadondrisiwa vahlamala ngopfu.

⁵² Hikusa afa vangayingelisisanga a swa makati, hi leswi afaka a timbilu tavu tinonon'hwa.

Yesu ahanyisa timbabyi a Genizarete

⁵³ Kuti loko vawelile, vaya tikweni dra le Genizarete vakhinsa kone.

⁵⁴ Loko vahumi byatrhwini, a vhanu vahatla vamutiva,

⁵⁵ hikola ka leswo a madrungula ya ku tlhasa kwake mahangalaka hi tiko ledro hinkwadru, vasungula a kubuyisa hi vunanu lava vavabyaka, hinkwaku lomu vayingelaka leswaku Yene akone.

⁵⁶ Mfuri hinkwaku lomu afaka vanhingena kone: amitanini, ni le switikwanini, a vhanu afa vabeka timbabyi atihubyini, vakombela akuva a timbabyi tikhumba a swiyambalu swake. Hinkwavu lava afaka vamukhumba, afa vahanyisiwa.