Marka 5 - Testamente Ledrimpswha ni Mapsalma

Kuhanyisiwa ka mhunu wa mimoya leyi mimfani

¹ Kutani vatlhasi halahaya ka tiva, atikweni dra va-Gerasi.

² Aku na ahahuma byatrhwini, kuta mhunu lweyi angani moya lowu mfani, atatamutlhangaveta.

³ Afa atrhama maxireni, mfuri afa kungena mhunu lweyi aswikotaka a kumutrimba hi timpentxana.

⁴ Hikusa afa atrimbiwi kunyingi a mavoko ni minenge hi timpentxana, kambe yene afa atrhova hinkwaswu kutani afa kungena mhunu lweyi aswikotaka a kumunabyalisa.

⁵ Vusiku ni nhlikanhi, amaxireni ni le tinhaveni, afa a ba huwa, na atipswetula hi maribye.

⁶ Atiki avona Yesu, na ahali kule atrutruma, atatawa hi matrolo aminengeni yake,

⁷ abandlukana aku ku yene: Udjula yini ku mine wene Yesu, N'wana wa Xikwembu Nkulukumba lweyi anga Henhla-henhla? Nikukombela hi kuhlambanya hi Xikwembu Nkulukumba, unganixanise!

⁸ Hikusa afa aku ku yene: We moya lowu mfani, huma ku mhunu lweyi.

⁹ Kutani amuvutisa, aku: Xana a vito draku u mani? Yene ayangula aku: A vito dranga, ni butrhu, hikusa hi vanyingi.

¹⁰ Kutani amukhongota ngopfu aku: Ungahihlongoli ku tiko ledri.

¹¹ Afa kuni ntlhambi wukulu wa tinguluve, lowu afaka wubyisiwa anhaveni.

¹² Kutani a mimoya leyi mimfani mimukhongota miku: Hirumi tinguluveni hiya nhingena ku tone.

¹³ Yene apfumela, kutani a mimoya leyi mimfani mihuma amhunwini, miyanhingena atinguluveni, leti afaka tili kusuhi ni makume mabiri ya madzana (2.000). Tahangatrutruma hinkwatu hi ligingiri dra tiva, tiyatika ativeni.

¹⁴ A vabyisi va tone vatrutruma vaya mutini ni le matlhelweni, vayabika leswi swihumeleliki. Kutani a vhanu vanyingi vaya ku Yesu;

¹⁵ vavona a mhunu lweyi afaka ani mademoni, atrhamisile na ayambalile, atlharihile, yene lweyi afaka avini butrhu. Loko va vona leswi vatxhava.

¹⁶ Kolahu lava vaswivoniki va vatlhamuxela hi laha swihumeleliki ha kone ku lweyi wa mimoya leyi mimfani ni swa tinguluve.

¹⁷ Vahangasungula kumukhongota leswaku asuka atikweni dravu.

¹⁸ Kuti loko anhingena abyatrhwini, a mhunu lweyi afaka ani mademoni, amukhongota akuva afamba na Yene.

¹⁹ Kambe Yene angamupfumeleli, ntrhaku aku ku yene; timukeli a kaya kwaku uyavabyela leswi a Hosi yikuyentxeliki swone, ni hi laha yiviki ni lilondro ku wene!

²⁰ A mhunu lweyo ahangasuka ayasungula a kudrungula atikwanini dra Dekapolisi hinkwaswu leswi swikulu Yesu amuyentxeliki swone. Kutani a vhanu va kone hinkwavu vahlamala.

Xikombelo xa Yayirusi

²¹ Loko Yesu atlheli awelela halahaya ka tiva hi byatrhu, a xitrhungu xikulu xihlengeletana ku yene.

²² Kutani kutlhasa mun'we wa mufambisi wa sinagoga, lweyi valiki i Yayirusi, atrhindrekela ku Yesu, atiwisa aminengeni yake,

²³ amukhongota ngopfu, aku: A n'wananga wa wanhwanyana a kusuhi ni kufa. Tana, umuntlhanteka a mavoko, akuva a hanyisiwa.

²⁴ Kutani Yene afamba na yene. Ankameni wolowo, a xitrhungu lexi xikulu afa ximulandra, ximukamanyeta hi matlhelo hinkwawu.

Kuhanyisiwa ka mbabyi ya wansati

²⁵ Afa kuni wansati lweyi avabyiki hi vukuvali hi malembe ya khume na mabiri,

²⁶ axaniseki ngopfu hi tin'anga tinyingi, ahumexiki ni vukosi byake hinkwabyu, kambe aswipfunanga ntxhumu, ntsena swehundrisa!

²⁷ Atiki ayingela timhaka ta Yesu, ata hi le ntrhaku amakari ka xitrhungu, akhumba xiyambalu xakwe

²⁸ hikusa afa aku: Loko ningakota a kukhumba a xiyambalu xakwe ntsena, nitahanyisiwa.

²⁹ Hileswo-ke, ahundra hi le xikari ka xitrhungu ayima antrhaku ka Yesu kutani akhumba a xiyambalu xakwe. Hi nomu-lo atitwa na antrhunxekile kuxanisekeni kwake ava avona leswaku ahanyisiwile.

³⁰ Yesu na Yene aswitwa andreni kwake leswaku kuhumi ntamu wa kukari ku yene, andrulukela xitrhungwini aku: Xana hi mani lweyi akhumbiki swiyambalu swanga?

³¹ A vadondrisiwa vakwe vaku ku yene: Waswivona leswaku a xitrhungu xa kukamanyeta, kambe wahavutisa leswaku hi mani lweyi akukhumbiki?

³² Yene afa aralarala a matlhelo hinkwawu atavona lweyi ayentxiki leswo.

³³ Kambe, lweyi wansati, atxhava, arurumela, hi kutiva leswi swiyentxiwiki ku yene. Atrhindrekela ku Yesu amukhisamela amubyela hinkwaswu leswi swinga swone.

³⁴ Kambe Yesu aku ku yene: N'wananga, akupfumela kwaku kukuhuluxile; famba hi kurula. Utrhunxekile a kuxanisekeni kwaku.

Kupfuxiwa ka n'wana Yayirusi a kufeni

³⁵ Kuti loko Yene ahakhanela, kutlhasa a vhanu lava vapfaka hi le kaya ka Yayirusi vaku ku yene: A n'wanaku afile, xana wahakaratela yini a Mudondrisi?

³⁶ Kambe Yesu angalondrisanga ritu ledri vadrikhanelaka, aku ku Yayirusi: Ungatxhave, pfumela ntsena.

³⁷ Kutani angapfumelelanga mhunu a kumuheketa, loko vange va Petrosi na Yakobe na Yohana, amakwa Yakobe.

³⁸ Loko vatlhasile andlwini ya Yayirusi, ayingela pongwe ni kuvona lava vadrilaka, vabongosaka ngopfu,

³⁹ anhingena aku ku vone: Xana n'wibela yini a pongwe? N'widrilela yini? A nhwanyana angafanga kambe ekhutriyela.

⁴⁰ Kutani vamuhleka. Kambe Yene avahumexa hinkwavu. Ateka a tatana wa nhwanyana ni mamana wakwe ni lava afaka vali na Yene ayanhingena lani a nhwanyana afaka ali kone.

⁴¹ Kutani amukhoma hi voko aku ku yene: Talita kumi, hileswaku: Nhwanyana, pfuka!

⁴² Hi nomu-lo, lweyi wanhwanyana apfuka, asungula ni kutifambela; na afa ali wa khume dra malembe na mabiri. Hinkwavu vava ni kuhlamala loku kulu.

⁴³ Kutani ahangavaleleta ngopfu leswaku vangatxhuke vabyela mhunu leswi swihumeleliki, ntrhaku avabyela leswaku vamunyika a swakuda.