Marka 15 - Testamente Ledrimpswha ni Mapsalma

Yesu amahlweni ka Pilatu

¹ Amixweni, a vaprista lava vakulu vahlengeletana, ni vakulu va tiko ni vadondrisi va Nawu, ni hinkwaswu swiro swa huvu akuva vatrema a mhaka ya Yesu. Ntrhaku ka kumutrimba vamuteki vayamunyiketa ku Pilatu.

² Kutani Pilatu amuvutisa aku: U Hosi ya va-Yuda, xana? Yesu amuyanguli aku: Uhlayelamfuri.

³ Swanga hi leswi a vaprista lava vakulu afaka vamurambela hi swakutala,

⁴ Pilatu atlhela amuvutisa aku: Awuyanguli ntxhumu hi leswinyingi vakurambelaka ha swone?

⁵ Kambe Yesu angayangulanga ntxhumu, Pilatu ahlamala ngopfu.

Yesu ayavanyiseliwa lifu

⁶ Hi ntolovelo ankameni wa nkhuvu wa Paska, Pilatu afa avantrhunxela mubohiwa mun'we, lweyi afaka a vhanu vamukombela.

⁷ Ke afa kuna mun'we, lweyi afaka vaku i Barabasi. Afaka abohiwi kun'we ni vapfuxi va dzolonga hikuva, vadlayi mhunu adzolongeni droledro.

⁸ A xitrhungu xitrhindrekela, xikombela Pilatu leswaku antrhunxa mubohiwa mun'we, swanga hi ntolovelo wavu.

⁹ Kolahu avavutisa aku: Xana n'wirandra akuva nin'wintrhunxela Hosi ya va-Yuda xana?

¹⁰ Hikusa afa aswitiva swinene leswaku a vaprista lava vakulu afa vanyiketi Yene hi matrhoho.

¹¹ Kambe a varangeli va vaprista vahlohlotela a xitrhungu akuva xikombela leswaku antrhunxa Barabasi.

¹² Pilatu atlhela avavutisa aku: Kutani nitayentxa yini hi mhunu lweyi n'wiliki i Hosi ya va-Yuda?

¹³ Kutani a xitrhungu xibandlukana xiku: Muvambe!

¹⁴ Pilatu asindrisi aku: Ayentxi yini xa kubiha? Kolahu a vhanu vatshima kubandlukana vaku: Muvambe!

¹⁵ Kutani Pilatu, antrhunxa Barabasi hikuva afaka anavela kutrhavisa xitrhungu. Ntrhaku arumi kupswhitiwa Yesu na avanyiketa akuva avambiwa.

A masotxha matreketrela Yesu

¹⁶ A masotxha mamuyisa alinxonxeni andlwini ya vufumi, kutani va vitana kone a butrhu hinkwadru.

¹⁷ Vamuyambexa a xiyambalu xa libungu, vakondla ni hara ya mitwa vamubehela anhlokweni.

¹⁸ Kutani vasungula a kumulosa vaku: Xawani Hosi ya va-Yuda!

¹⁹ Hi nkama wolowo afa vamuba hi nkhavi, vamuthukela mari, vawa hi matrolo vamugandrela.

²⁰ Ntrhaku vamutreketrela, vamususa xiyambalu lexi xa libungu, vamuyambexa swiyambalu swake. Hi kulandra vamuteka vayamuvamba.

Kuvambiwa ka Yesu

²¹ Andleleni vakumi wanuna mun'we na apfa masin'wini, kutani vamusindrisa kubyatrha a xihambanu xa Yesu, a vito valiki i Simoni mu-Kirene anga tatana wa Alexandre na Rufu.

²² Vayisi Yesu ambangwini lowu valiki i Gologota, swidjulaka kuhlaya leswaku Pala.

²³ Vamunyiki a vhinyo ledri patraniki ni muri lowu valiki i mira, kambe Yesu anganwanga.

²⁴ Hi kulandra vamuvamba axihambanwini. Kutani vayavelana swiyambalu swake, ntrhaku kakuva vaswihlahluva hi pswhampswha, akuva vatavona leswaku mun'wana-ni-mun'wana atakuma yini.

²⁵ Afa wuli nkama wa vuraru wa mixo, loko vamuvamba.

²⁶ A henhla ka xihambanu vabeki papela ledri dritraliwiki a mhaka ya kutremeliwa kwake ledri driliki: A HOSI YA VA-YUDA.

²⁷ Kutani vavambi kun'we na Yene a tinsulavoya tibiri, yin'we axineneni xakwe, yin'wana aximantrhini. [

²⁸ Xileswo kuhetiseki a Matralwa lawa maliki: Avambiwi kun'we ni swidohi.]

²⁹ Lava afaka vahundra kone afa vamuruketela, na vamuhlakahlela tinhloko, vaku: Ha! Wene mubutrhuti wa Tempele, uva uyiyaka ha masiku mararu!

³⁰ Tihuluxe-ka, uxika axihambanwini!

³¹ Na vone a vaprista lava vakulu, ni vadondrisi va Nawu, afa vamutreketrela, na vabyelana vaku: Ahanyisi van'wana, Yene ahluleka kutihanyisa!

³² Axike axihambanwini, Yene Kriste, Hosi ya Israyele, akuva hiswivona, hiva hipfumela. Na vone vayivi vabiri, lava vavambiwiki kun'we na Yene, afa vamuruka.

Kufa ka Yesu

³³ Kusukela ku nkama wa vuntlhanu na mun'we kuvani munyama amisaveni hinkwayu, kukondra kuva nkama wa vuntlhanu na mune

³⁴ Kutani, hi nkama wolowo wa vuntlhanu na mune Yesu abandlukana hi ritu dra kutlakuka aku: Eloyi, Eloyi, lama Sabaktani? Loko switlhamuxeliwa hileswaku: Xikwembu Nkulukumba wanga, Xikwembu Nkulukumba wanga, xana unitrikeli yini?

³⁵ Avan'we ku lava afaka vali kone, loko vaswiyingela, vaku: Lavisani! Avitana Eliya!

³⁶ Kolahu mun'we atrutruma, ayatranisa xiponji hi nhlowa, axitlhoma alihlangeni, amunwisa, na aku: Trikani hitavona kumbe Eliya atatamuhawula!

³⁷ Kambe Yesu abongosiki, anyiketa a moya, kutani afa.

³⁸ A kapulana dra Tempele drihandruka hi le makari, kusukela henhla kuyatlhasa ahansi.

³⁹ Kolahu a ndruna ya dzana, leyi yiyimiki amahlweni ka xihambanu, yivona leswi afisiki xiswone Yesu, yiku: Kunene, lweyi afa ali Yene a N'wana wa Xikwembu Nkulukumba!

⁴⁰ Afa kuni vavasati va kukari lava afaka valavisa hi le kule. Amakari kwavu afa kuna Maria wa Magadala, na Maria mamana wa Yakobe, lweyi ntrongo, na Yosefa, na Salome.

⁴¹ Vavasati lava afaka valandra Yesu, ni kumutirela loko ahafambela Galileya. Nakone afa kukumeka van'wana vanyingi lava afaka va ntlhantukeli na Yene kukondra vayatlhasa Yerusalema.

Kulahliwa ka Yesu

⁴² A dambu afa driya kupeleni hi nkama wa kutibekisela savata,

⁴³ kuhumelela Yosefa lweyi wa le Arimateya. Afa ali mun'we wa xiro xa huvu, wa kukhensiwa ngopfu, nakone afa alavisela kuta ka Mfumu wa Xikwembu Nkulukumba. Atiyisa mbilu aya ku Pilatu, akuva amukombela ntrumbu wa Yesu.

⁴⁴ Kambe Pilatu ahlamala hi kuyingela leswaku kutani afile, aleleta kuvitaniwa a ndruna ya dzana akuva ayivutisa kumbe xana afa afi khale.

⁴⁵ Ntrhaku kakuva akumi ntlhamuxelo, hikola ka ndruna ya dzana, anyikela a ntrumbu ku Yosefa wa le Arimateya.

⁴⁶ Lweyo ayihawula a ntrumbu axihambanwini awutrondriyela hi kapulana ledri afaka adrixavile. Ntrhaku ayawubeka axireni ledri afaka drikehliwi aribyeni, apfingula ni ribye drikulu asiva a nyangwa ya xira.

⁴⁷ Kambe Maria Madalena, na Maria mamana wa Yosefa, afa valavisa lomu abekiwaka kone.