Marka 12 - Testamente Ledrimpswha ni Mapsalma

Xifaniso xa vatiri vamfani

¹ Yesu asunguli kukhanela ku vhanu hi swifaniso aku: A mhunu afa abyali livhinya, adribiyela hi linhlampfu, akela ni xipfuvelo, ayaka ni xihondro. Kutani adrisiyela a vadrimi, yene ayendra.

² Hi nkama wa kutrhovela aruma a nandra ku vadrimi, kuyadjula swa xiyenge xakwe xa livhinya.

³ Vone vatiki vamukhoma, vamuba, vamutlhelisa na angana ntxhumu.

⁴ Atlhela avarumela a nandra mun'wana, na yene vamubalesa nhloko, vamuyentxa nhlamba.

⁵ Atlhela mfuri aruma mun'wana, lweyo vamudlaya; ni van'wana vakutala, van'we vavaba van'wana vava dlaya.

⁶ Afa asali ntsena ni n'wana mun'we, lweyi wakurandreka. Amuruma ku vone na e wa vugamu aku: Vatatxhava n'wananga!

⁷ Kambe a vadrimi volavo vabyelana vaku: Lweyi hi yene mudi wa pfindla; tanani himudlaya, a pfindla dritava dreru.

⁸ Kutani vamukhoma, vamudlaya, vamutxukumetela handle ka livhinya.

⁹ Ke a n'winyi wa livhinya atayentxa yini, xana? Atata, atatadlaya vadrimi lavo, ava anyika van'wana livhinya.

¹⁰ Xana an'wihlayanga a Tralwa ledri driliki: A ribye ledri a vayaki vadridreliki, hi drone driyentxiwaka dra kusungula dra hoka.

¹¹ Swayentxiwi hi Hosi; na kone hi leswi swihlamalisaka amahlweni kweru!

¹² Kutani vone vadjula kumukhoma, hikusa vaswitivile leswaku ahlayi xifaniso lexo na akongoma vone, kambe afa vatxhava xitrhungu, kutani vamutrika atifambela.

Ta mhaka ya tinemba

¹³ A va-Yuda varumi ku Yene van'we va vafarisi ni va ntlawa wa Heroda, akuva vaya muphasa hi maritu.

¹⁴ Vatlhasiki ku Yene vaku: Mudondrisi, haswitiva leswaku uwa xihlayelamfuri, awutihlatiyelisi ha mhunu. Hikusa awulavisi vuso bya vhanu, kambe udondrisa andlela ya Xikwembu Nkulukumba swinene. Xana swapfumeleliwa kuhumexela Khezari a tinemba kumbe ahi swone, xana? Hihumexa kumbe hingahumexi?

¹⁵ Yesu avona mandrendre yavu, avayangula aku: Xana n'winidringela yini? Nitiselani a denari nidrivona.

¹⁶ Vamutisela. Yene avavutisa aku: Xana a xifaniso lexi ni vito ledri dritraliwiki lana, i swamani? Vayangula vaku: I swa Khezari.

¹⁷ Yesu ahanga ku vone: Nyikani-ke a swa Khezari ku Khezari, ni swa Xikwembu Nkulukumba ku Xikwembu Nkulukumba. Kutani vahlamala ha Yene.

Kupfuxiwa ka vafi

¹⁸ Kutani a vasaduki lava valiki akuna kupfuxiwa-kufeni vatrhindrekeli ku Yene, vamuvutisa vaku:

¹⁹ Mudondrisi, Moxe ahitraleli leswaku: Loko a wanuna afa, asiya nsati, na angana n'wana, a makwavu lweyi amutlhantamaka atateka lweyi wansati, atapfuxela matruwa makwavu a lixaka.

²⁰ Kavi ni ntlhanu na vabiri wa vamakwavu-na-makwavu. Lweyi wa kuranga ateka nsati; afa na angana vana.

²¹ Lweyi wa vubiri amuteka, na yene afa na angana vana; ni lweyi wa vuraru na yene swiva swoleswo.

²² Hinkwavu lava va ntlhanu na vabiri vatekani ni yelweyi wansati kambe avasiyanga vana. Antrhaku ka hinkwavu, lweyi wansati na yene afa.

²³ Xana akupfuxiweni ka vafi, loko vafi vatlhela vahanya, atava nsati wa wini ku vone?

²⁴ Yesu aku ku vone: Milahleki ngopfu hinkonta ya leswi n'wingativikiki Matralwa ni ntamu wa Xikwembu Nkulukumba.

²⁵ Hikusa a vhanu, loko vatapfuka-kufeni, vangaka vangateki, vangaka vangatekiwi, kambe vatafana ni swirun'wa leswi swinga Matilweni.

²⁶ Kutani, mayelanu ni kupfuka-kufeni, xana an'wihlayanga abukwini dra Moxe, amhakeni ya nkun'hu ledri dra kupfura leswi Xikwembu Nkulukumba angakhanelisa xiswone na yene, aku: Mine ni Xikwembu Nkulukumba wa Abrahamu, ni Xikwembu Nkulukumba wa Yisaki, ni Xikwembu Nkulukumba wa Yakobe?

²⁷ Xikwembu Nkulukumba ahi Xikwembu Nkulukumba wa vafi, kambe wa lava vahanyaka. Hileswo-ke n'wine n'wilahleki ngopfu.

Nawu lowu wukulu

²⁸ Kutrhindrekeli mun'we wa mudondrisi wa Nawu, afaka ayingeli kuvutisana loko, avoniki leswaku Yesu avayanguli swinene, avutisa aku: Xana hi wini a nawu luwu wukulu ku hinkwayu?

²⁹ Yesu amuyangula aku: Lowu wukulu hi lowu: Yingela, Israyele! Hosi Xikwembu Nkulukumba weru i Hosi yin'we ntsena.

³⁰ Randra Hosi Xikwembu Nkulukumba waku, hi mbilu yaku hinkwayu, ni hi hika draku hinkwadru, ni hi kuyanakanya kwaku hinkwaku, ni hi ntamu waku hinkwawu.

³¹ Kutani awa vubiri hi vukulu hi lowu: Randra a wa-le-kwenu swanga heswi utirandrisaka xiswone wene. Akuna nawu wumbeni wutlulaka lowu.

³² Kutani a mudondrisi wa Nawu aku: Hi swone, we Mudondrisi! U hlayelimfuri hi kuhlaya leswaku Xikwembu Nkulukumba i mun'we ntsena, akuna mumbeni handle kwake,

³³ ni leswaku hi fanekela kuva hi murandra hi mbilu hinkwayu, ni hi kuyanakanya hinkwaku, ni hi mintamu hinkwayu, na hifanela kurandra a wa-le-kweru swanga ha hine hi ntshima. Swiyapswa ngopfu kuyingiseta swileleto leswo kutlula kuhisa switlhavelo ni kuyentxa tin'wana timhamba ta kufana.

³⁴ Yesu avona leswaku a mudondrisi wa Nawu ayanguli swinene, kutani aku ku yene: Awu kule ni Mfumu wa Xikwembu Nkulukumba. Ntrhaku ka leswi akahavangana mhunu lweyi angatiya kumuvutisa xa ntxhumu.

Kriste na Davida

³⁵ Yesu, na adondrisa a Tempeleni, avutisi aku: Xana a vadondrisi va Nawu hayini vaku Kriste i n'wana Davida?

³⁶ Yene Davida, hi ntshima yake, ahlayi hi kuhuhuteliwa hi Moya wa Kuxwenga aku: Xikwembu Nkulukumba ati ku Hosi yanga: Trhamisa avokweni dranga dra xinene, nikondra nibeka a valala vaku a hansi ka minkondro yaku.

³⁷ Ke, loko Davida amutxhula Hosi, swingayentxisa kuyini xana Kriste ava n'wanakwe? A xitrhungu hinkwaxu afa ximuyingiseta hi kutrhava.

Yesu asandra vadondrisi va Nawu

³⁸ Na aya mahlweni adondrisa Yene afa aku: Tivonelani ku vadondrisi va Nawu lava varandraka kuratela hi makapulana ya kuleha, ni kulosiwa hi xihluwa hinkwaxu atihubyeni.

³⁹ Varandra switrhamu swakuranga amasinagogeni, ni le minkhubyini.

⁴⁰ Vatekelaka vafelwa a swavu na vatilandrula hi kuhamba swikhongoto swakuleha. Kambe Xikwembu Nkulukumba atavakhatisa ngopfu hinkonta ya leswo.

Nhlengo wa wansati wa mufelwa wa xisiwana

⁴¹ Yesu atiki na atrhamisi kusuhi ni lomu vabekisaka kone nhlengo wa Yindlu ya Hosi, alavisa leswi xitrhungu xitxhelisaka xiswone mali anhlengweni. A vafuyi vanyingi afa vatxhela timali ta kuhlawa.

⁴² Kakutlhasa mun'we wansati wa mufelwa wa xisiwana atxhela kone swimalinyana swibiri leswi swidringanaka ni masareji mabiri.

⁴³ Kutani Yene avitana a vadondrisiwa vakwe, aku ku vone: Nihlayelamfuri nili ku n'wine a wansati lweyi wa mufelwa, wa xisiwana atxheli kutlula hinkwavu lava vatxheliki nhlengweni.

⁴⁴ Van'wana vanyiki ku leswi swivasaleliki na kasi yene anyiki hinkwaswu leswi anganaswu swa vutomi byake hinkwabyu.