Lk 8 - Testamente Ledrimpswha ni Mapsalma

Vavasati lava afaka vapfuna Yesu

¹ A ntrhaku ka swone, Yesu atifambela hi miti ni mitana, a dondrisa Ivangeli ya Mfumu wa Xikwembu Nkulukumba. Lava va khume na vabiri afa vafamba na yene,

² ni vavasati va kuhlawa lava afaka vahanyisiwi ku mimoya leyi mimfani ni le vuvabyini. A makari kwavu afa kuna Maria lweyi valiki i Magadala, lweyi afaka kuhumi ku yene a mimoya leyi mimfani ya ntlhanu na mibiri,

³ na Yowana nkata Kuza, a ndruna ya Heroda, na Suzana, ni van'wana lava vanyingi lava afaka vapfuna Yesu ni vadondrisiwa vakwe hi leswi afaka vali naswu.

Xifaniso xa mubyali

⁴ A vhanu lava vanyingi afa vahuma amitini, vahlengeletana, vatata vona Yesu. Kutani a vadrungulela xifaniso lexi aku:

⁵ A mubyali a humi ayabyala a mbewu yake. A kubyaleni kwake tin'we timbewu tiweli andleleni, tikandreteliwa hi vhanu, kutani a tinyanyana titida.

⁶ A tin'wana tiwela amisaveni ya maribye; kutani tiku tamila tibuna hi kupfumala ntrhongo.

⁷ A tin'wana tiyawela a makari ka mitwa; kutani a mitwa mikula kun'we ni timbewu mitikamanyeta tifa.

⁸ Kambe axin'wana xiyenge xa timbewu tiwela amisaveni leminene, kutani timila, tinyika ntrhovelo wa kuxonga, tinyika dzana dra tinhleke yin'wana ni yin'wana. Kuku loko Yesu ahlayi leswo, atlakuxa a ritu aku: Lweyi angani tindleve ayingelisise!

Nkongometo wa swifaniso

⁹ A vadondrisiwa vavutisa Yesu a xifaniso lexiya leswaku xidjula kuhlaya yini.

¹⁰ Yene ayangula aku ku vone: N'wine n'winyikiwi a kutiva swihundla swa Mfumu wa Xikwembu Nkulukumba, kambe ku van'wana nikhanela hi swifaniso, akuva nambi valavisa vangavoni, nambi vayingela vangayingelisisi.

Yesu atlhamuxela xifaniso xa mubyali

¹¹ A xifaniso lexi xidjula kuhlaya leswi: A mbewu i Ritu dra Xikwembu Nkulukumba.

¹² A xiyenge lexi xiweliki andleleni, hi lava vayingeliki a Ritu dra Xikwembu Nkulukumba, kambe kuta Diyavulosi ata susa a ritu atimbilwini tavu, leswaku vangatipfumela, kutani vahanyisiwa.

¹³ Kambe a mbewu leyi yiweliki amisaveni ya maribye, hi lava vayingelaka a ritu, vadriyamukela hi kutrhava. Kambe vangena mitru ya kuyanela; vapfumela hi nkama wutrongo; kambe ankameni wa ndringo vatrika, vatlhelela ntrhaku.

¹⁴ A mbewu leyi yiweliki mitweni hi lava vadriyingeliki, kambe ha kutrongo-kutrongo vatrika kukhongota hi mihlatiyelo ya vutomi, ni vukosi, ni kutitrhavela hi swa vutomi kutani hi ndlela leyi vanganyiki mihandru.

¹⁵ A mbewu leyi yiweliki misaveni leminene, hi vhanu lava yingelaka a ritu hi timbilu leti tinene, vayingiseta kutani vadribekisa, vatiya vanyika a ntrhovelo wunene.

Xifaniso xa livaningo

¹⁶ Akuna mhunu lwyi alumekaka a motre, ntrhaku awufukumeta hi xibya, kumbe awubeka hansi ka vunanu, kambe awuhayeka ahenhla, akuva lava vanhingenaka vavona livaningo.

¹⁷ Hikusa akuna xa ntxhumu lexi xifihliwiki xingatiki fukumuliwa; nakone hinkwaswu leswi inga xihundla, switibyiwa swiva swibekiwa alivaleni.

¹⁸ Hikolahu tivonelani, n'wiyingelisisa swinene; hikusa lweyi anganaswu, ata nyikiwa ngopfu; kambe lweyi angeke naswu, ata tekeliwa ni leswi ayanakanyaka leswaku anaswu.

Vandangu wa Yesu

¹⁹ A Mamana wa Yesu ni vamakwavu vata ku yene, vahluleka kuya kusuhi ni laha anga kone, hinkonta ya vunyingi bya vhanu.

²⁰ Kutani amun'we mhunu ativisa Yesu aku: A mamana waku ni vamakwenu va le handle, vadjula kukuvona.

²¹ Kutani yene aku: A mamana wanga ni vamakweru hi lava vayingelaka a ritu dra Xikwembu Nkulukumba, vava vadriyentxa.

Yesu arulisa xidzedze

²² Drin'wana siku, Yesu anhingena abyatrhwini kun'we ni vadondrisiwa vakwe, aku ku vone: Ahiweleleni halahaya ka tiva. Va hanga suka,

²³ loko vali kari vatremakanya a tiva, Yesu akhutriyela. Kutani a xidzedze xa ntamu xihumelela ativeni, a byatrhu dritala hi mati, kutani vava khombyeni dra kutika ka byatrhu.

²⁴ Kutani a vadondrisiwa vayapfuxa Yesu vaku: Mudondrisi! Mudondrisi! Ha suva! Yene apfuka, akhwavela a mheho ni mavimbi, hinkwaswu swimiyela, kuvani kurula.

²⁵ Ntrhaku aku ku vadondrisiwa: Xana a kupfumela kwenu kukwini? Vone varurumela hi kutxhava, vahlamala, kutani vavutisana vaku: Xana lweyi i mani-ke, leswi aleletaka ni timheho ni mati, swimuyingiseta!

Kuhanyisiwa ka mhunu wa mimoya lemimfani

²⁶ Kutani vatlhasa atikweni dra Gerasi ledringa halahaya ka tiva ledri lavisaniki na Galileya.

²⁷ Loko Yesu aha huma abyatrhwini, atlhangavetiwa hi mun'we wanuna lweyi apfaka mutini, afaka ani mademoni. Afa kuli khale angayambali ntxhumu, angatrhami kaya, ntsena atrhama amaxireni.

²⁸ Loko avona Yesu, awa hi matrolo amahlweni kwake abandlukana aku: A mhaka yanga hi yini ku mine na wene Yesu, N'wana wa Xikwembu Nkulukumba wa le henhla-henhla! Nakukhongota, unganixanise!

²⁹ Ahlayi leswi hikusa Yesu afa aleleti moya lowu mfani leswaku wuhuma ku yene. Minkama minyingi a moya lowu mfani afa wumukhoma, kutani afa vamutrimba mavoko ni minenge hi timpetxana, akuva arula, kambe afa aswitrhova, kutani a moya lowo afa wumutrutrumelisa mimbangwini ya hula.

³⁰ Yesu amuvutisa aku: A vito draku umani? Yene aku: Ni butrhu. Ahlayi leswi hikusa afa mi minyingi a mimoya leyi afaka minhingeni ku yene,

³¹ Kutani a mimoya leyo mikombeli Yesu akuva angamileleti leswaku miya mbangwini wa kuyeta.

³² Afa kuni ntlhambi wa tinguluve, leti afaka tida ambangwini lowo, a mimoya mi mukhongota leswaku amitrika minhingena ku tone, kutani Yesu a mipfumelela.

³³ A mimoya lemimfani mihuma amhunwini lweyo, kutani minhingena atinguluveni, a ntlhambi wutrutrumela aligingirini wuya titxukumeta tiveni wutika kone.

³⁴ A vabyisi vatinguluve loko vavoni leswi swihumeleliki, vatrutruma, vayabika mutini ni le masin'wini.

³⁵ A vhanu vahuma akuya vona leswi swihumeleliki. Loko vatlhasi lomu afaka kuna Yesu, vakuma a mhunu lweyi a mimoya mihumiki ku yene atrhamisi minengeni ya Yesu, na ayambalile, atlharihile; kutani vatxhava.

³⁶ Lava vaswivoniki, vavadrungulela leswi lweyi wa mimoya ahanyisisiwiki xiswone.

³⁷ A vhanu hinkwavu va tiko dra Gerasi vasungula kukhongota Yesu leswaku asuka lahaya, hikusa afa vatxhava ngopfu, xiswoswo Yesu anhingena abyatrhwini, afamba.

³⁸ A mhunu lweyi a mimoya mihumiki ku yene, a mukhongota akuva amupfumelela akuva afamba na yene, kambe Yesu a mutlhelisa aku ku yene:

³⁹ Tlhelela a kaya kwaku, uyadrungula hinkwaswu leswi Xikwembu Nkulukumba akuyentxeliki swone. A mhunu lweyo afamba adrungula mutini hinkwawu leswi Yesu a muyentxiliki swone.

Kupfuxiwa kufeni ka n'wana Yayirosi, ni kuhanyisiwa ka mbabyi

⁴⁰ Loko Yesu atlhelile, a vhanu vamuyamukela hi kunyoxa hikusa hinkwavu afa vamurindrelile.

⁴¹ Kutani kutlhasa mun'we wanuna, lweyi valiki i Yayirosi, lweyi afaka ali mufambisi wa sinagoga. Awiki minengeni ya Yesu, amukhongota akuva aya mutini wakwe

⁴² hikusa afa ani n'wana wamun'we wanhwanyana, afaka ani khume dra malembe na mabiri, afaka ali kusuhi ni kufa. Loko Yesu afamba aswitrhungu afa swimukamanyeta.

⁴³ A makari ka vhanu afa kuni wansati lweyi avabyiki ha khume dra malembe na mabiri, hi vuvabyi bya kuhalaka a ngati, (afaka ahangalasi mali yake hinkwayu hi tin'anga), kambe afa kungena mhunu lweyi angamuhanyisaka.

⁴⁴ Atrhindrekela hi le ntrhaku ka Yesu, akhumba makhaxa ya xiyambalu xakwe; a kuhalaka ka ngati kuyima kolahu.

⁴⁵ Kutani Yesu aku: Hi mani lweyi anikhumbiki? Hinkwavu valandrula. Petrosi aku: Mudondrisi, a vhanu vakukamanyeta vakususumeta!

⁴⁶ Kambe Yesu asindrisa aku: A mhunu anikhumbile, hikusa nitwi leswaku kuhuma ntamu ku mine.

⁴⁷ Lweyi wansati atiki avona leswaku angakoti kutifihla, ata hi kururumela, awa amahlweni ka Yesu atihlaya amahlweni ka hinkwavu leswi swimuyentxiki amukhumba ni leswi ahanyisiwiki xikan'we.

⁴⁸ Yesu aku ku yene: N'wananga, a kupfumela kwaku ku kuhanyisile. Famba hi kurula.

⁴⁹ Yesu aku na ahakhanela, kutlhasa mun'wana murumiwa aku ku mufambisi wa sinagoga, A n'wanaku afile, ungahakarati Mudondrisi.

⁵⁰ Loko Yesu aswiyingelile aku: Ungatxhavi, pfumela ntsena, a n'wanaku atahanya.

⁵¹ Loko atlhasi amutini anhingena, angapfumeleli mhunu a kunhingena na yene andlwini, loko vange va Petrosi, Yohana, na Yakobe ni vabeleki va nhwanyana.

⁵² Hinkwavu afa vamudrilela hi xiviti kambe Yesu aku ku vone: N'wingadrileni, hikusa a nhwanyana anga fanga ekutriyela.

⁵³ Hinkwavu vamuhleka, hikusa afa vaswitiva leswaku afile.

⁵⁴ Kutani Yesu, amukhoma hi voko ahlaya hi ritu dra ntamu aku: Nhwanyana pfuka!

⁵⁵ Kutani yene atlhela ahanya; kolahu asekeleka. Kutani Yesu aleleta leswaku vamunyika a swakuda.

⁵⁶ A vabeleki vakwe vahlamala ngopfu, kambe Yesu avaleleta leswaku vangabyeli mhunu leswi swihumeleliki.