Lk 3 - Testamente Ledrimpswha ni Mapsalma

Kudondrisa ka Yohana Mubabatisi

¹ Hi lembe dra vukhume na ntlhanu dra mfumu wa mufumi-nkulu Tiberiosi Khezari, loko Ponciu Pilato afuma Yudeya, na Heroda afuma Galileya, Filipi makwavu afuma Ituriya ni tiko dra Trakonita, na Lusaniya afuma Abilene.

² Anasi na Kayafasi afa vali vaprista lava vakulu. Ankameni wolowo a ritu dra Xikwembu Nkulukumba dritlhasa ku Yohana, a n'wana Zakariya.

³ Yohana afamba-fambi mimbangwini hinkwayu leyi minga matlhelweni ya nambu wa Yordana, abyela vhanu aku: Ndrulukani ku leswi swimfani n'wiyamukela a Babatiso akuva Xikwembu Nkulukumba an'widrivalela swihono.

⁴ Leswi swihumeleli akuva kuhetiseka leswi switraliwiki abukwini dra muprofeta Ezaya, angaku: A ritu dra lweyi abandlukana ahuleni drili: Bekisani a gudju dra Hosi, na n'wihamba tindlela takwe tilulama.

⁵ A minkhinsi hinkwayu mita seteliwa; a tinhava hinkwatu ni switrunga switahirimuxiwa. A tindlela leti ta kuhereka titalulamisiwa, ni tindlela leti ta kunonon'hwa titalulamisiwa.

⁶ A vhanu hinkwavu vatavona huluxo dra Xikwembu Nkulukumba.

⁷ Loko a xitrhungu xiya ku Yohana akuva xiyababatisiwa, aku ku xone: Lixaka dra swipswhahla! Hi mani lweyi an'wibyeliki a kutrutruma mahlundru lawa mataka?

⁸ Bekani mihandru leyi mifambelanaka ni kundruluka kwenu, n'wingahlayi leswaku: Hina Abrahamu anga tatana weru! Hikusa nan'wibyela leswaku Xikwembu Nkulukumba angaswikota kundruluta a maribye lawa mava vana va Abrahamu.

⁹ Mfuri ni swoswi akawula dribekiwi mitrwini ya minsinya hinkwayu. A nsinya wun'wana ni wun'wana lowu wungahumexikiki a mihandru leminene, wutatremiwa wutxukumetiwa andrilweni.

¹⁰ A xitrhungu afa xivutisa Yohana Mubabatisi, xiku: Xana hitayentxa yini ke? Yohana ayanguli aku:

¹¹ Lweyi angani swiyambalu swibiri, ahanane lweyi angeke naswu, ni lweyi angani swakuda, ayentxisi xiswoleswo.

¹² A vahlengisi na vone vatela kubabatisiwa, vaku ku yene: Mudondrisi, xana hingayentxa yini?

¹³ Yohana aku ku vone: N'wingahlengiseni kutlula leswi n'wirumikiwiki swone.

¹⁴ Nakone kuve ni masotxha lawa mamuvutisiki maku: Xana hine hitayentxa yini? Yohana ayanguli aku: N'wingayiveleni mhunu hi kutirisa a ntamu kumbe kurwexa nandru hi madrimi, kambe trhavelani leswi n'wiswikumaka.

¹⁵ A vhanu hinkwavu afa vatrhama na valangusela, na vatipimisela timbilwini tavu leswaku, kumbe Yohana angava yene Kriste.

¹⁶ Yohana avabyela hinkwavu aku: Mine nin'wibabatisa hi mati, kambe awata lweyi anitlulaka hi ntamu, lweyi ningafanelikiki kuntrhunxa a tingoti ta tintangu takwe. Hi yene atakan'wibabatisa hi Moya wa Kuxwenga ni hi ndrilo.

¹⁷ A lihlelo dri le vokweni drakwe akuva ahehera mavele amatravukanisa ni mungu, atabekisa mavele anguleni, a mungu wone awuhisa ndrilweni lowu wa kukala wungatimeki.

¹⁸ Afa kuli hi leswi ni hi swileleto swin'wana leswi Yohana Mubabatisi afaka ativisa a Ivangeli.

¹⁹ Na swone afa akhwavela Heroda hi kuhanya na Herodiyasi, a nsati wa makwavu, ni hinkonta ya hinkwaswu leswi swimfani leswi aswiyentxiki.

²⁰ Kolahu Heroda ayengesela a vubihi byin'wana byikulu hi kupfalela Yohana abohelweni.

Kubabatisiwa ka Yesu

²¹ Kati loko Yohana ababatisa hinkwavu, Yesu na yene ababatisiwa; na ali kari akhongota, a tilo dripfuleka,

²² ni Moya wa Kuxwenga wuxikela a henhla kwake, na wuni xivumbeko lexi xifanaka ni xa tuva, kutani kutwala a ritu ledri dripfaka atilweni driku: Wene u N'wananga lweyi arandriwaka; lweyi nitrhavisiwaka ha yene.

Vakokwana va Yesu hi ndlela ya longoloko

²³ Yesu, afa ani malembe lawa madjulaka kuva makume mararu (30) loko asungula a ntiro wakwe. Afa kuyanakanyeni ka vhanu ali n'wana Yosefa, n'wana Heli,

²⁴ n'wana Matati, n'wana Levi, n'wana Maliki, n'wana Yana, n'wana Yosefa,

²⁵ n'wawa Matatiya, n'wana Amosi, n'wana Nahume, n'wana Esli, n'wana Nagayi,

²⁶ n'wana Maati, n'wawa Matatiya, n'wana Semeyi, wa Yoseki, wa Yoda

²⁷ wa Yowanan, wa Resa, wa Zorobabele, wa Salatiyele, wa Neri,

²⁸ wa Melki, wa Adi, wa Kosama, wa Elmadama, wa Heri,

²⁹ wa Yoxuwa, wa Eliyazari, wa Yorimi, wa Matati, wa Levi,

³⁰ wa Simiyoni, wa Yuda, wa Yosefa, wa Yonama, wa Eliyakimi,

³¹ wa Meleya, wa Mena, wa Matata, wa Natani, wa Davida,

³² wa Yese, wa Obede, wa Bowazi, wa Sala, wa Naasoni,

³³ wa Aminadabi, wa Admini, wa Arni, wa Esromo, wa Faresi, wa Yuda

³⁴ wa Yakobe, wa Isaki, wa Abrahamu, wa Tara, wa Nakori,

³⁵ wa Seruki, wa Ragawu, wa Faleke, wa Ebere, wa Sala,

³⁶ wa Kayinama, wa Arfaxade, wa Seme, wa Nowa, wa Lameke,

³⁷ wa Matusela, wa Henoki, wa Yerete, wa Maleleyeli, wa Kayinama,

³⁸ wa Enosi, wa Seti, wa Adamu, wa Xikwembu Nkulukumba.