Lk 22 - Testamente Ledrimpswha ni Mapsalma

Makungu ya kudlaya Yesu

¹ A nkhuvu wa makati lawa mangekena handrelo, lowu wuhlayiwaka Paska, afa wu kusuhi.

² Kutani a vaprista lava vakulu ni vadondrisi va Nawu afa vadjula leswi vangamudlayisaka xiswone Yesu, hikusa afa vatxhava tiko.

³ Kambe Sathana anhingena ku Yudasi, lweyi ahlayiwaka Iskariyota, lweyi afaka ali wa lava vakhume na vabiri.

⁴ Yudasi asuka ayakhanela ni vaprista lava vakulu ni tindruna ta Tempele, a yingelana navu leswaku angayentxisa kuyini akuva anyiketa Yesu.

⁵ Vone vanyoxa, vapfumelelana kumunyika mali.

⁶ Yudasi apfumela; ahangadjula nkama lowu wunene wa kuvanyiketa yene na kungena xitrhungu.

Kululamisa xilalelo xa Paska

⁷ A siku dra makati lawa mangekena handrelo, ledri afaka vafaneli kutlhava Paska ha drone, dritlhasa.

⁸ Yesu aruma Petrosi na Yohana aku: Fambani n'wiya hilulamisela Paska hitadrida.

⁹ Vaku ku yene: Urandra leswaku hiyadrilulamisa kwini xana?

¹⁰ Aku ku vone: Lavisani, loko n'winhingeni mutini, n'witatlhangana ni mhunu na arwali hotro ya mati. Mulandrani andlwini leyi atakanhingena ku yone.

¹¹ N'wibyela n'winyi wa yindlu n'wiku: A mudondrisi ali: hi yini yindlu leyi ningadelaka ku yone a Paska kun'we ni vadondrisiwa vanga xana?

¹² Lweyo-ke atan'wikomba yindlu ya le henhla leyi yikulu, leyi longisiwiki. Lulamisani Paska kone.

¹³ Vafambiki, vayakuma swanga hi swoswi avabyeliki; vahangalulamisa Paska.

Xilalelo xa wugamu Hosi.

¹⁴ Kuti loko nkama wutlhasile, Yesu atrhama kudeni, kun'we ni vapostola

¹⁵ aku ku vone: Nanaveli hi kunavela kukulu akuda Paska ledri kun'we na n'wine, na ningasinafa.

¹⁶ Hikusa nan'wibyela nili: Ningahatlheli nida a Paska, drikota drihetiseka aNfun'wini wa Xikwembu Nkulukumba.

¹⁷ Atekiki ntrheko atlangela Xikwembu Nkulukumba aku: Tekani, n'wisiyelisana ha wone,

¹⁸ hikusa nan'wibyela, akusungula swoswi ningahanwi swa mihandru ya nvhinya, a Mfumu wa Xikwembu Nkulukumba wukondra wutlhasa.

¹⁹ Atekiki kati, atlangela Xikwembu Nkulukumba, akhemelela avanyika aku: [Leyi i miri yanga leyi minyikiwaka hinkonta yenu. Yentxani leswo n'witanidrimuka ha swone.

²⁰ Nawo ntrheko, ayentxisa xiswoswo, a ntrhaku ka kuda aku: A ntrheko lowu i xipfumelelanu lexi ximpswha xa Xikwembu Nkulukumba angatini yanga leyi yihalatiwaka hinkonta yenu.]

²¹ A tlhela aku: Kambe vonani a voko dra lweyi aniwongaka drina mine atafuleni.

²² Hikusa N'wana wa Mhunu asuka swanga hi leswi ayimiseliwiki swone hi Xikwembu Nkulukumba; kambe yowee a mhunu lweyi awongiwaka hi yene!

²³ Vone, vasungula kuvutisana, leswaku atava mani ku vone, lweyi atakavani kuyentxa leswo.

Lweyi nkulu a Mfun'wini wa Xikwembu Nkulukumba

²⁴ Kavini nkanetanu amakari ka vadondrisiwa, leswaku i mani ku vone lweyi angapimisiwaka lwenkulu.

²⁵ Kambe Yesu aku ku vone: A vafumi va-Matiko vamafuma; lava vamafumaka hi ntamu vahlayiwa vatovokisi va wone.

²⁶ Kambe n'wine n'wingavi tanu; kambe lwenkulu ku n'wine a ave swanga hi lweyi ntrongo, nayene lweyi aleletaka, ave swanga hi lweyi atirelaka.

²⁷ Hikusa lwenkulu hi wini? Xana hi lweyi atrhamiki kudeni, kumbe hi lweyi amutirelaka? Ahilweyi atrhamiki kudeni xana! Kambe mine ni le makari kwenu swanga hi lweyi atirelaka.

²⁸ Kambe n'wine, n'wilava vatiyiseliki na mine akudringiweni kwanga.

²⁹ Na mine nin'winyika Mfumu swanga hi leswi anganinyika Tatana wanga,

³⁰ akuva n'wida, n'winwa atafuleni dranga aNfun'wini wanga; n'witrhama switrhan'wini swa vufumi, n'witrema timhaka ta tinxaka leti ta khume na tibiri ta Israyele.

Yesu ativisa Petrosi

³¹ Kutani Hosi yiku: Simoni, Simoni, lavisa, Sathana akombeli kun'wihehera swanga hi mavele

³² kambe nikukhongotelile ku Xikwembu Nkulukumba leswaku a kupfumela kwaku kungaheli. Kutani wene, loko undrulukile, tiyisa vamakwenu.

³³ Petrosi aku ku yene: We hosi, nitibekiseli kuya na wene abohelweni ni le kufeni.

³⁴ Kambe Yesu aku ku yene: Nakubyela Petrosi, a nkuku wungatiyimba namunhla, na ungasilandrula kuraru, uku awunitivi.

Yesu avoniwa swanga mudohi

³⁵ Kutani Yesu aku ku vone: Loko nin'wirumi na n'wingalina nkwama wa mali, ni hwama, ni swifambu, xana mapfumali ntxhumu xana? Vaku: Ahapfumalanga ntxhumu!

³⁶ Yesu aku ku vone: Kambe swoswi lweyi angani xikhwama axiteke, nawo nkwama. Mfuri lweyi angekena lipanga, axavise nkhantxu wakwe, ataxava drone.

³⁷ Hikusa nan'wibyela nili: leswi swingatraliwa leswi swiliki: Ahlayiwi ni vadohi, swahafanekela kuhetiseka ku mine. Hikusa leswi swihlayiwiki ha mine swini kuhetiseka.

³⁸ Vaku ku yene: Hosi, lavisa, timpanga tibiri hi leti. Yesu aku ku vone: Swidringanile.

Xikhongoto a Nhaveni ya Minhlwari

³⁹ Kutiloko Yesu ahumile, aya Nhaveni ya Minhlwari hi matolovelela yake; a vadondrisiwa vamulandra.

⁴⁰ Aku loko atlhasa kumbangu lowo, aku ku vone: Khongotani Xikwembu Nkulukumba, n'wingatinhingena kudringiweni.

⁴¹ Yene, atrhindreka kule navu, kufana ni vangonyana dra loko kutxukumeteliwa ribye, akhisama akhongota aku:

⁴² Tatana, loko uswirandra, susa ntrheko lowu ku mine, kambe kunga yentxiwe kurandra kwanga, ake kuva kwaku. [

⁴³ Kutani a ntrumi yi voneka ku yene, yipfa Tilweni, yitatamutiyisa.

⁴⁴ Kuti loko ali kuvavisekeni loku kulu, atshimisisa kukhongota, lakakuva ni nyuku wakwe wuva wufana ni mantrhonsi ya ngati lawa mathonelaka misaveni.]

⁴⁵ Atiki asekeleka kukhongoteni kwake ata ku vadondrisiwa vakwe, avakuma vakhutriyelile hi xiviti.

⁴⁶ Aku ku vone: N'wikhutriyelela yini xana? Pfukani n'wikhongota, n'wingatinhingena kudringiweni.

Kukhomiwa ka Yesu

⁴⁷ Yesu aku na ahavulavula, kakutlhasa xitrhungu. Na yene lweyi ahlayiwaka Yudasi, mun'we wa lava vakhume na vabiri, afa axirangeli mahlweni, atrhindrekela ku Yesu kumunyunta.

⁴⁸ Yesu aku ku yene: Yudasi, unyikela N'wana wa Mhunu hi kumunkunta xana?

⁴⁹ Lava afaka vali na Yesu, vavona leswi switaka yentxeka, vaku: Hosi, xana hifanele kuteka timpanga hilwa xana?

⁵⁰ Mun'we ku vone a ba nandra wa muprista lwenkulu, amutrema ndleve ya xinene.

⁵¹ Yesu ayangula aku: Trikani! N'wingahaswiyentxi. Akhumba ndleve ya lweyo amuholisa.

⁵² Kolahu Yesu avulavula ni lava vamuteliki, vanga vaprista lava vakulu ni tindruna ta Tempele, aku: Ingi n'widjula xiyivi, n'wihumiki na n'witameli timpanga ni tinhonga?

⁵³ Afa nina n'wine masiku hinkwawu andlwini ya Hosi, an'wanikhomanga. Swakuva leswi a nkama lowu wunga wo wenu, ni ntamu wa munyama!

Petrosi alandrula Yesu

⁵⁴ Vatiki vamukhoma vafamba naye, vaya munhingenisa andlwini ya muprista lwenkulu. Kambe Petrosi afa landra hi le kule.

⁵⁵ Vatrhiveliki ndrilo amakari ka linxonxa, vatrhamisa. Na yene Petrosi atrhamisa makari kwavu.

⁵⁶ Mun'we lweyi wanhwanyana wa nandra, amuvona na atrhami awora ndrilo, amupondrolela aku: Ni yelweyi afa ali na yene!

⁵⁷ Kambe Petrosi alandrula aku: Wansati animutivi.

⁵⁸ Antrhakunyana amun'wana amuvona aku: Na wene u wa kwavu! Kambe Petrosi aku Nandruwe, ani yene!

⁵⁹ Kuhundriki a nkama lowu wufanaka ni hora drin'we, amun'wana atiyisa aku: Kunene, lweyi na yene afa ali naye, hikusa mfuri i mu-Galileya!

⁶⁰ Kambe Petrosi aku: Nandruwe aniswitivi leswi uhlayaka swone! Hi nomu-lo na ahavulavula, a nkuku wudringa.

⁶¹ A Hosi yindrulukiki, yilavisa Petrosi, kahangava laha Petrosi adrimukaka a ritu dra Hosi, leswi afaka yi mubyelisi xiswone leswaku: A nkuku wungasinayimba namunhla, utanilandrula kuraru.

⁶² Ahanga huma handle adrila hi xiviti

Yesu loko atreketreliwa hi valaveleli, abiwa

⁶³ A vavanuna lava vangakhoma Yesu, afa vamuhleka, vamuba hi ntamu.

⁶⁴ Vamufukumetiki mahlu, vamuvutisa vaku: Loko u muprista, pfhumba: i mani lweyi akubiki.

⁶⁵ Ni swin'wana leswi swakutala, swimuvulavulela swimuruka.

Yesu loko ayisiwa hubyeni ya xi-Yuda

⁶⁶ Byiku byaxa, a vakulu va tiko, a vaprista lava vakulu, ni vadondrisi va Nawu, vahlengeletana, vamuyisa hubyeni ya xi-Yuda.

⁶⁷ Va vutisa Yesu vaku: Loko u Kriste hibyele! Yene aku ku vone: Nambi nin'wibyela, ana n'wingakholwi,

⁶⁸ ni loko nin'wivutisa, an'winiyanguli.

⁶⁹ Akusungula swoswi, N'wana wa Mhunu atatrhama axineneni xa ntamu wa Xikwembu Nkulukumba.

⁷⁰ Hinkwavu vaku: Xake, u N'wana wa Xikwembu xana? Yesu aku ku vone: N'wihlayelamfuri, ni yene!

⁷¹ Vahangaku: Xana hahadjulela yini vumboni? Hikusa na hine hi swiyingeli hi nomu wakwe!