Lk 21 - Testamente Ledrimpswha ni Mapsalma

Nhlengo wa mufelwa wa xisiwana

¹ Yesu alavisa, avona lava vakufuya, vatxhela nhlengo wavu axibyeni xa minhlengo.

² Avona ni wansati wa mufelwa lweyi wa xisiwana, atxhela kone swimalinyana swibiri swa lisima dritrongo.

³ Yesu aku: Kunene nan'wibyela nili, lweyi wa mufelwa wa xisiwana atxheli kutlula hinkwavu.

⁴ Hikusa hinkwavu lava vatxheli tinyiko, na vaswiteka kutaleliweni kwavu; kambe yene ekutxhela na aswiteka kupfumaleni kwake, hinkwaswu leswi atihanyelaka ha swone.

Yesu ativisa kuhoneka ka Tempele

⁵ A van'we vahlaya swa Tempele vaku: yilongisiwi hi maribye lawa ya hombe ni minhlengo. Kutani Yesu aku:

⁶ Leswi miswihlalelaka, a masiku matata, lawa kungatiki trikiwa ribye henhla ka ribye drin'wana, ledri dra kuka dringambundrumuxiwanga.

Nhlomulo ni nxaniso

⁷ Vavutisa Yesu vaku Mudondrisi: Xana-ke leswo switahumelela drini, ni xikombiso xa leswaku swidjula kuhumelela, xitava xinike?

⁸ Aku: Tivonani n'wingatikanganyisiwa. Hikusa vanyingi vatata hi vito dranga vaku: Himi Kriste; ni nkama wukusuhi! N'wingavalandreni!

⁹ Kambe loko n'wiyingela swa mafumu ni madzolonga, n'wingavi txhava. Hikusa swifanekeli kuhumelela kusunguleni; kambe akuhela kungaka kungahatli kuta.

¹⁰ Yesu avabyela kolahu aku: A tiko dritapfukela drin'wana tiko, ni mfumu wutapfukela mun'wana mfumu.

¹¹ Kutava ni kutrekatreka loku kulu ka misava, ni tindlala ni mintungu ku min'wana mimbangu; nakone kutava ni mahlolana lawa matxhavisaka, ni swikombiso leswi swikulu leswi swipfaka tilweni.

¹² Kambe leswo na swingasina humelela, vatan'wikhoma van'wixanisa, van'winyiketa masinagogeni ni le bohelweni, van'wiyisa ku vafumi ni le tindruneni, hinkonta ya vito dranga,

¹³ switan'witumbulukela akuva n'wiva timboni tanga.

¹⁴ Bekanike atimbilwini tenu leswaku n'wingayanakanyi leswi n'wita kayangula swone,

¹⁵ hikusa mine nitan'winyika nomu ni vutlhari lebyi a valala venu hinkwavu vatakahluleka kubyikaneta ni kuyangula ntxhumu.

¹⁶ Kambe n'witanyiketiwa hi vapswali venu, ni vamakwenu, ni maxaka, ni vanakuloni. Vatadlaya van'we ku n'wine.

¹⁷ Mfuri n'witahambuliwa hi hinkwavu hinkonta ya vito dranga,

¹⁸ kambe wunga lahleki ni mun'we nsisi wa tinhloko tenu.

¹⁹ Hi kutiyisela kwenu n'witahuluxa mahika yenu.

Kuyavanyisiwa ka Yerusalema

²⁰ Loko n'wivona Yerusalema atrandreliwi hi tiyimpi, lahu ke switivani leswaku ahoneko drakwe drikusuhi.

²¹ Ankameni lowo lava vanga Yudeya avatrutrumele tinhaveni. Ni volava vanga ndreni ka muti avahume; ni volava vanga tinhoveni vangavi nhingena mutini,

²² hikusa matava masiku ya kudrihisa, lawa kutaka hetiseka hinkwaswu leswi swingatraliwa.

²³ Yowee vavasati lava vatakava veni tinyimba ni lava vatakava vayan'wisa hi masiku lawo, hikusa kutava ni nhlomulo lowu wukulu misaveni, ni mahlundru matawa henhla ka tiko ledri.

²⁴ Vatawa hi vukari bya lipanga, vatayisiwa wukaraweni amatikweni hinkwawu. Mfuri Yerusalema atakandreteliwa hi va-Matiko, a minkama ya va-Matiko mikota mihela.

Kubuya ka N'wana wa Mhunu

²⁵ Ayengeta aku: Kutavani swikombiso adambyini, ni le hwetini, ni le tinyeletini; ni le misaveni kutava ni kutxhukisiwa amakari ka matiko, vatakaganaganeka hinkonta ya kudruma ka likhulu ni mavimbi.

²⁶ A vhanu vatatremeka minhlana hi kutxhava ni hi kulavisela leswi switakahumelela misaveni; hikusa a mintamu ya matilo mitatrekatrekisiwa.

²⁷ Hilahu-ke vatakavona a N'wana wa Mhunu ata hi tlavi, na ani ntamu ni kuphatima kukulu.

²⁸ Loko timhaka leti tisungula kuyentxeka, wololokani n'witlakuxa tinhloko tenu, hikusa kutiruliwa kwenu ku kusuhi.

²⁹ Yesu ayengesa avabyela xifaniso aku: Lavisani nkuwa ni minsinya hinkwayu.

³⁰ Loko mihlukile, n'waswivona, n'wiswitiva ha vuswenu leswaku a minyuku mi kusuhi.

³¹ Hiswoswo na n'wine, loko n'wivona leswo switlhasa, switivani leswaku a Mfumu wa Xikwembu Nkulukumba wu kusuhi.

³² Nihlayelamfuri nili, a lixaka ledri dritakhaluta, na leswi swingasinayentxeka,

³³ A tilo ni misava switakhaluta; kambe a maritu yanga mangakhaluti!

Hitekani!

³⁴ Kambe tivonelani, suka timbilu tenu tibindriwa hi maxovo ni kupopswa ni minhlatiyelo ya vutomi! Kutani siku ledro dritatxhuka drin'witela swanga hi xitxhuketo na n'winga drilaviselanga,

³⁵ hikusa dritawa ahenhla ka hinkwavu lava vatrhamiki misaveni hinkwayu.

³⁶ Hitekani hi minkama hinkwayu, n'wikombela ku Xikwembu Nkulukumba, akuva n'wikuma ntamu wakuphondla ku hinkwaswu leswi switakayentxeka, n'witakota kuyima amahlweni ka N'wana wa Mhunu.

³⁷ A nhlikanhini Yesu afa hamba adondrisa andlwini ya Hosi; na avusikwini ahuma aya yetlela nhaveni leyi valiki i ya Minhlwari.

³⁸ A tiko hinkwadru afa driya ku yene ampundrwini, a ndlwini ya Hosi driya muyingela.