Lk 20 - Testamente Ledrimpswha ni Mapsalma

Vaprista ni vakulu vaphikisa ntamu wa Yesu

¹ Kati hi drin'wana siku, Yesu aku na adondrisa tiko a Tempeleni, avabyela Ivangeli, a vaprista ni vadondrisi va Nawu, kun'we ni vakulu va tiko,

² vata, vavulavula na yene vaku: Hibyele, xana leswi uswiyentxa hi ntamu wini, kumbe i mani lweyi anga kunyika ntamu lowu?

³ Yesu ayanguliki aku ku vone: Na mine nitan'wivutisa mhaka yin'we, n'winibyela:

⁴ Xana a babatiso dra Yohana drapfi ku Xikwembu Nkulukumba kumbe avhanwini?

⁵ Vone kambe vakhanelisana vaku: Loko hiku; ku Xikwembu Nkulukumba, ataku, ha yini n'wingapfumelanga ku yene, xana?

⁶ Loko hiku, avhanwini, a tiko hinkwadru dritahikhandla hi maribye; hikusa drikholwa ngopfu leswaku Yohana Mubabatisi afa ali muprofeta.

⁷ Vahangayangula vaku: ahikutivi lomu dripfaka kone.

⁸ Yesu aku ku vone: Na mine ningan'wibyele a ntamu lowu niyentxaka leswi ha wone.

Vatiri va tinsulavoya

⁹ Kutani Yesu asungula kubyela tiko a xifaniso lexi aku: A mhunu abyali livhinya, alibeka ku vadrimi, ayendra ku drin'wana tiko hi nkama wa kuleha.

¹⁰ Ke, hi nkama wa mihandru aruma nandra ku vadrimi, akuva vamunyika mihandru ya livhinya. Kambe a vadrimi vakuyamuba, vamutlhelisa na angatamelanga ntxhumu.

¹¹ Ayengesa aruma mun'wana nandra. Ni yelweyo vamuba, vamuyentxa nhlamba, vamutlhelisa na angatamelanga ntxhumu.

¹² Atlhela kambe aruma a wa vuraru. Kambe vone, vatiki vamutrunya timbanga, vamuhlongola.

¹³ A n'winyi wa livhinya kutani aku: Xana nitayentxa yini? Nitaruma a n'wananga lweyi wa kurandreka; kumbe xana vatavani xihluwa ha yene.

¹⁴ Kambe a vadrimi vatiki vamuvona, vatikhanelela, vabyelana vaku: Lweyi hi yene mudi wa pfindla. Ahi mudlayeni akuva a pfindla driva dreru.

¹⁵ Vamutxukumetela handle ka livhinya, vamudlaya. Xana-ke a n'winyi wa livhinya atavayentxa yini?

¹⁶ Atata, atadlaya vadrimi volavo, ava anyika van'wana livhinya. Vaswiyingeliki leswo, vaku: Swingatxhuke swiva tanu!

¹⁷ Yesu atiki awavapondrolela, aku ku vone: Xake, dridjula kuhlaya yini a tralwa ledri dringe: A ribye ledri a vayaki vangadridrela, hi drone ledringayentxiwa ledri dra kusungula dra songo?

¹⁸ Kutani ayengesa aku: Lweyo ni lweyo lweyi ataka wela henhla ka ribye ledro, atatrhovekela. Lweyi dritakamuwela henhla, dritamupswhandlasa ava ntrhuri.

Yesu apfilunganyisa valala

¹⁹ Kutani a vadondrisi va Nawu ni vaprista lava vakulu vadjula kukhoma Yesu ankameni wolowo, swakuva leswi afaka vatxhava tiko. Hikusa afa vaswitivile leswaku ahlayi xifaniso lexo ha vone.

²⁰ Vahanga mulavisisa, varuma tinhloli leti titihambaka swanga hi loko tilulamile, titakota kumuphasa hi ritu, akuva vatamunyiketa ku vafumi ni le ntan'wini wa mfumu.

²¹ Vamuvutisa vaku: Mudondrisi, haswitiva leswaku uhlaya uva udondrisa hi kululama, na ungalavisi liso dra mhunu; na kone udondrisa ndlela ya Xikwembu Nkulukumba hi xihlayelamfuri.

²² Xana swahifanela kuhumexela Khezari a nhlengo kumbe aswihifaneli xana?

²³ Yesu atiki avona marengu yavu, aku ku vone:

²⁴ Nikombani mali. A xifaniso ni vito swinga ku yone i swa mani xana? Vone vaku: I swa Khezari.

²⁵ Yesu ahangaku ku vone: Tlheliselani-ke swa Khezari ku Khezari ni swa Xikwembu Nkulukumba ku Xikwembu Nkulukumba.

²⁶ Vahluleka kukuma xa ntxhumu aritwini drakwe amahlweni ka tiko; vahlamala hi mayangulela yake, vamiyela.

Vasaduki ni mhaka ya kupfuka kufeni

²⁷ Avan'we ku vasaduki lava valiki akuna kupfuxiwa ka vafi, vatrhindrekela vavutisa Yesu vaku:

²⁸ Mudondrisi, Moxe ahitraleli leswaku loko mhunu a fa, na ani nsati, kambe na angena vana, a ndrisana yake yitateka nsati lweyo, yitapfuxela makwavu avana.

²⁹ Kavi ni vamakwavu na makwavu va ntlhanu na vabiri. A nhondrwa yavu yiteka nsati, yakufa na yingena vana.

³⁰ Kutani lweyi wa vubiri ateka a nsati lweyo na yene a fa na angena n'wana.

³¹ Ni lweyi wa vuraru amuteka; swiyentxisa xiswoswo ni ku lava va ntlhanu na vabiri, vafa na vangasiyi vana.

³² Antrhaku kwavu naye wansati afa.

³³ Akupfukeni ka vafi xana a nsati lweyo atava nkata wa winike? Hikusa hinkwavu lava va ntlhanu na vabiri vavi vanuna vakwe.

³⁴ Yesu aku ku vone: Ku misava leyi valovola, valovoliwa.

³⁵ Kambe lava vataka pfumeleliwa kuvona nkama lowuya ni kupfuxiwa ka vafi, vangahalovoli, vangahalovoliwi.

³⁶ Hikusa vafana ni swirun'wa, i vana va Xikwembu Nkulukumba, vanga vana va kupfuka kufeni.

³⁷ Kambe amapfukela ya lava kufa, na ye Moxe akombisile amhakeni ya nkun'hu (xihlahla), loko atxhula Hosi, Xikwembu Nkulukumba wa Abrahamu, ni wa Yisaki, ni wa Yakobe.

³⁸ Ke Xikwembu Nkulukumba ahi Xikwembu Nkulukumba wa lava va kufa, kambe i wa lava vahanyaka. Hikusa ku yene hinkwavu vahanya.

³⁹ Avan'we ku vadondrisi va Nawu vayangula vaku: Mudondrisi, u hlayelamfuri!

⁴⁰ Kutani vangahatiyi kumuvutisa ntxhumu.

Kriste na Davida

⁴¹ Kambe Yesu aku ku vone: Xana vahlaya ha yini leswaku Kriste i n'wana Davida?

⁴² Kasi na ye Davida ahlaya a bukwini dra swidrumiso; aku: Xikwembu Nkulukumba ati ku Hosi yanga: Trhamisa xineneni xanga,

⁴³ nikota nibeka valala vaku vava vunalavutelo bya minkondro yaku.

⁴⁴ Ke Davida amutxhula Hosi yake; xana Kriste i n'wanakwe ha yini-ke?

Yesu loko asandra vadondrisi va Nawu

⁴⁵ A tiko hinkwadru driku na drimuyingela, Yesu aku ku vadondrisiwa: Tivonani ku vadondrisi va Nawu lava varandraka kuratela, na vayambali swiyambalu leswi swakuleha, varandra ni kulosiwa tihubyeni.

⁴⁶ Nikutidjulela switrhamu swale mahlweni amasinagogeni, ni vutrhamu lebyi bya kuranga aswilalelweni.

⁴⁷ Vone vadaka nhlengwe ya vamafelwa, ni hi kutiyentxisa vakhongota nkama wa kuleha. Kambe Xikwembu Nkulukumba atakhatisa a vana lavo, vatayamukela yavanyiso ledri drihundrisaka hi vukulu.