Lk 19 - Testamente Ledrimpswha ni Mapsalma

Yesu avitana Zakeya

¹ Kutani Yesu anhingena, atremakanya Yeriko.

² Afa kuni wanuna a vito drakwe ali Zakeya, afaka ali ndruna ya vahlengisi na ali mufuyi.

³ Afa adjuletela kuvona Yesu leswaku i mani. Swakuva leswi afaka ahluleka hinkonta ya xitrhungu, hikusa afa agomile,

⁴ ahangatrutruma mahlweni aya khandriya nkuweni akuva atamuvona, hikusa Yesu afa atahundra hi le ku wone.

⁵ Yesu ahangatlhasa ku mbangu lowo, alavisa henhla, amuvona, aku ku yene: Zakeya hangwesa uxika hikusa namunhla swifanekeli ndriya trhamisa andlwini yaku.

⁶ Ahangwesa axika, amuyamukela hi kutrhava.

⁷ Loko vaswivonile hinkwavu, van'unun'uta vaku, anhingeni ndlwini ya nuna wamudohi, awisa kone.

⁸ Kambe Zakeya ayima aku ku Hosi: Lavisa, we Hosi, nitapumbela swisiwana vukosi byanga hi le makari; loko nidile xa mhunu, nitamutlhelisela ha ka mune.

⁹ Yesu aku ku yene: Namunhla a kuhuluka kunhingeni andlwini leyi, hikusa na yene i n'wana Abrahamu.

¹⁰ Hikusa a N'wana wa Mhunu ateli kudjula ni kuhuluxa leswi swilahlekiki.

Xifaniso xa khume dra vampondo

¹¹ A xitrhungu afa xiyingela Yesu hikola ka timhaka hinkwatu leti. Swanga hi leswi afaka ali kusuhi ni le Yerusalema, a tiko driyanakanya leswaku swoswi-swoswi a Mfumu wa Xikwembu Nkulukumba wutavoneka.

¹² Yesu ayengeta ahlaya xifaniso lexi aku: Mun'we mhunu wa kutxhaviseka ayi ku tiko dra kule, aya yamukela vufumi byake na atatlhela abuya.

¹³ Avitana khume dra malandra yake, amanyika khume dra vampondo, aku ku vone: Bindrulani ha vone niko nibuya.

¹⁴ Kambe a vatiko dra kwavu afa vamuvenga; varuma swirun'wa antrhaku kwake vaku: Ahiswirandri akuva lweyo afuma a henhla kweru.

¹⁵ Kati, akubuyeni kwake na ayamukeli mfumu. Aleleta leswaku akuvitaniwe malandra yake lawa afaka amanyiki mali, akuva atativa leswi mun'wana-ni-mun'wana abindruliki swone.

¹⁶ Kutlhasa lweyi wa kuranga aku: Hosi, a mpondo yaku yibindruli khume dra vampondo.

¹⁷ Aku ku yene: I swahombe, nandra lweyi munene; leswi udumbekiki ku leswi switrongo, vana ni ntamu henhla ka khume dra miti.

¹⁸ Kutlhasi lweyi wa vubiri, aku: A mpondo yaku, we n'winyi wanga yi bindruli ntlhanu wa vampondo.

¹⁹ Ni ko ku lweyi aku: Na wene-ke, vana henhla ka ntlhanu wa miti.

²⁰ A mun'wana na yene ata aku: Hosi, a mpondo yaku hi yoleyi, afaka ndre kuyitrimbela nturwini,

²¹ hikusa nakutxhavile hi leswi unga mhunu wa kunonon'hwa, uteka leswi ungaswibekangakiki, utrhovelaka leswi ungaswibyalangakiki.

²² Aku ku yene: Nandra lweyi mfani; nitakuyavanyisa hi nomu waku. Afa uswitiva leswaku ni mhunu wa kunonon'hwa, nitekaka leswi ningaswibekangakiki, niva nitrhovela leswi ningaswibyalangakiki.

²³ Ha yini-ke ungabekanga mali yanga kuvabindruli, akuva a kubuyeni kwanga nitayivitana kun'we ni leyi yibindruliwiki?

²⁴ Ahangaku ku lava vayimiki kolahu: Mutekelani mpondo, nw'inyika lweyi angani khume dra va mpondo.

²⁵ Kambe vaku ku yene: N'winyi weru, ani khume dra va mpondo!

²⁶ A n'winyi ayangula: Nan'wibyela nili lweyo ni lweyo, lweyi anganaswu, atanyikiwa; kambe loko ali lweyi angaliki na ntxhumu, atatekeliwa ni leswi switrongo anganaswu.

²⁷ Loko vali valala vanga, lava vangadjuliki leswaku niva mufumi wavu, vatisani kola n'wivadlaya amahlweni kwanga.

Yesu anhingena Yerusalema

²⁸ Kuti loko ahlayi swoswo, Yesu afamba mahlweni antlhantukela Yerusalema.

²⁹ Kuti loko atrhindrekeli Betefage ni le Betaniya, hi le nhaveni leyi valiki i ya Minhlwari, aruma vabiri ku vadondrisiwa aku:

³⁰ Fambani n'wiya mutini lowu lavisaniki na n'wine, n'witaku n'winhingena ku wone n'witakuma mbongolwana leyi yikulekiwiki, yingasiki khandriyiwa hi mhunu; yikululani n'wiyitisa halenu.

³¹ Loko mhunu an'wivutisa aku, xana n'wiyikululela yini, n'witaku hikusa a Hosi yayidjula.

³² Vafambiki varumiwa, vaya kuma na switani heswi avabyelisiki xiswone.

³³ Vatiki navahakulula mbongolwana, avenyi va yone vaku ku vone: Xana n'wiyikululela yini mbongolwana?

³⁴ Vaku: Hikusa Hosi yayidjula.

³⁵ Vahangayitisa ku Yesu; vayandlala swiyambalu swavu a henhla ka mbongolwana. Vakhandriyisa Yesu ku yone.

³⁶ Aku na afamba, vayandlalela swiyambalu (makapulana) swavu andleleni.

³⁷ Loko ahatrhindrekela akufulameleni ka Nhava ya Minhlwari, a xitrhungu hinkwaxu xa vadondrisiwa xisungula kutrhava, xitlangela Xikwembu Nkulukumba hi ritu ledri dritlakukiki hinkonta ya mintamu hinkwayu le vanga mivona.

³⁸ Vaku: Akukhensiwe Mufumi, lweyi ataka hi vito dra Hosi! A kurula akuve Tilweni, ni kutwala ahenhlahenhla!

³⁹ A van'we va vafarisi lava afaka vali kone xitrhungwini, vaku ku yene: Mudondrisi, khwavela vadondrisiwa vaku.

⁴⁰ Yesu ayangula aku: Nan'wibyela nili, loko lava vamiyela, amaribye matabandlukana.

⁴¹ Loko atrhindrekelile a Yerusalema avona muti, Yesu awudrilela

⁴² aku: Loko fanga uswitivile na wene namunhla ntsena, leswi swivangaka kurula kwaku! Kambe swoswi, swifihlekile mahlweni kwaku!

⁴³ Hikusa a masiku matata ku wene, lawa avalala vaku vataka kubiyela linhlampfu, vakutrandrela vakusivela, hi matlhelo hinkwawu.

⁴⁴ Vatakumbundrumuxela hansi, wene ni vanaku lava vanga ku wene, vangasiye ribye henhla ka ribye drin'wana ku wene, hileswi ungawutivangakiki nkama wa kuhuluxiwa kwaku hi Xikwembu Nkulukumba.

Kuhambana ni swiyeyiso ku Yindlu ya Xikwembu Nkulukumba

⁴⁵ Yesu atiki anhingena ndlwini ya Xikwembu Nkulukumba, asungula kuhlongola lava vaxaviselanaka ku yone.

⁴⁶ 46 Aku ku vone: Xikwembu Nkulukumba ali ku matlhelweni ya Kuhlawuleka: A yindlu yanga yitava yindlu ya kukhongota ku yone; kambe n'wine n'wiyihambi mhakwa ya vayivi.

⁴⁷ Yesu afa adondrisa hi siku drin'wana ni drin'wana andlwini ya Hosi, kambe a vaprista ni vadondrisi va Nawu ni vakulu va tiko afa vadjula kumudlaya.

⁴⁸ Swakuva leswi afaka vapfumala leswi vangayentxaka swone; hi leswi a tiko hinkwadru afaka drinamarela ku yene drimuyingela.