Lk 18 - Testamente Ledrimpswha ni Mapsalma

Xisindriso xa xikhongoto

¹ Yesu ayengeta avabyela xifaniso xa leswaku vafanekela kukhongota minkama hinkwayu vangakarali,

² aku: Afa kuni mutremi mun'we ku muti mun'we, lweyi afaka angatxhavi Xikwembu Nkulukumba; ni mhunu angahlayi ntxhumu ha yene.

³ Afa kuni wansati lweyi wa mufelwa amutini wolowo, ata ku yene aku: Nilulamisele mhaka ku lweyi anitengisaka.

⁴ Kambe kuhela nkama na angapfumeli. Kambe antrhaku ka swone atiyanakanya aku: Nambi ningatxhavi Xikwembu Nkulukumba, ningahlayi leswaku mhunu i ntxhumu,

⁵ nitamululamisela a mhaka lweyi wa mufelwa, leswi anikarataka, suka atanitlhanyisa nhloko hi kutekisa kwake kakuta.

⁶ Kutani Hosi yiku: Yingelani leswi swihlayiwaka hi mutremi lweyi angalulamangakiki.

⁷ Xana Xikwembu Nkulukumba ana angalulamiseli vahlawuliwa vakwe, lava vabandlukanaka ku yene vusiku ni nhlikanhi, na alehisa mbilu ha vone?

⁸ Nan'wibyela nili: Atahangwesa avalulamisela a mhaka yavu. Kambe xana N'wana wa Mhunu, akutlhaseni kwake, atakuma vupfumeli amisaveni xana?

Kutitrongohata xikhongotweni

⁹ Yesu atlhela ahlaya xifaniso lexi ku van'wana lava vatidumbaka, vaku valulamile, vadrela van'wana:

¹⁰ A vhanu vabiri afa vantlhantukela a Tempeleni vayakhongota. Mun'we afa ali mufarisi, a mun'wana ali muhlengisi.

¹¹ Lweyi wa mufarisi ayima atikhongotela hi le ndreni kwake aku: Xikwembu Nkulukumba nakutlangela hi leswi ningaliki swanga hi van'wana vhanu, vanga swiyivi, ni vasomboloki, ni vawoswani, nambi kuli kufana ni lweyi wa muhakelisi wa tinemba lweyi.

¹² Nititrona swakuda kubiri hi vhiki, ninyika swa vukhume bya hinkwaswu leswi niswikumaka.

¹³ Kambe lweyi wa muhlengisi ayima kule, angatiyi ni kutlakuxela mahlu yake tilweni, atiba xifuva aku: We Xikwembu Nkulukumba, nidrivalele mine ninga mudohi!

¹⁴ Yesu aku nan'wibyela: A muhlengisi afulameli andlwini yake na ahlayiwi lweyi wa kululama kutlula mufarisi. Hikusa mun'wana-ni-mun'wana lweyi atitlakuxaka atatrongahatiwa; kambe lweyi atitrongohataka atatlakuxiwa.

Vatrongwana ni Mfumu wa Xikwembu Nkulukumba

¹⁵ Kutani vatisela Yesu vatrongwana akuva avakhumba, vatiki vaswivona, a vadondrisiwa vakhwavela vhanu lavo.

¹⁶ Kambe Yesu avavitana aku: Trikani vatrongwana vata ku mine, n'wingavatsimbeni. Hikusa a Mfumu wa Xikwembu Nkulukumba i wa lava vakunhati.

¹⁷ Nihlayelamfuri nili ku n'wine, lweyi angayamukelikiki a Mfumu wa Xikwembu Nkulukumba swanga hi ntrongwana, angaka anganhingeni ku wone.

Vafuyi ni Mfumu wa Xikwembu Nkulukumba

¹⁸ Mun'we wa ndruna avutisi Yesu aku: Mudondrisi lweyi munene, xana nitayentxa yini akuva nida pfindla dra vutomi lebyi byingahelikiki?

¹⁹ Yesu aku ku yene: Xana unihlayela yini lweyi munene? Akuna lweyi munene loko angali Xikwembu Nkulukumba ntsena.

²⁰ Wamitiva a milawu leyi miliki: Ungayentxi vumbuye, ungadlayi, ungayivi, ungahumexi vumboni bya kuhemba, txhava tatana waku ni mamana waku.

²¹ Kambe yene aku: Nabekisi hinkwaswu leswo na nahali ntrongo.

²² Atiki awaswiyingela, Yesu aku ku yene: Kusali xin'we lexi uxipfumalaka: xavisa hinkwaswu leswi unganaswu, uyavela swisiwana. Hi kone utakava ni nhlengwe a matilweni. Hi kone ungataka, unilandra.

²³ Atiki ayingela leswo, avaviseka ngopfu, hikusa afa afuyi ngopfu.

²⁴ Yesu loko amulavisa aku: Swanonon'hwa ku lava vangani vukosi akunhingena aNfun'wini wa Xikwembu Nkulukumba.

²⁵ Swanabyala akuva kamela drinhingena hi moya wa ximari, akutlula loko mufuyi anhingena aNfun'wini wa Xikwembu Nkulukumba.

²⁶ Lava afaka vaswiyingela vaku: Loko swilitanu, hi mani lweyi angahulukaka xana?

²⁷ Kambe Yesu ayanguli aku: Leswi swingakotekiki ku vhanu, ku Xikwembu Nkulukumba swakoteka.

²⁸ Petrosi aku: vona, hitriki sweru hikulandra.

²⁹ Yesu aku ku vone: Nihlayelamfuri nili ku n'wine, akuna mhunu lweyi atrikiki yindlu, kumbe nsati, kumbe vamakwavu, kumbe vapswali, kumbe vana, hinkonta ya Mfumu wa Xikwembu Nkulukumba,

³⁰ angatiki yamukela leswi switlulaka ngopfu ankameni lowu, na ankameni lowu wutaka atakuma vutomi lebyi byingahelikiki.

Yesu atlhela akhanela hikufa ni kupfuka kwake

³¹ Yesu atekiki lava vakhume na vabiri, aku ku vone: Vonani, hintlhantukela Yerusalema; kutani kutahetiseka hinkwaswu leswi switraliwiki hi vaprofeta hi tlhelo dra N'wana wa Mhunu.

³² Hikusa atanyiketiwa ku va-Matiko, ahlekiwa, asandriwa, athukeliwa mari.

³³ Vataku vamupswhita hi minkhavi, vamudlaya; kambe hi siku dra vuraru atapfuka.

³⁴ Kambe a vadondrisiwa avayingelanga ntxhumu ku swone; afa ritu ledro drifihlekile ku vone, vakohla hi leswi aswihlayiki.

Kuhanyisiwa ka wa kufa-mahlu

³⁵ Kuti loko Yesu atrhindrekela Yeriko, mun'we mhunu wa kufa-mahlu afa trhami hi le ndleleni, akombela.

³⁶ Ayingela xitrhungu lexi xikhalutaka, avutisa leswaku, i mpswini leswo.

³⁷ Vamubyela leswaku i Yesu wa le Nazarete akhalutaka.

³⁸ Yene, abandlukana aku: Yesu, N'wana Davida, niyentxele vurombe!

³⁹ Kambe lava afaka varangi mahlweni, vamukhwavela vaku a amiyele. Kambe yene ayengesa abandlukana ngopfu aku: N'wana Davida, niyentxele vurombe!

⁴⁰ Yesu ayima aku avamutise ku yene; loko atrhindrekelile, Yesu amuvutisa:

⁴¹ Xana urandra leswaku nikuyentxela yini? Yene aku: Hosi, leswaku nitlhela nivona.

⁴² Yesu aku ku yene: Tlhela uvona! A kupfumela kwaku kukuhanyisile.

⁴³ Kutani, hi nomu-lo atlhela avona; ahanga mulandra, atwalisa Xikwembu Nkulukumba. Loko vaswivonile, a vatiko hinkwavu vatwalisa Xikwembu Nkulukumba.