Lk 16 - Testamente Ledrimpswha ni Mapsalma

Xifanisu xa mulaviseli lweyi angadumbekangakiki

¹ Yesu ayengeta abyela a vadondrisiwa vakwe aku: Afa kuni mhunu lweyi afaka ani vukosi; afaka ali ni mulaviseli. Kutani a vhanu varambela mulaviseli ku n'winyi wakwe hileswi ahangalasaka vukosi byake.

² Amuvitaniki aku ku yene: Xana i mpswini leswi niswiyingelaka ha wene? Trhandra swa vulaviseli byaku, hikusa ungahavi mulaviseli.

³ A mulaviseli atiyanakanya aku: Nitayentxa yini, leswi an'winyi wanga anitekelaka vulaviseli byanga? A kudrima nahluleka; a kukombela nini tingana.

⁴ Naswitiva leswi nitakayentxisa xiswone, akuva nitaku nahumexiwa, niyamukeliwa atindlwini tavu.

⁵ Ahanga vitana ha mun'we ha mun'we lava afaka veni nandru ku n'winyi wakwe; aku ku lweyi wakusungula: Xana una nandru muni ku n'winyi wanga?

⁶ Aku: I dzana (100) dra mimpimu ya mafura. A mulaviseli aku ku yene: Teka a papela draku utrhamisa uhangwesa utrala ntlhanu wa makume (50).

⁷ Kutani aku ku mun'wanyana: Wene-ke, xana una nandru mun? Aku: I dzana (100) dra mimpimu ya mavele. Amulaviseli aku ku yene: Teka papela draku, utrala ntlhanu wa makume na mararu (80).

⁸ A n'winyi wakwe akhensa mulaviseli lweyi wa kudoha, leswi ayentxiki hi vutlhari. Hikusa a vana vamisava leyi vatlula a vana vakuvaninga hi vutlhari alixakeni dravu.

⁹ Kutani Yesu aku, na mine nan'wibyela nili: Tiyentxelani vanakuloni hi vukosi lebyi byinga lulamangakiki, akuva byitaku byahela, van'wiyamukela atiyindlweni leti tingahelikiki.

¹⁰ Lweyi adumbekaka ku leswi switrongo awadumbeka ni ku leswi swikulu. Lweyi angalulamikiki ku leswi switrongo, ni leswi swikulu angalulamanga.

¹¹ Loko-ke n'wingadumbekanga avukosini lebyi bya kuka byingalulamanga, xana i mani lweyi atakan'widumbela vukosi lebyi byinga byone?

¹² Nangweso loko n'wingadumbekanga hi swa van'wana i mani lweyi ataka n'winyika leswi swinga swenu?

¹³ Akuna nandra lweyi angaswikotaka kutirela vinyi vabiri, hikusa kumbe atavenga mun'we arandra mun'wana, kumbe atanamarela ku mun'we adrela mun'wana. An'wina kuswikota kutirela Xikwembu Nkulukumba na Mamona (mali).

Nawu ni Mfumu wa Xikwembu Nkulukumba

¹⁴ A Vafarisi vanga varandri va mali, afa vayingela hinkwaswu leswo, vahleka Yesu.

¹⁵ Yene aku ku vone: N'wine, n'witiyentxa lava valulamiki amahlweni ka vhanu, kambe Xikwembu Nkulukumba ativa timbilu tenu. Hikusa leswi swingani lisima amakari ka vhanu, ku Xikwembu Nkulukumba swibihile.

¹⁶ A nawu wa Moxe ni dondro ya vaprofeta switirile kuya tlhasa nkameni wa Yohana Mubabatisi. Kolahu a Ivangeli ya Mfumu wa Xikwembu Nkulukumba yireriwa, mani na mani ayentxa hi ntamu kunhingena kone.

¹⁷ Kolahu-ke swavevuka akuva tilo ni misava swihundra, kutlula loko aletelanyana dra nawu driwa.

Mhaka ya kudlaya vukati

¹⁸ Lweyi ahlongolaka nsati wakwe atlhela ateka mun'wana ayentxa vumbuye naye; ni lweyi atekaka nsati lweyi ahlongoliwiki, na yene ayentxa vumbuye.

Lazaro ni mufuyi

¹⁹ Afa kuni mhunu wa mufuyi, afaka yambala swiyambalu leswi swa libungu swakudula ngopfu, ada swavunandri hi masiku hinkwawu.

²⁰ Nakone afa kuni wa xisiwana, wa kutala hi swilondra a vito drakwe ali Lazaro, afaka abekiwa nyangweni ya lweyi wa mufuyi.

²¹ Afa anavela kuxura hi vuntlhantlha lebyi afaka byiwa tafuleni dra mufuyi, nato timbyana afa tita, titatamunampswela swilondra.

²² Lweyi wa xisiwana afa, ayisiwa hi swirun'wa axifuveni xa Abrahamu. Naye mufuyi afa, alahliwa.

²³ Loko ali akheleni dra ndrilo ambangwini wa kuxaniseka, atlakuxa mahlu, avona Abrahamu na ali kule, na Lazaro ali xifuveni xakwe.

²⁴ Amuvitaniki aku: Tatana Abrahamu, niyentxele lirere, uruma Lazaro apeta a litiho drakwe amatini, atatanitimula lidrimi, hikusa nixaniseka ngopfu alangavini ledri!

²⁵ Kambe Abrahamu aku: N'wananga, drimuka leswaku wa yamukeli leswi swa hombe avutomini byaku hinkwabyu; kasi Lazaro ayamukeli makhombo. Swoswi awamiyetiwa kasi wene wavaviseka.

²⁶ Mfuri, kubekiwi a xiwa lexi xikulu amakari kweru na n'wine, akuva lava vanga halenu, lava vadjulaka kutremakanya vaya halanu ku n'wine vangaswikoti, nambi lava vanga kohalanu loko vadjula kuta halenu.

²⁷ Nangweso a mufuyi aku: Nakukhongota, we tatana Abrahamu, leswaku uruma Lazaro andlwini ya tatana wanga.

²⁸ Hikusa nina ntlhanu wa vamakweru akuva Lazaro aya vamamulela, suka vatata na vone ku mbangu lowu wa kuxaniseka.

²⁹ Abrahamu aku ku yene: Vana Moxe ni vaprofeta, avavayingele.

³⁰ Kambe aku: Im'hi, tatana Abrahamu. Kambe loko mun'we ku lava vakufa aya ku vone, vatandruluka.

³¹ Kambe Abrahamu aku ku yene: Loko vangayingisete. Moxe ni vaprofeta, ana vangapfumeli nambi mun'we ku lava vakufa apfuka.