Biblia Todo Logo
Bìoball air-loidhne

- Sanasan -

Lk 14 - Testamente Ledrimpswha ni Mapsalma


Kuhanyisiwa ka mbabyi hi Savata

1 Kati loko Yesu anhingeni a kaya ka mun'we wa mufambisi wa vafarisi, hi Savata, a kuyada kone, a vafarisi vone afa valavisisa Yesu leswi atakaswiyentxa.

2 Ke, amahlweni kwake afa kuni mhunu lweyi wa kuvabya hi Xitramba (mavabyi ya kupfimba a khuri).

3 Kolahu Yesu a vutisa ku vadondrisi va Nawu ni vafarisi aku: Xana swapfumeleliwa kuhanyisa hi Savata, kumbe ahi swone xana?

4 Vone vamiyela. Yesu ahanga muteka, amuholisa, amumukisa.

5 Atlhela nangweso avayangula aku: Xana hi wini ku n'wine lweyi anaka angakahluli asusa a n'wanakwe lweyi aweliki kheleni, kumbe homu yake, hi Savata xana?

6 Vahluleka kumuyangula xa ntxhumu amaritwini lawo.


Akulanga vumbangu bya kuranga ankhubyini

7 Yesu loko avona leswaku a varambiwa vatihlawulela a switrhamu swakuranga ankhubyini avabekeli xifaniso aku ku vone:

8 Loko urambiwa hi mhunu ankhubyini wa vukati, ungayitrhamisa axitrhan'wini xa kuranga, suka amun'wana lweyi atxhabyiwaka kutlula wene arambiwile na yene.

9 Kutani lweyi an'wirambiki wene na yene, ata atatakubyela aku: Sukela mhunu lweyi axitrhan'wini lexi. Kutani utayatrhama hi tingana axitrhan'wini xa vugamu.

10 Kambe loko urambiwile, famba uya trhamisa axitrhan'wini xa vugamu, akuva lweyi akurambiki, ataku atlhasa, akubyela: Nakulori, ntlhantukela henhla. Kolahu utatwalisiwa amahlweni ka hinkwavu lava vatrhamiki tafuleni kun'we na wene.

11 Hikusa lweyo ni lweyo lweyi atitlakuxaka atatrongahatiwa, ni lweyo ni lweyo lweyi atitrongohataka atatlakuxiwa.


Kunyika loku kunene

12 Yesu abyeli lweyi amurambiki aku: Loko uhamba xifihlulo kumbe xilalelo, ungaviramba vanakuloni, nambi vali vamakwenu, nambi me maxaka yaku, kumbe lava va kufuya lava uyakelaniki navu, suka na vone vakuramba, vakutlhelisela.

13 Kambe loko uhamba xifihlulo ramba swisiwana, ni lava vakukhuta, ni swilema, ni lava vakufa-mahlu.

14 Utava ni ndjombo kolahu, hi leswi vatakapfumala a swakukutlhelisela, hikusa switatlheliseliwa ku wene hi Xikwembu Nkulukumba akupfukeni ka lava valulamiki.


Kurambiwa kuya aNfun'wini wa Xikwembu Nkulukumba
( Mt 22:1-10 )

15 A mun'we ku lava afaka vatrhamisi na Yesu atafuleni, ayingeliki maritu yake aku ku yene: Akatekile lweyi adaka a kati a Mfun'wini wa Xikwembu Nkulukumba!

16 Yesu aku ku yene: A mun'we mhunu ahambi xilalelo lexikulu, aramba vhanu vanyingi.

17 Aruma nandra wakwe hi nkama wa kulalela, ayabyela lava varambiwiki aku: Tanani, hikusa swibekisiwile hinkwaswu.

18 Kutani vasungula kutilandrula mun'wana-ni-mun'wana. Lweyi wa kuranga aku ku yene: Nixavi nsimu, nifanela kuhuma swoswi, niyayivona. Nakukhongota famba uyanilandrulela.

19 A mun'wana aku: Nixavi khume dra tihavi, nifamba niyatidringisa. Nakukhongota famba uyanilandrulela.

20 A mun'wanyana aku: Nihlomi nsati, hikola kaleswo nahluleka kuya.

21 Lweyi wa nandra amukiki aya bikela n'winyi wakwe a maritu lawu. Kolahu an'winyi wa yindlu ahlundruka aku ku nandra wakwe: Hangwesa uhuma uya tihubyeni ni le tindleleni, utisa a swisiwana ni swilema ni lava vakufa-mahlu ni lava vakukhuta.

22 Nangweso a nandra aku: Swiyentxiwi swanga hi leleto draku, kambe a mbangu wehe kone.

23 A n'winyi ahangaku ku nandra: Huma uya tindleleni, ni le mapangwini, uvakungumeta vanhingena akuva yindlu yanga yitala.

24 Hikusa nili ku n'wine, ku vavanuna lava afaka varambiwile, angakone lweyi ataka nampswa xilalelo xanga.


Tinfanelo ta kuva mudondrisiwa wa Yesu
( Mt 10:37-38 )

25 Afa switrhungu leswi swinyingi swifamba na Yesu, kutani yene andruluka aku ku swone:

26 Loko mhunu ata ku mine, na angavengi tatana wakwe, ni mamana wakwe, ni nkatakwe, ni vana, ni vamakwavu va xinuna ni va vaxisati, na byo vutomi byake mfuri, angana kuva mudondrisiwa wanga.

27 Ni lweyi wakuka angabyatrhi a xihambanu xakwe anilandra, angana kuva mudondrisiwa wanga.

28 Hikusa hi wini ku n'wine lweyi loko adjula kuyaka xihondro, anhaka angarangi a trhamisa avona leswi aswibekisiki, kumbe xana swidringanaka a kuheta?

29 Suka ataku loko ayaki masungulu ahluleka kuheta, hinkwavu lava muvonaka vasungula kumuhleka, vaku:

30 A mhunu lweyi esungula kuyaka kutani ahluleka kuheta.

31 Kumbe a mufumi hi wini lweyi loko afamba ayalwa ni mun'wana mufumi, anaka angasunguli hi kutrhamisa a pimisa leswaku xana angava ni ntamu wa kutlhangaveta hi dzana dra madzana (10.000) lweyi angana madzana mabiri ya madzana (20.000)?

32 Loko swingetanu angaruma tindruna na ahali kule, ayakombela kurula ka tiko.

33 Hileswo-ke, lweyi ku n'wine angatrikiki hinkwaswu leswi anganaswu, angana kuva mudondrisiwa wanga.

34 Kutani ayengesa aku: A munyu i ntxhumu lowa hombe, kambe loko munyu wupswhama, xana wuta nandrikisiwa ha yini?

35 Awaha pfuni ntxhumu, nambi kuva misava nambi kuva vulongo; vawutxukumeta handle. Lweyi angani tindleve takuyingela a ayingiseti.

Xironga New Testament with Psalms © Bible Society in Mozambique, 2007.

Bible Society of Mozambique
Lean sinn:



Sanasan