Lk 13 - Testamente Ledrimpswha ni Mapsalma

Xivilelo xa kundruluka

¹ Ankameni lowo kavini van'wana lava vangabyela Yesu swa va Galileya, lava Pilato angapatrinyeta ngati yavu kun'we ni ngati ya swihari swa timhamba tavu.

² Yesu ayanguli aku ku vone: Xana n'wipimisa leswaku a va-Galileya lavo afa vali swidohi kutlula va-Galileya kulobye hinkwavu, leswi vanga kuma khombo ledro xana?

³ Im'hi, nili ku n'wine kambe loko n'wingandruluki, n'witasuvisa xiswoswo na n'wine.

⁴ Nambi vali lava va khume na ntlhanu na vararu, lava a xihondro xa Silowe xingavawela henhla xivadlaya, xana n'wipimisa leswaku afa veni nandru lowu wutlulaka wa vhanu hinkwavu lava vayakiki Yerusalema?

⁵ Im'hi, nili ku n'wine kambe loko n'winga ndruluki, n'witasuvisa xiswoswo hinkwenu.

Nsinya wa kupfumala mihandru

⁶ Yesu a yengesa avabyela xifaniso lexi: A mhunu afa ani nkuwa lowu wusimekiwiki alivhinyeni drakwe. Ata, atatadjula mihandru ku wone, angamikumi.

⁷ Aku ku lweyi wa mudrimi: Lavisa! Kuhundri malembe mararu na nitatadjula mihandru ankuweni wolo ningamikumi. Wutreme; xana wuhonela yini a misava xana?

⁸ A mudrimi ayangula aku ku yene: N'winyi wanga, ungawutrika ni lembe ledri, nitakela amatlhelweni ya wone, nitxhela vulongo;

⁹ kumbe xana wutahumexa mihandru haxawu. Loko swingali tanu, utawutrema.

Yesu ahanyisa wansati hi Savata

¹⁰ Yesu afa adondrisa a sinagogeni hi Savata.

¹¹ Afa kuni wansati, lweyi afaka axanisiwa hi moya wa mavabyi, ha khume dra malembe na ntlhanu na mararu (18). Afa awovekile angaswikoti ni kutrongo kuwololoka.

¹² Amuvoniki Yesu, amuvitana, aku ku yene: Wansati, u ntrhunxekile avuvabyini byaku.

¹³ Ava amuntlhanteka ni mavoko, hi nomu-lo awololoka, adrumisa Xikwembu Nkulukumba.

¹⁴ A n'winyi wa sinagoga avayangula na ahlundrukile hileswi Yesu amuholisiki hi siku dra Savata, abyela xitrhungu aku: Kuna ntlhanu wa masiku na drin'we lawa swifanekelaka kutira ha wone. Tanani ha wone n'witataholisiwa, kunge hi siku dra Savata.

¹⁵ Kambe a Hosi yi muyangula yiku: N'wi vamandrendre! A mun'wana-ni-mun'wana wenu xana angantrhunxi a homu yake, kumbe mbongolo, axidelweni hi Savata, ayiyisa kunweni?

¹⁶ Kambe lweyi, anga n'wana Abrahamu, Sathana angamuboha ha khume dra malembe ni ntlhanu na mararu (18), xana afa swingafanekeli akuva antrhunxiwa kubohiweni koloko hi siku dra Savata xana?

¹⁷ Atiki Yesu ahlaya leswo, vava ni tingana avalala vakwe hinkwavu. Kambe a xitrhungu hinkwaxu xitrhava hi hinkwaswu leswi swakuxonga leswi swiyentxiwiki ha Yesu.

Nhleke ya sinapi

¹⁸ Hileswo-ke, Yesu avabyela aku: Xana a Mfumu wa Xikwembu Nkulukumba wufana na yini? Nitawufanisa na yini xana?

¹⁹ Wufana ni nhleke ya sinapi leyi mhunu ayitekiki ayayibyala xirambeni xakwe. Yimila, wuva nsinya lowu wukulu ngopfu lakakuva a tinyanyana titatatumbela atinkambyini ta wone.

²⁰ Atlhela aku: Nitafanisa a Mfumu wa Xikwembu Nkulukumba na yini?

²¹ Wufana ni handrelo leyi a wansati ayitekiki, ayibehela mapeni ya mimpimu miraru makota makukumuka.

Ndlela ya vutomi lebyi byingahelikiki

²² Yesu afa atifambela hi miti ni mitana adondrisa, na akhomi a ndlela ya kuya a Yerusalema.

²³ A mun'we mhunu aku ku yene: Hosi, xana lava vahulukaka i vakuhlawa xana? Kambe Yesu aku ku yene:

²⁴ Khinyelani kunhingena hi nyangwa leyi ya kukhuma hikusa nan'wibyela, lava vanyingi vatadjula kunhingena kambe vatahluleka.

²⁵ Kutaku loko a n'winyi wa yindlu asekeleki apfala nyangwa, n'witasungula kuyima ahandle n'wigongondra n'wiku: Hosi hipfulele. Kambe yone yitan'wiyangula yiku: Anitivi lomu n'wipfaka kone.

²⁶ Hi kone n'witakaku: Hadi, hinwa amahlweni kwaku, mfuri wadondrisile atihubyeni teru.

²⁷ A Hosi yitaku: Nan'wibyela nili: Anitivi lomu n'wipfaka kone. Sukani ku mine, n'wine hinkwenu vasomboloki.

²⁸ Hi kone kutakava ni swidrilo ni kuketrela ka menyo, loko n'wivona Abrahamu na Yisaki na Yakobe ni vaprofeta hinkwavu, aNfun'wini wa Xikwembu Nkulukumba, kasi n'wine n'witxukumetiwi ahandle.

²⁹ Vatapfa Vuxeni ni le Vupeladambu ni le N'walungu ni le Nyingitimu, vatatrhama kudeni aNfun'wini wa Xikwembu Nkulukumba.

³⁰ Xileswo vakone lava vakugamisa vatakava vakuranga; na swone vakone lava vakuranga vatakava vakugamisa.

Yesu atwela vurombe Yerusalema

³¹ Ankameni wolowo kati vambeni va Vafarisi, vaku ku yene: Suka la ufamba, hikusa Heroda adjula kukudlaya.

³² Yesu aku ku vone: Fambani n'wiyabyela a buwana ledro, leswaku nihlongola mademoni, nahaholisa timbabyi namunhla ni mundruku, niva niheta hi siku dra vuraru.

³³ Ntsena kudjuleka nifamba namunhla ni mundruku ni mundlwana; hikusa aswifaneli leswaku a muprofeta adlayiwa a handle ka Yerusalema.

³⁴ Yerusalema, Yerusalema! Wene udlayaka vaprofeta, uva ukhandletela hi maribye varumiwa lava Xikwembu Nkulukumba avarumaka ku wene! Afa niswirandri kungani ke a kuhlengeleta vanaku swanga hi huku loko yihlengeleta switxuwana swa yone ahansi ka timpapa ta yone, kambe awuswirandranga!

³⁵ Lavisani a yindlu yenu yitasala vuswayone. Kambe nan'wibyela nili, n'wingahandrivoni, kukota kutlhasa siku ledri n'witakaku: Akutovokisiwe lweyi ataka hi vito dra Hosi.