Lk 12 - Testamente Ledrimpswha ni Mapsalma

Kutivonela ku vukanganyisi

¹ Ankameni lowo a switrhungu swa makume ya madzana swihlengeletana, lakakuva swiva swikandretelana. Yesu asungula a kubyela vadondrisiwa vakwe aku: Tivonelani ku handrelo ya vafarisi, manga mandrendre.

² Kambe akuna xantxhumu xa kufuneketiwa lexi xa kuka xingatifunukuliwa, na kone akuna xa ntxhumu xakufihliwa lexi xa kuka xingatitibyiwa.

³ Hileswo-ke, hinkwaswu leswi n'witakaswihlaya munyameni, swita yingeliwa kuvonekiseni, ni leswi n'wihlevetelaniki atindleveni na n'wili ndlwini switahlayiwa aswihlungwini.

Lweyi hifanelaka a kumutxhava

⁴ Yesu ayi mahlweni aku: Nan'wibyela n'wine n'winga vanakulori, n'wingatxhaveni lava vadlayaka miri, na vangena ntamu wa kuyentxa ntxhumu antrhaku ka swone.

⁵ Nitan'wibyela lweyi n'wifanekelaka kuva n'wimutxhava; txhavani Xikwembu Nkulukumba, lweyi loko adlayile, angani ntamu wa kutxukumetela akheleni. Ahina nan'wibyela txhavani yelweyo.

⁶ Xana avaxavisi ntlhanu wa swindjengeletana ha swimalana swibiri xana? Kasi akuna ni xin'we ku swone lexi xakuva xinga drivaliwa amahlweni ka Xikwembu Nkulukumba.

⁷ Mfuri nayo misisi ya tinhloko tenu mihlayiwile hinkwayu. Hileswo-ke n'wingatxhaveni, hikusa mitlula swindjengeletana leswi swakutala.

Kuyamukela Kriste kumbe kumuyala

⁸ Kambe nan'wibyela nili, lweyi atakanihlaya mahlweni ka vhanu, naye N'wana wa Mhunu atamuhlaya mahlweni ka swirun'wa swa Xikwembu Nkulukumba.

⁹ Kambe lweyi anilandrulaka mahlweni ka vhanu, ata landruliwa na yene amahlweni ka swirun'wa swa Xikwembu Nkulukumba.

¹⁰ Nangweso lweyo ni lweyo lweyi ataka hlaya ritu dra kusola N'wana wa Mhunu, ata drivaleliwa, kambe lweyi asandraka Moya wa Kuxwenga, angaka angadrivaleliwi.

¹¹ Kambe loko van'wiyisa amasinagogeni ni le ku vafumi ni le tindruneni, n'wingavihlatiyela hi leswi n'wita kaya tiyangulela swone, kumbe hi leswi n'wita kaya hlaya,

¹² hikusa Moya wa Kuxwenga hi wone wutaka n'widondrisa, ankameni wolowu, leswi n'wifanekelaka kuhlaya swone.

Mhangu ya kuva xipfundri

¹³ Kutani a mun'we axitrhungwini aku ku Yesu: Mudondrisi, byela makweru ayavelana na mine pfindla.

¹⁴ Kambe Yesu aku ku yene: Nakulori, xana i mani lweyi andribekiki kuva mutremi kumbe muyaveli wenu?

¹⁵ Ahangaku ku vone hinkwavu: Tivonelani n'witxhava a kufelela hinkwaku hikusa a vutomi bya mhunu angabyikumi ha vukosi byake, nambi bye mutalela.

¹⁶ Ahanga vabyela xifaniso lexi, aku: A nsimu ya mhunu lweyi wa mufuyi afa yipfuni ngopfu.

¹⁷ Yene atiyanakanyela mbilwini yake aku: Nitayentxa yini, leswi ningekena mbangu lowu ninga hlengeletaka mihandru yanga ku wone?

¹⁸ Ahangaku: Nitayentxa leswi, nitahahlula swintlhanta swanga, niyaka leswi swikulu, nihlengeleta kone a mihandru ni nhlengwe yanga hinkwayu.

¹⁹ Niku ku hika dranga: We hika, uni nhlengwe leyi ya kutala, leyi yibekiseliwiki malembe lawa manyingi. Wisa, uda, unwa, utitrhavela.

²⁰ Kambe Xikwembu Nkulukumba amubyela aku: We singe, hi vusiku byolebyi kutavitaniwa hika draku. Leswi uswihlengeletiki, xana switava swa mani?

²¹ Yesu aheta hi kuhlaya leswi aku: Hi swoswo ni ku lweyi atihlengeletelaka vupfundri na angafuyeli ku Xikwembu Nkulukumba.

Xikwembu Nkulukumba abekisa vana vakwe

²² Kambe Yesu aku ku vadondrisiwa vakwe: Hileswo-ke, nan'wibyela nili: n'wingahlatiyeleleni a vutomi byenu hileswaku n'witada yini, ni leswaku amirini yenu, n'witayambala yini.

²³ Hikusa a vutomi byitlula a swakuda, na yone miri, mitlula swiyambalu.

²⁴ Yanakanyani magwavava hikusa amabyali, amatrhoveli, amana ngula ni xintlhanta, kambe Xikwembu Nkulukumba awamawundla. Na kasi-ke n'wine n'witlula tinyanyana ka kunhati.

²⁵ Kambe i mani a makari kwenu lweyi angaswikotaka a kuyengesela kutrongo a nkama wa kuhanya kwake hikola ka kuhlatiyela kwake?

²⁶ Loko n'wihluleka ni kutira leswi switrongo, xana n'wihlatiyela ha yini hi swin'wana?

²⁷ Yanakanyani magon'hwa leswi mamilisaka xiswone, a matiri, amaluki. Kambe nan'wibyela nili, nambi ali Salomoni, akuphatimeni kwake hinkwaku, angayambalanga swanga ha drin'we dra wone.

²⁸ Nambi byanyi lebyi byinga kone namunhla, Xikwembu Nkulukumba abyiyambexisaka xileswi, na mundruku byitakatxukumetiwa andrilweni, xana ngopfu-ngopfu n'wine angaka angan'wiyambexi, vhanu va kupfumela kutrongo?

²⁹ Ke, na n'wine, n'wingahlatiyeleni hi leswi n'witakada swone, nambi kunwa.

³⁰ Hinkwaswu leswo swidjuliwa hi lava vapimisaka swa misava leyi, kambe Tatana wenu awaswitiva leswaku n'waswipfumala leswo.

³¹ Kusungula djulani a Mfumu wa Xikwembu Nkulukumba, hinkwaswu n'witayengeseliwa.

³² Yesu ayi mahlweni aku: Ungatxhave, we ntlhambinyana, hikusa swirandri hi Tatana wenu a kun'winyika a Mfumu.

³³ Xavisani leswi n'winga naswu, n'winyika a swisiwana. Tiyentxelani minkwama ya mali leyi ya kuka minga honeki, ni nhlengwe leyi yinga helikiki Matilweni, lomu a muyivi angatlhasikiki, ni laha a nsumba yinga honikiki kone.

³⁴ Hikusa lomu anhlengwe yenu yinga kone, hi lomu nato timbilu tenu titakava kone.

Kubuya ka Hosi

³⁵ Yesu atlhela aku: A tinkhalu tenu atitrimbiwe, ni mimotre yenu amilumekiwe.

³⁶ Fananani ni lava valaviselaka n'winyi wavu, loko atabuya apfa nkhubyini, akuva ataku akubuyeni kwake, agongondra, vahatla vamupfulela.

³⁷ Makatekile a malandra lawa a n'winyi atakaku abuya, atatamakuma na malavelela. Nihlayelamfuri nili ku n'wine: a n'winyi atatitrimba likhalu a matrhamisisa kudeni, amatirela.

³⁸ Ni loko atlhasa hi lavelelo dra vubiri, kumbe dra vuraru, amakuma na mayentxa swoswo, makatekile malandra lawo.

³⁹ Kambe tivani leswaku loko fanga a n'winyi wa yindlu ativile nkama lowu a muyivi ataka ha wone, ina ahitekile, anga pfumelanga leswaku a yindlu yake yitlhanyiwa.

⁴⁰ Na n'wine trhamani na n'witibekisela hikusa a N'wana wa Mhunu ata hi nkama lowu n'wingawupimisangakiki.

Tinfanelo a ntirweni

⁴¹ Kutani Petrosi aku ku yene: Hosi, xana ubyela hine ntsena a xifaniso lexi kumbe ubyela hinkwavu xana?

⁴² Yesu aku: Hiwini a mulaviseli wa yindlu lweyi wa kudumbeka, ava atlhariha, lweyi a n'winyi wakwe ataka mubeka, alavisela vatiri vakwe, akuva atavayavela swakuda hi nkama lowu wufanekelaka?

⁴³ Akatekile a nandra lweyi a n'winyi wakwe, atakaku ata, atatamukuma na yentxisa xiswoswo.

⁴⁴ Nihlayelamfuri nili ku n'wine: atamubeka ahenhla ka nhlengwe yake hinkwayu.

⁴⁵ Kambe loko lweyi wa nandra aku ambilwini yake: A n'winyi wanga awahlwela kuta, asungula kuba vatiri kulobye, ada, anwa, apopswa.

⁴⁶ A n'winyi wa nandra lweyo atatlhasa hi siku ledri angamulaviselikiki, ni hi nkama lowu angawutivikiki, amunyika a xikhatisu xikulu, amuyavanyisa kun'we ni lava vangapfumelikiki.

⁴⁷ A nandra lweyi ativaka a kurandra ka n'winyi wakwe, ava angabekisi, anga yentxi kurandra kwake, atakhatisiwa ngopfu.

⁴⁸ Kambe lweyi angakutivikiki, ayentxiki leswi swingafanelikiki, atakhatisiwa kutrongo. Lweyo ni lweyo lweyi anyikiwiki ngopfu, kutadjuliwa ngopfu ku yene, nangweso lweyi adumbisiwaka ngopfu, kutadjuliwa ngopfu ku yene.

A kuyavana loku kupfuxiwaka ha Yesu

⁴⁹ Yesu aya mahlweni hi kudondrisa aku: Niteli kutata txukumetela ndrilo amisaveni. Naharandra yini leswi wupfuraka ni swoswi!

⁵⁰ Nini babatiso ledri nitaka babatisiwa ha drone, nivaviseka swakunhati a kukondra drihetiseka!

⁵¹ Xana n'wiyanakanya leswaku niteli kutata nyika kurula amisaveni? Im'hi, nan'wibyela kakuva kutravukana.

⁵² Hikusa kusukela swoswi kuya mahlweni loko vali ntlhanu andlwini yin'we, vatayavana, vararu valwa na vabiri, na vo vabiri valwa na vararu.

⁵³ A tatana atatravukana ni n'wanakwe wa xinuna, na ye n'wana atravukana ni tatana wakwe. A mamana atatravukana ni n'wanakwe wa xisati, na ye n'wana ata travukana ni mamana wakwe, a n'wingi atatravukana ni n'wingi wakwe.

Swikombiso swa ntamu wa Yesu

⁵⁴ Yesu ahangaku ku switrhungu: Loko n'wivona tlavi drihuma vupeladambu, n'wihatla n'wiku: Kutava ni mpfula. Swiva swiyentxisa xiswoswo.

⁵⁵ Ni loko n'wivona a nyingitimu yihunga, n'wiku: Kutava ni mumu. Swiva swiyentxisa xiswoswo.

⁵⁶ N'wi vamandrendre! N'waswikota kupimisa mavonekela ya misava ni ya tilo; kambe xana a swikombiso swa nkama lowu an'wiswikoti hayini kuswipimisa?

⁵⁷ Mfuri, xana i swakuyini loko n'winga tiyavanyiseli ha swenu leswi swi lulamiki?

⁵⁸ A yengeta aku: Hikusa loko uya ku mufumi kun'we ni lweyi utengisanaka na yene, dringisa akuva urulisana na yene, na mehe ndleleni, suka akukokela ku mutremi, a mutremi atakunyiketa ku ndruna ya huvu, a ndruna ya huvu yikunhingenisa abohelweni.

⁵⁹ Nakubyela ungahumi kone ukondra udriha malinyana ya kuhetelela.