Lk 1 - Testamente Ledrimpswha ni Mapsalma

¹ Murandriwa Teofilo: Lava vanyingi vadringisile kudrungula matimu ya leswi swihumeleliki amakari kweru,

² na vadondrisi va Nawu leswi hingativisiwa hi lava vangaswivona hinkwaswu kusukela akusunguleni, na vandruluki malandra ya ritu.

³ Nakone, na mine ntrhaku kakuva nikambisisi hi vunyaminyami hinkwaswu leswi swihumeleliki kusukela akusunguleni, nikumi leswaku swingaxonga kukutralela swone, hi ndlela ya longoloko,

⁴ akuva utatiya ku leswi vakudondrisiki swone.

Kutivisiwa ka kubelekiwa ka Yohana Mubabatisi

⁵ Ankameni wa Heroda, mufumi wa Yudeya, afa kuni muprista lweyi a vito drakwe afaka ali Zakariya, wa ntlawa wa Abiya. A nsati wa Zakaria, afa ali Elizabeta, wa vana va Aroni, muprista.

⁶ Afa vali valulami hi vubiri byavu amahlweni ka Xikwembu Nkulukumba, vafamba milawini hinkwayu ni le swileletweni hinkwaswu swa Hosi, vangasoliwi ha ntxhumu.

⁷ Kambe afa vangena vana hi leswi Elizabeta afaka ali xihiko, mfuri afa vaduhwalile hivubiri byavu.

⁸ Siku drin'wana, Zakariya afa ali Tempeleni alandra ntiro wakwe swanga muprista, hikusa afa wuli nkama wakwe.

⁹ Afa wuli ntoloveto a makari ka vaprista, kuyentxa mpswhampswha akuvona leswaku i mani lweyi afanelaka kunhingena a Tempeleni akuva ahisa magandrelo vuhiselweni.

¹⁰ Na ali kari ahisa magandrelo a vhanu afa vakhongota a handle.

¹¹ Kolahu kuhumelela ntrumi ya Hosi ku Zakaria, na yiyimi axineneni xa vuhiselo bya magandrelo.

¹² Kuti loko Zakariya avona ntrumi atxhuka kutani atala hi kutxhava.

¹³ Kambe ntrumi yiku ku yene: Ungatxhavi Zakariya! Hikusa akukhongota kwaku Xikwembu Nkulukumba akuyingelile: Elizabeta, nsati waku, atakupswalela n'wana, utamutxhula vito dra Yohana.

¹⁴ Atava xitrhaviso ni kutrhavisisa ku wene, ni lava va kutala vatatrhavela kubelekiwa kwake.

¹⁵ A n'wana atava nkulu amahlweni ka Xikwembu Nkulukumba. Angatinwa vhinyo nambi swakunwa swini ni swini swakubava loko apswaliwile, atava a tali hi Moya wa Kuxwenga.

¹⁶ Atayentxa leswaku vanyingi va-Israyelea vatlhelela ku Hosi Xikwembu Nkulukumba wavu.

¹⁷ Yene atafamba mahlweni ka Hosi, na ani moya ni ntamu swanga Eliya, akuva andruluta a timbilu ta vapswali ku vana, ni kundruluta lava va kuka-kuyingiseta vavani mayanakanyela ya valulami, ni kululamisela a Hosi a xitrhungu lexi xitibekiseliki.

¹⁸ Kolahu Zakariya avutisa a ntrumi aku: Xana nitaswitiva hayini leswo, hikusa niduhwalile na yene a nsati wanga aduhwalili?

¹⁹ A ntrumi yiyangula yiku ku yene: Mine ni Gabriyele. Ni le ntirweni wa Xikwembu Nkulukumba na Yene anirumi kutatakhanela na wene akuva nikunyika a madrungula lawa ya manene.

²⁰ Kambe, swanga hi leswi ungapfumelangakiki ku leswi nikubyeliki, utava mbheveve kukota kutlhasa a siku ledri switakahumelela, hikuva hinkwaswu switayentxeka ankameni wa kone.

²¹ A vhanu lava afaka varindrela Zakariya, vahlamala hi kuhlwela kwake a Tempeleni.

²² Loko yene ahumile, ahluleka kukhanela, kutani vone vayingelisisi leswaku ave ni xivoniso. Akhanela navu hi swikombiso ni kuya mahlweni na ali mbheveve.

²³ Loko Zakariya aheti masiku ya ntiro a Tempeleni, atlheleli kaya.

²⁴ Ntrhaku ka nkama wa kukari, Elizabeta avini nyimba, na angahumi ndlwini hi mpfhuka wa ntlhanu wa tihweti.

²⁵ A Hosi yiniyentxeli xiswoswo, hi kunivonisisa, akuva yihelisa a tingana tanga amahlweni ka vhanu.

A ntrumi yitivisa kubelekiwa ka Yesu

²⁶ Loko Elizabeta ani nyimba ya ntlhanu wa tihweti na yin'we, Xikwembu Nkulukumba arumi ntrumi Gabriyele amutini wa le Galileya lowu valiki i Nazarete,

²⁷ ku mun'we wa nhwanyana wa kuka-angasinativana ni wanuna, afaka abutiwi hi wanuna wa yindlu ya Davida, valiki hi Yosefa; a vito dra lweyi wa nhwanyana afa ali Maria.

²⁸ A ntrumi yitiki yinhingena lomu afaka ali kone yiku ku yene: Xawani, wene, ukumiki timpswalu leti tikulu! A Hosi yina wene.

²⁹ Kambe yene atxhuka hi kuyingela a maritu lawo, kutani ayanakanya leswaku xana alosela ledri i ledri dra kuyini.

³⁰ Kutani a ntrumi yiku ku yene: Ungatxhave Maria, hikusa ukumi timpswalu ku Xikwembu Nkulukumba!

³¹ Vona, utavani nyimba, utabeleka a n'wana wa wandrisanyana, utakamutxhula vito dra Yesu.

³² Yene atava nkulu, atahlayiwa N'wana wa Lweyi wa le henhla-henhla; Hosi, Xikwembu Nkulukumba atamunyika a xitrhamu-xa-vufumi xa Davida, tatana wakwe;

³³ atafuma hi la kungahelikiki a yindlu ya Yakobe, a mfumu wakwe wungativani vugamu.

³⁴ Kolahu Maria aku ku ntrumi: Xana switayentxisa kuyini, leswi ningasikinativana ni wanuna?

³⁵ Kambe a ntrumi yimuyangula yiku: A Moya wa Kuxwenga wutaxikela ahenhla kwaku, ni ntamu wa Lweyi wa le henhla-henhla wutakufukumeta swanga hi tlavi. Hileswo-ke lweyi atakapswaliwa i wa kuxwenga, atatxhuliwa N'wana wa Xikwembu Nkulukumba.

³⁶ Na yene, Elizabeta a xaka draku atava ni n'wana wa wandrisanyana avuduhwatini byake. Lweyi afaka vaku aswinakukoteka kuvani vana, kambe swoswi ali ku hweti ya vuntlhanu na yin'we.

³⁷ Hikusa ku Xikwembu Nkulukumba akuna xa ntxhumu lexi xingakotekikiki ku swidumbisu swake hinkwaswu.

³⁸ Maria aku: Hi mine lweyi, ni nandra wa Hosi, aswiyentxeki ku mine swanga hi ritu draku. Kutani a ntrumi yisuka ku yene.

Maria ayendrela Elizabeta

³⁹ Amasikwini lawo, Maria asuki hi kukahlula aya atinhaveni, amutini wa Yuda,

⁴⁰ anhingena andlwini ya Zakariya, alosa Elizabeta.

⁴¹ Loko Elizabeta ayingela kulosa ka Maria, a n'wana atxhuka anyimbeni yake. Kutani Elizabeta atala hi Moya wa Kuxwenga.

⁴² Kutani abandlukana hi ritu dra kutlakuka aku: Wene u wa kukhenseka amakari ka vavasati hinkwavu, na kone kukhenseka a n'wana lweyi anganyimbeni yaku.

⁴³ Kutani xana ni mani mine akuva a mamana wa Hosi yanga aniyendrela?

⁴⁴ Hikusa loko niyingeli a kulosa kwaku a n'wana atxhukile hi kutrhava andreni kwanga.

⁴⁵ Na swone kukateki lweyi apfumeliki leswaku leswi Hosi yimubyeliki swone switayentxeka.

Lisimu dra Maria dra kudrumisa Hosi

⁴⁶ Kutani Maria aku: A hika dranga dritwalisa Hosi

⁴⁷ ni moya wanga wutinyoxeli ku Xikwembu Nkulukumba Muhuluxi wanga,

⁴⁸ hikusa alavisi a kutitrongohata ka nandra wakwe! Hikusa lavisani, akusukela swoswi a vhanu va minkama hinkwayu vatanihlaya lweyi wa kukateka.

⁴⁹ Hileswi Lweyi wa ntamu aniyentxeliki leswi swikulu. A vito drakwe drixwengile,

⁵⁰ ni lilondro drakwe dri le minkameni ni le minkameni, ku lava vamutxhavaka.

⁵¹ Atiri hi ntamu, hi voko drakwe. Ahangalasi lava va kutikulisa akuyanakanyeni ka timbilu tavu,

⁵² Awisi lava va ntamu aswitrhan'wini swavu swa vufumi, ava atlakuxa lava va kutrongahateka.

⁵³ Axurisi lava va ndlala hi leswi swinene, ava atlhelisa lava kufuya na vangena ntxhumu.

⁵⁴ Apfunisi Israyele a nandra wakwe, na adrimuka a lirere drakwe,

⁵⁵ swanga hi leswi akhaneliki ku vatatana veru, ku Abrahamu ni vana vakwe hi la kungahelikiki.

⁵⁶ Maria atrhami na Elizabeta tihweti tiraru, kutani atlhelela a kaya kwake.

Kubelekiwa ka Yohana Mubabatisi

⁵⁷ A nkama loko wutlhasile, Elizabeta aphuluki n'wana wa wandrisanyana.

⁵⁸ Lava vayakelaniki na yene ni maxaka yake vayingela leswaku a Hosi yikulisi a lirere dra Yone ku yene, vahangatrhava kun'we na yene.

⁵⁹ Loko a ndrisanyana atlhanganisi ntlhanu wa masiku na mararu, vayamusoka, na vadjula kumutxhula a vito dra tatana wakwe Zakariya.

⁶⁰ A mamana wakwe aku: Im'hi! Afanela kutxhuliwa vito dra Yohana.

⁶¹ Vaku ku yene: Akuna mhunu amaxakeni yaku lweyi a vitaniwaka hi vito ledro!

⁶² Vakwehleta a tatana wakwe leswaku xana adjula akuva a n'wana atxhulisiwa kuyini.

⁶³ Zakariya akombeliki xihleleti, atrala aku: Yohana hi dro vito drakwe. Vahlamala hinkwavu.

⁶⁴ Hi nkama wolowo Zakariya avulavula, asungula kutwalisa Xikwembu Nkulukumba.

⁶⁵ Kutani hinkwavu lava vayakelaniki navu, vakhomiwa hi kutxhava, ni le tikweni hinkwadru dra le tinhaveni ta le Yudeya vahangalasa timhaka leti tihumeleliki.

⁶⁶ Hinkwavu lava vatiyingeliki afa vatibekisa timbilwini tavu na vaku: Xana a n'wana lweyi atava lweyi wa kuyini? Nakone a voko dra Hosi ha kunene dri na yene.

Lisimu dra Zakariya

⁶⁷ Zakariya a tatana wa ntrongwana, atala hi Moya wa Kuxwenga aprofeta aku:

⁶⁸ A kukhensiwe Hosi Xikwembu Nkulukumba wa Israyele, leswi ayendreliki ava atirula a tiko drakwe.

⁶⁹ Ahitumbuluxeliki a ntamu wa kuhuluxa, andlwini ya Davida nandra wakwe.

⁷⁰ Swanga hi leswi angakhanela hi nomu wa vaprofeta vakwe va kuhlawuleka, va minkama-ni-minkama ya khale:

⁷¹ Leswaku atahihuluxa ku valala veru ni le mandleni ya hinkwavu lava vahivengaka;

⁷² akuva ayentxela a lirere ku vatatana veru, ni kudrimuka a xipfumelelanu xakwe lexi xa kuxwenga;

⁷³ kunga kuhlambanya loku akuhlambanyeliki Abrahamu tatana weru,

⁷⁴ akuta hinyika akuhuluxiwa amavokweni ya valala veru, leswaku himugandrela na hingatxhavi ntxhumu,

⁷⁵ hi kuhlawuleka ni kululama amahlweni kwake, amasikwini hinkwawu ya kuhanya kweru.

⁷⁶ Na wene, n'wananga, utahlayiwa muprofeta wa Xikwembu Nkulukumba wa le Henhla-henhla. Hikusa utafamba amahlweni ka Hosi, akuva ubekisa ndlela ya yone.

⁷⁷ Akuva utivisa tiko drakwe ni leswaku Xikwembu Nkulukumba adridrivaleli swihono swadrone leswaku dritahuluxiwa,

⁷⁸ hinkonta ya lirere ledri drikulu dra Xikwembu Nkulukumba weru, hikusa a kuphatima ka dambu loko kupfaka henhla-henhla kutahiyendrela.

⁷⁹ Kuphatima loko kutavaninga lava vahanyaka munyameni ni le ntrhutini wa lifu ni kufambisa a mikondro yeru andleleni ya kurula.

⁸⁰ Kutani a ntrongwana akula, aveni ntamu amoyeni, na kone ayitrhama huleni kukondra kutlhasa a siku dra kutivonekisa kwake ku Israyele.