I Yhn 4 - Testamente Ledrimpswha ni Mapsalma

Xikwembu Nkulukumba ni Muyali wa Kriste

¹ Varandriwa, n'winga pfumeleni ku mimoya hinkwayu; kambe kambisisani kusungula leswaku i mimoya ya Xikwembu Nkulukumba hi xihlayelamfuri, hikusa kuni vaprofeta vanyingi vamadrimi vahangalakiki misaveni.

² Ku leswo n'witativa a Moya wa Xikwembu Nkulukumba: A moya un'wana-ni-un'wana lowu wuhlayaka leswaku Yesu Kriste ati anyameni, iwa Xikwembu Nkulukumba.

³ Kambe, a moya mun'wana-ni-mun'wana lowu wukanetaka leswaku Yesu Kriste ati anyameni ahi wa Xikwembu Nkulukumba; lowu hiwo moya wa nala(antikriste) wa Kriste, lowu n'wiswiyingeliki kuhlayiwa leswaku wutava yene nala (antikriste), swoswi ke, akone a misaveni.

⁴ Vana vanga, n'wine n'wiva Xikwembu Nkulukumba, kutani mihluli vaprofeta va madrimi, hikusa lweyi atrhamaka ku n'wine i nkulu kutlula lweyi anga misaveni.

⁵ Vone i va misava, hileswo-ke vavulavulisaka ximisava; kutani a misava mava yingiseta.

⁶ Kambe hine hi va Xikwembu Nkulukumba. Lweyi ativaka Xikwembu Nkulukumba, awa hi yingiseta, kasi lweyi a ngeke wa Xikwembu angahiyingeli. Hi xiswoswi hine hawutiva a Moya wa xihlayelamfuri ni moya wa xihono

Xikwembu Nkulukumba i lirandru

⁷ Varandriwa, ahirandraneni van'we ku van'wana, hikusa a lirandru dripfa ku Xikwembu Nkulukumba. Mun'wana-ni-mun'wana lweyi arandraka apswaliwi hi Xikwembu Nkulukumba, na swone ativa Xikwembu Nkulukumba.

⁸ Lweyi angarandrikiki angativi Xikwembu Nkulukumba, hikusa Xikwembu Nkulukumba i lirandru.

⁹ Kuvi xiswoswi dritivonekisiki alirandru dra Xikwembu Nkulukumba ku hine: hileswaku Xikwembu Nkulukumba arumi N'wanake, lweyi wakupswaliwa swake amisaveni, akuva ha Yene hitahanya.

¹⁰ Kutani a lirandru drile kuleswi: akuvanga hine lava varandriki Xikwembu Nkulukumba, kambe kuvi Yene ahirandriki kutani ahirumeli N'wana wakwe, akuva kudrivaleliwa swidoho sweru.

¹¹ Varandriwa, loko Xikwembu Nkulukumba ahirandrisi xileswi, na hine hinfanela hirandranana van'we-ku-van'wana.

¹² Anga kone mhunu lweyi asamaka a vona Xikwembu Nkulukumba ni siku ni drin'we, loko hine hirandranana, van'we ku van'wana Xikwembu ale ku hine, kutani a lirandru drakwe driyentxa hikuhetiseka avutomi byeru.

¹³ Xileswo hitiva leswaku hi trhami ku Yene, na Yene atrhami ku hine, hi leswi: ahinyiki Moya wakwe.

¹⁴ Hine hiswivonile kutani hinyika vumboni bya leswaku Tatana arumi N'wana wakwe akuva Muhuluxi wa misava.

¹⁵ Lweyo ni lweyo lweyi ahlayaka leswaku Yesu i N'wana wa Xikwembu Nkulukumba, Xikwembu Nkulukumba atrhami ku yene, na yene ku Xikwembu Nkulukumba.

¹⁶ Na hine haswitiva, mfuri ha pfumela alirandro ledri Xikwembu Nkulukumba anganadrone ha hine: Xikwembu Nkulukumba i lirandru, kutani lweyi atrhamaka alirandrwini atrhami ku Xikwembu Nkulukumba, na Yene Xikwembu Nkulukumba trhami ku yene.

¹⁷ Xileswo a lirandru drihetisekisiwa ku hine, akuva hi siku drakuyavanyisa hitava ni kudumba, swanga hi leswi Yene angaswone, na hine hixiswoswo amisaveni leyi.

¹⁸ Alirandrwini akuna kutxhava, kambe alirandru dra xihlayelamfuri dritxukumeta kutxhava kule; kone avutoya byivanga kukhatisiwa, lweyi angani vutoya anga hetisekisiwanga lirandrwini.

¹⁹ Hine hini lirandru hileswi Yene ahirandriki kusunguleni.

²⁰ Loko mhunu aku arandra Xikwembu Nkulukumba, nakasi ahambula makwavu, ani madrimi. Ha kunene, lweyi angarandrikiki makwavu, lweyi amuvonaka, anganakuswikota akurandra Xikwembu Nkulukumba, lweyi angamuvonikiki!

²¹ Ke, hini leleto ledri hisiyeliwiki ha Yene, ledri draku: lweyi arandraka Xikwembu Nkulukumba na kone afanela akurandra makwavu.