I Yhn 1 - Testamente Ledrimpswha ni Mapsalma

Ritu dra vutomi

¹ Lexi afaka xikone kehe kusunguleni, lexi hixiyingeliki, lexi hixivoniki hi mahlu yeru, lexi hi xihlaleliki, lexi mandla yeru maxikhumbiki, xinga xa ritu dra vutomi.

² Hikusa a vutomi bya vonekisiwile, hi byi vonile, hi timboni ta byone, hi n'wibyela vutomi lebyingahelikiki, lebyi afaka byi li ku Tatana, kutani byi vonekisiwi ku hine.

³ Lexi hi xivoniki, ni lexi hi xiyingeliki, hi lexo hi n'wibyelaka xone, akuva na n'wine n'witlhangana na hine. Na xileswi hitlhanganisiwi kun'we na Tatana, ni N'wanake Yesu Kriste.

⁴ Hi n'witralela timhaka leti akuva akunyoxa kwenu kuhetiseka.

Xikwembu Nkulukumba i livaningo

⁵ Ke, hi ledri a ritu ledri hidriyingeliki ku N'wana hi n'wibyelaka drone, leswaku Xikwembu Nkulukumba i livaningo, ku Yene a kuna munyama ni kutrongo.

⁶ Loko hiku hini kutlhangana na Yene, na kasi hi famba munyameni, ha hemba, ahiyentxi a xihlayelamfuri.

⁷ Kambe loko hi famba livaningweni, swanga ha Yene anga livaningweni, hitlhangana kun'we, ni ngati ya Yesu, N'wanake, yihibasisa swidoho hinkwaswu.

⁸ Loko hiku ahina xidoho, ha kutikanganyisa, a xihlayelamfuri a xikone ku hine.

⁹ Loko hitihlaya swidoho sweru Xikwembu awadumbeka, alulamile kuhi drivalela swidoho sweru ni kuhi basisa avusombolokeni hinkwabyu.

¹⁰ Loko hiku ahidohanga hi muyentxa muhembi, a ritu drakwe adri kone ku hine.