I Tmt 5 - Testamente Ledrimpswha ni Mapsalma

Tinfanelo ta vapfumeli

¹ Ungakhate hi kunonon'hwa a mhunu lwe adhuwhaliki, wa xinuna, kambe mutratriye swanga hi tatana waku, lava vampswha, swanga vamakwenu,

² ni vhanu vakuduhwala va xisati, swanga vamamana vaku, ni lava vampswha va xisati, swanga vamakwenu, hi kubasa ka mbilu hinkwaku.

³ Vana ni swihluwa ku vavasati va mafelwa, lava vanga mafelwa hi xihlayelamfuri.

⁴ Kambe loko mun'we mufelwa ali ni vana kumbe vatukulu, avadondre, hi kusungula, andangwini wavu, a kutinyiketela avukhongotwini, ni kutlhelisela vapswali vavu leswi vanga vayentxela swone; hikuva leswo swayamukeleka amahlweni ka Xikwembu Nkulukumba.

⁵ Hikusa a wansati lweyi anga mufelwa hi xihlayelamfuri, lweyi asaliki vuswake, alavisela ku Xikwembu Nkulukumba, atiyisela amikombelweni ni le swikhongotweni, vusiku ni nhlikanhi;

⁶ kambe lweyi ahanyaka akutitrhaveleni ka misava leyi, afile, nambi loko ahahanya.

⁷ Valelete leswo, akuva kungavi na ntxhumu lowu vangasoliwaka ha wone.

⁸ Kambe loko mhunu angalondrisi a va le kwake, ngopfu-ngopfu ku vandangu wakwe, lweyo alandruli khale a vupfumeli, mfuri atlula ni lweyi angalikinakupfumela.

⁹ A wansati wa mufelwa angatraliwi abukwini loko angatlhanganisanga ntlhanu wa makume na drin'we (60) ya malembe, na ave nsati wa nuna mun'we ntsena;

¹⁰ ani vumboni bya leswaku aveni mintiro minene, awundli swinene a vana vakwe, arureli vayeni, ahlampswi a minkondro ya vahlawuleki, apfuni vaxaniseki, ni leswaku a tinyiketeli amintirweni hinkwayu le minene.

¹¹ Kambe yala a kutrala a vavasati va mafelwa lava vampswha, hikusa loko valandra a kunavela kwavu kuhambanaka na Kriste, vadjula kutlhela vatekiwa,

¹² vakuma nandru hikusa vadreli kupfumela kwavu ka kusungula;

¹³ na kone mfuri vadondra a kuloloha, vafamba-famba hi ma kaya ka vhanu, angali kuloloha ntsena, kambe ni kuvulavula ngopfu ni kutinhingenisela lomu vangavitaniwangakiki, na vavulavula leswi vangafanelikiki.

¹⁴ Ke nidjula leswaku a vavasati va mafelwa lava vampswha vatekiwa, vavani vana, vafuma tiyindlu tavu, vanganyiki mukaneti nkama wa kuruka;

¹⁵ hikusa ni swoswi, van'we vandrulukile, valandra Sathana.

¹⁶ Loko kuni wansati wa mupfumeli lweyi angani mafelwa, amalondre, akuva kereke dringabindreliwi, drikota kulondra mafelwa lawa mangalikina n'winyi.

Mayelanu ni vakulu va kereke

¹⁷ A vakulu va kereke lava varangelaka ha hombe, vafanekela hi kuyentxeliwa swihluwa hi kuhindra-hindra, ngopfu-ngopfu lava vatiraka hi ntamu aritwini ni le kudondriseni.

¹⁸ Hikusa a Matralwa mali: Ungavipfala a nomu wa homu leyi yihulaka a mavele; ni leswaku: A mutiri afanekeli hi hakelo drakwe.

¹⁹ Ungaviyamukela a ritu dra kurambela nkulu wa kereke, handle ka loko kuni timboni tibiri kumbe tiraru.

²⁰ Lava vadohaka, vakhate amahlweni ka hinkwavu, akuva van'wana na vone vatavani kutxhava.

²¹ Nikuleleta hi ntamu, mahlweni ka Xikwembu Nkulukumba ni le ku Hosi Yesu Kriste, ni le ku tintrumi leti tihlawuliwiki, leswaku ubekisa a swileleto leswi, ungarangisi swiyavanyiso swa magugu, ungayentxi ntxhumu hi xihlawu-hlawu.

²² Ungantlhanteki mhunu a mavoko hi xihatla; ungatipatri ku swidoho swa van'wana; tibekise uva lweyi abasiki.

²³ Ungahatami unwa mati ntsena, kambe n'wana ni vhinyu dritrongo hinkonta ya xidelo xaku, ni hinkonta ya mavabyi yaku ya nkama-ni-nkama.

²⁴ A swidoho swa van'we vhanu swativonekisa, swivarangeli akuyavanyisiweni, kambe a swa van'wna, switativonekisa ntrhaku.

²⁵ Hi xiswoswo, a mintiro le minene mi le livaleni, mfuri leyi mihambanaka na yone, amina kufihleka.