I Tmt 4 - Testamente Ledrimpswha ni Mapsalma

Kutlhelela ntrhaku avugan'wini bya minkama

¹ A Moya wahlayisisa leswaku, aminkameni ya vugamu, van'we vatatlhelela ntrhaku avupfumeleni, vayingisetisisa a mimoya kukanganyisa, ni kulandra tidondro ta mademoni,

² hi mandrendre ya vahlayi va madrimi, lava a vanonon'whisiki a lipfalu dravu,

³ vatsimbisaka vhanu a kutekana, valeletaka ni leswaku kungadiwe swakuda swakukari, leswi Xikwembu Nkulukumba aswitumbuluxeliki kuva swidiwa hi kutlangela, hi vapfumeli lava vativaka a xihlayelamfuri.

⁴ Hikusa hinkwaswu leswi swivumbiwiki hi Xikwembu Nkulukumba i swa hombe, mfuri akuna leswi swingadreliwaka, loko swiyamukeliwa hi kutlangela,

⁵ hikusa swixwengisiwi hi Ritu dra Xikwembu Nkulukumba ni hi xikhongoto.

Tinfanelo ta mutireli munene wa Yesu Kriste

⁶ Loko udondrisa leswo ku vamakwenu, utava mutireli munene wa Yesu Kriste, na uxurisiwi hi maritu ya vupfumeli ni ya dondro leyi yinene, leyi wene uyilandraka;

⁷ kambe yala a swihitana leswi swingafambelaniki ni vupfumeli, leswi mfuri swingahapfuniki ntxhumu, utinyiketela antirweni wa vukhongoti.

⁸ Hikusa a kutinyiketela antirweni wa miri swipfuna kutrongo, kambe a ntiro wa vukhongoti wapfuna ku hinkwaswu, na kone wuni xidumbiso xa vutomi bya swoswi ni bya nkama lowu wutaka.

⁹ A ritu ledri dradumbeka na kone drifaneliwa hi kupfumela hinkwaku;

¹⁰ hi swoleswo-ke hitikaratelaka ni kulwela swone, hikuva hibeki a kulavisela kweru ku Xikwembu Nkulukumba lweyi ahanyaka, lweyi anga Muhuluxi wa vhanu hinkwavu, ngopfu-ngopfu wa vapfumeli.

¹¹ Leleta uva udondrisa a mintxhumu leyo.

¹² Kungavi na mhunu lweyi asolaka a vumpswha byaku, kambe vana xikombiso ku vapfumeli, aritwini, amahanyeleni, aliradrwini, akupfumeleni ni le kubaseni ka mbilu.

¹³ Tinyiketeli akuhlayeni ka Matralwa, akutratriyeni, ni le kudondriseni kukondra nitlhasa.

¹⁴ Ungatrike a kubekisa a nyiko leyi yinga ku wene, leyi unyikiwiki yone hi vuprofeta ni hi kuntlhantekiwa mavoko hi nkulu wa kereke.

¹⁵ Yanakanya leswo utiyisela ku swone, akuva akuya-mahlweni kwaku kuvoneka ku hinkwavu.

¹⁶ Tibekise wene ha vuswaku, ubekisa ni dondro, utiyisela ku swone; hikuva loko uyentxa leswo utatihuluxa wene, uhuluxa ni lava vakuyingelaka.