I Tmt 3 - Testamente Ledrimpswha ni Mapsalma

Mahanyela ya vabixopo ni vadiyakoni

¹ Dradumbeka a ritu ledri: Loko a mhunu anavela a vubixopo, adjula a ntiro wunene.

² Hileswo-ke, kudjuleka leswaku a bixopo ava lweyi angasolekiki, anga nuna wa nsati mun'we, adaka ni kunwa hi kutipimelela, atikhomaka, angatitlakuxiki, arurelaka vayeni, ativaka kudondrisa,

³ angatinyiketeliki akunweni na kone angalebyiki; kambe ave lweyi akombisaka lirandru, anga wa kurula, lweyi angarandriki mali;

⁴ lweyi afumaka ha hombe a yindlu yake, abekisaka vanakwe akuyingiseteni ni le swihluweni hinkwaswu;

⁵ Hikusa loko a mhunu angaswikoti a kufuma a yindlu yake, xana angabekisisa kuyini a kereke dra Xikwembu Nkulukumba?

⁶ Angavi lweyi ahaka kubabatisiwa, akuva angatitikukumuxa, kutani awela akuyavanyiseliweni ka Diavulosi.

⁷ Mfuri kudjuleka ava lweyi ankhensiwaka hi va le handle, akuva angatxhuki awela akusoliweni ni le ntlhan'wini wa Diyavulosi.

⁸ A vadiakoni, hi ndlela yoleyo, kudjuleka vava vhanu lava vafaneliwaka hi xitxhavu, vangavi na tindrimi tibiri, vangatinyiketeli kunweni, vanganaveli bindru ledri drimfani,

⁹ na vabekisa a xihundla xa vupfumeli alipfalwini ledri dribasiki.

¹⁰ Avakambiwe, kusungula, ntrhaku vabekiwa antirweni wa vudiakoni na vangana kusoliwa.

¹¹ Aswive xitanu na vone a vavasati, avave lava vafaneliwaka hi xitxhavu, vangavi va mahlevo, vava lava vatipimelelaka akudeni ni le kunweni, vava lava vadumbekaka ku hinkwaswu.

¹² A vadiakoni, mun'wana-ni-mun'wana ave nuna wa nsati mun'we, vafumaka ha hombe a vana vavu ni tiyindlu tavu.

¹³ Hikuva lava vatiraka ha hombe a vudiakoni vatikumela a vutrhamu byinene, ni kutiya akupfumeleni ku Kriste Yesu.

¹⁴ Nikutralela leswo na nidumba leswaku nitata ku wene ndreni ka nkamanyana;

¹⁵ kambe loko nihlwela, utativa a mayentxela lawa mafanekelaka andlwini ya Xikwembu Nkulukumba, dringa kereke dra Xikwembu Nkulukumba lweyi ahanyaka, mhandre ni xiseketelo xa xihlayelamfuri.

¹⁶ Kunene a xihundla xa vukhongoti i xikulu: Lweyi akombisiwiki anyameni, ayentxiwi mululami hi Moya avoniwi hi tintrumi, ahuweleliwi amakari ka matiko (ka va-Matiko), awundliwi lomu misaveni, ayamukeliwi akuphatimeni.