I Tmt 2 - Testamente Ledrimpswha ni Mapsalma

Dondro mayelanu ni Xikhongoto

¹ Hileswo-ke, hi kusungula, nitratriya, leswaku kuyentxiwa a swikombelo, swikhongoto, kutlangela ni kukombelela a vhanu hinkwavu,

² vafumi, ni hinkwavu lava vanga switrhan'wini swa vurangeli, akuva hihanya ha hombe, ni hi kurula, avukhongotweni hinkwabyu, ni le kusimameni ka xitxhavu hinkwaxu.

³ Leswi i swinene mfuri swakhenseka amahlweni ka Xikwembu Nkulukumba, Muhuluxi weru,

⁴ Lweyi adjulaka leswaku vhanu hinkwavu vahuluxiwa, ni leswaku vatlhasa akutiveni ka xihlayelamfuri.

⁵ Hikusa kuni Xikwembu Nkulukumba mun'we ni mutlhanganisi mun'we wa Xikwembu Nkulukumba ni vhanu, Kriste Yesu, mhunu,

⁶ lweyi atinyiketiki, ava xitirulo hinkonta ya hinkwavu, byili vumboni aminkameni leyi mifanekeliki;

⁷ vumboni lebyi mine nibekiwiki swanga mureri, ni mupostola wa byone, nihlayelamfuri, anihembi, mine ni mudondrisi wa va-Matiko akupfumeleni ni le xihlayelamfurini.

⁸ Hileswo-ke, nidjula leswaku a vavanuna vakhongota amimbangwini hinkwayu, na vatlakuxa mavoko ya kuxwenga, vangalina mahlundru nambi kukanetana.

⁹ Hi mayentxela wolawo, na vone a vavasati na vayambali a swiyambalu leswi switxhavisekaka, hi kutikhoma mayentxeleni, vangatixongise hi kulehisa misisi, kumbe hi gole ni maperola, kumbe minkhantxu ya kudula,

¹⁰ kambe avatixongise hi leswi swifanekelaka a vavasati lava vatxhavaka Xikwembu Nkulukumba, anga mintiro leminene.

¹¹ A wansati, aadondre akumiyeleni, ni le kuyingiseteni hinkwaku;

¹² na kone, anipfumeleli wansati leswaku adondrisa kumbe ava ni nawu ahenhla ka wanuna, kambe aatrhame na amiyelile.

¹³ Hikusa Adamu hi yene angaranga avumbiwa, ntrhaku kuvumbiwa Eva.

¹⁴ Mfuri ahi Adamu lweyi angakanganyisiwa, kambe ave wansati lweyi hi kukanganyisiwa, angatlula nawu;

¹⁵ kambe atahuluka hi kubeleka a vana, loko vatrhama akupfumeleni ni le lirandrwini, ni le kubasisiweni hi kutikhoma.